ನ್ಯೂಸ್ ನಾಟೌಟ್: ಕಳೆದ ಮೂರು ವರ್ಷಗಳಿಂದ ರಷ್ಯಾ ಹಾಗೂ ಉಕ್ರೇನ್ ನಡುವೆ ಯುದ್ಧ ನಡೆಯುತ್ತಿವೆ. ಈ ತನಕ ಯುದ್ಧ ನಿಲ್ಲುವ ಸಾಧ್ಯತೆಗಳು ಕಾಣುತ್ತಿಲ್ಲ. ಈ ನಡುವೆ ಭಾರತದಿಂದ ಸೆಕ್ಯೂರಿಟಿ ಕೆಲಸಕ್ಕೆಂದು ಹೋದ 13 ಜನರಲ್ಲಿ ಮೂವರು ತಮ್ಮ ಪ್ರಾಣ ಕಳೆದುಕೊಂಡ ದಾರುಣ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಕಳೆದ ವರ್ಷ ಅಜಂಗಢ ಹಾಗೂ ಮೌ ಜಿಲ್ಲೆಗಳಿಂದ ಎರಡು ಡಜನ್ ಮಂದಿ ಸೆಕ್ಯೂರಿಟಿ ಕೆಲಸಕ್ಕಾಗಿ ರಷ್ಯಾಗೆ ಹೋಗಿದ್ದರು.
ರಷ್ಯಾಕ್ಕೆ ತೆರಳಿದ 13 ಜನರಲ್ಲಿ ಮೂವರು ಯುದ್ಧಭೂಮಿಯಲ್ಲಿ ಪ್ರಾಣ ಕಳೆದುಕೊಂಡಿದ್ದಾರೆ. ಇಬ್ಬರು ಯುದ್ಧದಲ್ಲಿ ಗಾಯಗೊಂಡು ಹಿಂದಿರುಗಿದ್ದಾರೆ. ಉಳಿದ ಎಂಟು ಮಂದಿ ಎಲ್ಲಿದ್ದಾರೆ ಎಂಬ ಮಾಹಿತಿ ಇದುವರೆಗೆ ಲಭ್ಯವಾಗಿಲ್ಲ ಎಂದು ತಿಳಿದು ಬಂದಿದೆ. ಆಮಿಷವೊಡ್ಡಿ ಕರೆದೊಯ್ದಿದ್ದರು..! ಈ ಜನರಿಗೆ ರಷ್ಯಾದಲ್ಲಿ ಭದ್ರತಾ ಸಿಬ್ಬಂದಿ, ಸಹಾಯಕರು ಮತ್ತು ಅಡುಗೆಯವರಂತೆ ಕೆಲಸ ನೀಡಲಾಗುವುದು ಮತ್ತು ಪ್ರತಿ ತಿಂಗಳು 2 ಲಕ್ಷ ರೂ.ಗಳ ಭರವಸೆ ನೀಡಲಾಯಿತು. ಆದರೆ ಪ್ರತಿಯಾಗಿ ಅವರನ್ನು ಬಲವಂತವಾಗಿ ಯುದ್ಧಭೂಮಿಗೆ ಕಳುಹಿಸಲಾಯಿತು.
ರಷ್ಯಾ-ಉಕ್ರೇನ್ ಯುದ್ಧದಲ್ಲಿ ಅಜಂಗಢದ ಕನ್ಹಯ್ಯಾ ಯಾದವ್ ಮತ್ತು ಮೌವಿನ ಶ್ಯಾಮಸುಂದರ್ ಮತ್ತು ಸುನೀಲ್ ಯಾದವ್ ಪ್ರಾಣ ಕಳೆದುಕೊಂಡಿದ್ದಾರೆ. ಅಜಂಗಢದ ರಾಕೇಶ್ ಯಾದವ್ ಮತ್ತು ಮೌವಿನ ಬ್ರಿಜೇಶ್ ಯಾದವ್ ಯುದ್ಧದಲ್ಲಿ ಗಾಯಗೊಂಡು ಈಗ ಮನೆಗೆ ಮರಳಿದ್ದಾರೆ. ಏತನ್ಮಧ್ಯೆ, ವಿನೋದ್ ಯಾದವ್, ಯೋಗೇಂದ್ರ ಯಾದವ್, ಅರವಿಂದ್ ಯಾದವ್, ರಾಮಚಂದ್ರ, ಅಜರುದ್ದೀನ್ ಖಾನ್, ಹುಮೇಶ್ವರ್ ಪ್ರಸಾದ್, ದೀಪಕ್ ಮತ್ತು ಧೀರೇಂದ್ರ ಕುಮಾರ್ ಎಂಬ ಎಂಟು ಜನರ ಸುದ್ದಿ ಇಲ್ಲ. ಅವರ ಬಗ್ಗೆ ತಿಳಿಯಲು ಕುಟುಂಬ ಸದಸ್ಯರು ಇನ್ನೂ ಕಾಯುತ್ತಿದ್ದಾರೆ.
