ನ್ಯೂಸ್ ನಾಟೌಟ್ : ಆಕಾಶದಲ್ಲಿ ಹಾರಾಡುವ ಹಕ್ಕಿಗಳ ಬಗ್ಗೆ ನಿಮ್ಗೆ ಗೊತ್ತಿದೆ.ಲೋಹದ ಹಕ್ಕಿ ವಿಮಾನದ ಬಗ್ಗೆಯೂ ನಿಮ್ಗೆ ಗೊತ್ತಿದೆ.ಆದರೆ ಇನ್ಮುಂದೆ ಕಾರಲ್ಲಿ ಕೂಡ ನೀವು ಹಾರಾಡಬಹುದು.ಅರೆ! ಇದೇನಿದು? ಇಂತಹದ್ದೊಂದು ವಿಷಯವನ್ನು ಕಲ್ಪನೆಯೇ ಮಾಡಿಲ್ಲ ಎಂದು ಯೋಚನೆ ಮಾಡುತ್ತಿದ್ದೀರಾ?ಹೌದು,ನಿಮಗೆ ಅಚ್ಚರಿಯಾದರೂ ಇದು ನಿಜ..!
ಇನ್ನು ನೀವು ರೋಡಿನಿಂದಲೇ ಆಗಸಕ್ಕೇ ಟೇಕಾಫ್ ಮಾಡಬಹುದು!. ಸ್ಕೈ-ಫೈ ಸಿನಿಮಾಗಳಲ್ಲಿ ನೀವು ನೋಡಿದಂತೆಯೇ ಇದೀಗ ಹಾರುವ ಕಾರುಗಳಿಗೆ ಅಧಿಕೃತವಾಗಿ ಅನುಮೋದನೆ ಸಿಕ್ಕಿದೆ.ನೀವು ರಸ್ತೆಗಳಲ್ಲಿ ಓಡಿಸಬಹುದಾದ ಮತ್ತು ಆಕಾಶದಲ್ಲಿ ಹಾರಿಸಬಹುದಾದ ಸಂಪೂರ್ಣವಾಗಿ ತಯಾರಾಗಿರುವ ಎಲೆಕ್ಟ್ರಿಕ್ ಕಾರು ಯುಎಸ್ ಸರ್ಕಾರದಿಂದ ಹಾರಲು ಕಾನೂನು ಅನುಮೋದನೆಯನ್ನು ಪಡೆದಿದೆ ಎನ್ನುವುದು ಆಶ್ಚರ್ಯದ ಸಂಗತಿ.
ಅಮೆರಿಕ ಮೂಲದ ಅಲೆಫ್ ಏರೋನಾಟಿಕ್ಸ್ ಅಭಿವೃದ್ಧಿಪಡಿಸಿರುವ ಈ ಹಾರುವ ಕಾರಿಗೆ ಅಮೆರಿಕ ಸರ್ಕಾರದಿಂದ ಅನುಮೋದನೆ ಸಿಕ್ಕಿದೆಯಂತೆ. ಮಾಡೆಲ್ ಎ ಎಂದು ಕರೆಯಲ್ಪಡುವ ತನ್ನ ಕಾರು ಯುಎಸ್ ಫೆಡರಲ್ ಏವಿಯೇಷನ್ ಅಡ್ಮಿನಿಸ್ಟ್ರೇಷನ್ (ಎಫ್‌ಎಎ) ಯಿಂದ ವಿಶೇಷ ಏರ್‌ವರ್ದಿನೆಸ್ ಪ್ರಮಾಣೀಕರಣವನ್ನು ಪಡೆದಿದೆ ಎಂದು ಕಂಪನಿಯು ಘೋಷಿಸಿತು.
ಈ ಬೆಳವಣಿಗೆಯು ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಗಲಿದೆ. ಏಕೆಂದರೆ ಮೊದಲ ಬಾರಿಗೆ ಇಂತಹದೊಂದು ಸಾಹಸಕ್ಕೆ ಕೈ ಹಾಕಲಾಗಿದೆ.ಈ ಮೂಲಕ ಅನೇಕ ವರ್ಷಗಳಿಂದ ಜನರು ಕಾಣುತ್ತಿದ್ದ ಹಾರುವ ಕಾರಿನ ಸ್ಕೈ-ಫೈ ಕನಸು ನನಸಾಗಿದೆ ಎಂದೇ ಹೇಳಬಹುದು.
ಕಾರಿನಂತೆ ಚಾಲನೆ ಮಾಡುವ ಸಾಮರ್ಥ್ಯ, ನಿಂತಲ್ಲಿಂದಲೇ ಟೇಕ್‌ಆಫ್ ಮಾಡುವ ಸಾಮರ್ಥ್ಯಗಳು ಮತ್ತು ಕೈಗೆಟುಕುವ ಸಾಮರ್ಥ್ಯದಂತಹ ನಿರ್ದಿಷ್ಟ ಅವಶ್ಯಕತೆಗಳನ್ನು ಪೂರೈಸಲು ಅಲೆಫ್ ಏರೋನಾಟಿಕ್ಸ್ ತನ್ನ ಮೊದಲ ಮಾದರಿಯನ್ನು 2016 ರಲ್ಲಿ ನಿರ್ಮಿಸಿತು. ಈ ಮಾದರಿಯು ಅಕ್ಟೋಬರ್ 2022ರಲ್ಲಿ ಪೂರ್ವ ಮಾರಾಟವನ್ನು ಪ್ರಾರಂಭಿಸಿ ಆ ವರ್ಷದ ಅಂತ್ಯದ ವೇಳೆಗೆ ಅದಾಗಲೇ 440ಕ್ಕೂ ಹೆಚ್ಚು ಮೀಸಲಾತಿಗಳನ್ನು ಪಡೆದುಕೊಂಡಿದೆ ಎಂದು ಕಂಪನಿ ವರದಿ ಮಾಡಿದೆ.
ಅಲೆಫ್ ಏರೋನಾಟಿಕ್ಸ್ 2019ರಿಂದ ತಮ್ಮ ಮೂಲಮಾದರಿಗಳನ್ನು ಟೆಸ್ಟ್-ಡ್ರೈವಿಂಗ್ ಮತ್ತು ಟೆಸ್ಟ್-ಫ್ಲೈ ಮಾಡುತ್ತಿದೆ. ಮಾಡೆಲ್ ಎ ಉತ್ಪಾದನೆಯು 2025 ರ ಪ್ರಾರಂಭವಾಗುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ. ಕಂಪನಿಯು ನಾಲ್ಕು ವ್ಯಕ್ತಿಗಳು ಪ್ರಯಾಣಿಸಬಹುದಾದ ಮಾದರಿಗಳನ್ನು ಅಭಿವೃದ್ಧಿಪಡಿಸಲು ಯೋಜಿಸುತ್ತಿದೆ ಎಂದು ತಿಳಿದು ಬಂದಿದೆ.
