ನಂಜನಗೂಡು: ಊರಿನ ಜನರ ನಂಬಿಕೆಯಾಗಿದ್ದ ಗ್ರಾಮ ದೇವತೆ ದೇವಸ್ಥಾನವನ್ನು ಊರಿನವರ ವಿಶ್ವಾಸಕ್ಕೆ ತೆಗೆದುಕೊಳ್ಳದೆ ಧ್ವಂಸ ಮಾಡಿಸಿದ ನಂಜನಗೂಡು ತಹಶೀಲ್ದಾರ್ ಮೋಹನಕುಮಾರಿ ಅವರನ್ನು ವರ್ಗಾವಣೆ ಮಾಡಿ ಸರಕಾರ ಆದೇಶ ಹೊರಡಿಸಿದೆ. ತಾಲ್ಲೂಕಿನ ಉಚ್ಚಗಣಿ ಗ್ರಾಮಸ್ಥರು ಬಹಳ ವರ್ಷಗಳಿಂದ ತಮ್ಮ ಭಕ್ತಿ ನಂಬಿಕೆಗಳಿಂದ ಗ್ರಾಮದೇವತೆ ಮಹದೇವಮ್ಮಳನ್ನು ನಂಬಿಕೊಂಡು ಬಂದಿದ್ದರು. ಹಲವಾರು ದೇವಸ್ಥಾನಗಳನ್ನು ಕೆಡವಿ ರಾಜ್ಯ ಸರಕಾರ ಇಕ್ಕಟ್ಟಿಗೆ ಸಿಲುಕಿದ ನಡುವೆಯೇ ಈ ದೇವಸ್ಥಾನವನ್ನು ತಹಶೀಲ್ದಾರ್ ಊರಿನವರ ವಿರೋಧದ ನಡುವೆಯೂ ತಮ್ಮದೇ ಸ್ಟೈಲ್ ನಲ್ಲಿ ಕೆಡವಿಸಿದ್ದರು ಎನ್ನಲಾಗಿದೆ. ಇದು ಆಡಳಿತ ಪಕ್ಷಕ್ಕೆ ಮುಜುಗರ ತಂದಿದ್ದು ತಕ್ಷಣ ಆಕೆಯನ್ನು ವರ್ಗಾವಣೆ ಮಾಡುವಂತೆ ಮೈಸೂರು ಜಿಲ್ಲಾಧಿಕಾರಿಗೆ ಸೂಚಿಸಲಾಗಿದೆ. ಸೋಮವಾರ ವರ್ಗಾವಣೆ ಮಾಡಿ ಆದೇಶ ಹೊರಡಿಸುವ ಮೂಲಕ ಜನರ ಆಕ್ರೋಶವನ್ನು ತಹಬದಿಗೆ ತರುವಲ್ಲಿ ಸರ್ಕಾರ ಯಶಸ್ವಿಯಾಗಿದೆ.
ಗ್ರಾಮ ದೇವತೆ ದೇವಸ್ಥಾನ ಧ್ವಂಸ, ಲೇಡಿ ತಹಶೀಲ್ದಾರ್ ಎತ್ತಂಗಡಿ
