ನ್ಯೂಸ್ ನಾಟೌಟ್: ಒಟ್ಟು 350 ಮಂದಿ ಪ್ರಯಾಣಿಸುತ್ತಿದ್ದ ರೈಲುಗಳ ನಡುವೆ ಮುಖಾಮುಖಿ ಢಿಕ್ಕಿ ಸಂಭವಿಸಿ ಕನಿಷ್ಠ 26 ಮಂದಿ ಮೃತಪಟ್ಟು,85 ಕ್ಕೂ ಅಧಿಕ ಮಂದಿ ಗಾಯಗೊಂಡಿರುವ ಘಟನೆ ಗ್ರೀಸ್‌ ನಲ್ಲಿ ಮಂಗಳವಾರ ಫೆ.28 ರಂದು ತಡರಾತ್ರಿ ನಡೆದಿರುವುದಾಗಿ ಮೂಲಗಳು ತಿಳಿಸಿವೆ.
ಅಥೆನ್ಸ್‌ನ ಉತ್ತರ ನಗರವಾದ ಥೆಸಲೋನಿಕಿಗೆ ಪ್ರಯಾಣಿಸುತ್ತಿದ್ದ ಪ್ಯಾಸೆಂಜರ್ ರೈಲು ಮಧ್ಯ ಗ್ರೀಸ್‌ನ ಲಾರಿಸ್ಸಾ ನಗರದಿಂದ ಬರುತ್ತಿದ್ದ ಸರಕು ತುಂಬಿದ ಕಾರ್ಗೋ ರೈಲಿಗೆ ಢಿಕ್ಕಿ ಹೊಡೆದ ಪರಿಣಾಮ ಪ್ಯಾಸೆಂಜರ್ ರೈಲಿನ ಮೊದಲ ನಾಲ್ಕು ಬೋಗಿಗಳು ಹಳಿ ತಪ್ಪಿದೆ. ಆ ಬಳಿಕ ಮೊದಲ ಎರಡು ಬೋಗಿಗಳಿಗೆ ಬೆಂಕಿ ಹೊತ್ತಿಕೊಂಡಿದೆ ಎಂದು ಥೆಸಲಿ ಪ್ರದೇಶದ ಗವರ್ನರ್ ಕಾನ್ಸ್ಟಾಂಟಿನೋಸ್ ಅಗೋರಾಸ್ಟೋಸ್ ಹೇಳಿದ್ದಾರೆ.
350 ಮಂದಿಯಲ್ಲಿ ಸುಮಾರು 250 ಮಂದಿಯನ್ನು ಸುರಕ್ಷಿತವಾಗಿ ಹೊರ ತೆಗೆಯಲಾಗಿದ್ದು, 26 ಮಂದಿ ಮೃತಪಟ್ಟಿದ್ದಾರೆ ಎನ್ನಲಾಗಿದೆ. ಇನ್ನುಳಿದ 85 ಮಂದಿ ಘಟನೆಯಲ್ಲಿ ಗಾಯಗೊಂಡಿದ್ದಾರೆ ಎಂದು ಅಥೆನ್ಸ್‌ನ ಉತ್ತರ ನಗರ ಥೆಸಲೋನಿಕಿಯ ಗವರ್ನರ್ ಕಾನ್ಸ್ಟಾಂಟಿನೋಸ್ ಅಗೋರಾಸ್ಟೋಸ್ ತಿಳಿಸಿದ್ದಾರೆ. ರೈಲುಗಳು ಢಿಕ್ಕಿ ಹೊಡೆದಾಗ ನಮಗೆ ಭೂಕಂಪನದ ಅನುಭವವಾಯಿತೆಂದು ಪ್ರಯಾಣಿಕರೊಬ್ಬರು ಅನುಭವ ಹಂಚಿಕೊಂಡಿದ್ದಾರೆ.
