ನ್ಯೂಸ್ ನಾಟೌಟ್‌: ಸುಳ್ಯ ತಾಲೂಕಿನ ಗುತ್ತಿಗಾರು ಸಮೀಪದ ಮಾವಿನಕಟ್ಟೆಯಲ್ಲಿ ಕಳ್ಳರ ಹಾವಳಿ ಹೆಚ್ಚಾಗಿದೆ. ಕಳೆದ ಎರಡು ದಿನಗಳ ಹಿಂದೆ ಈ ಭಾಗದ ಕೆಲವು ಅಂಗಡಿಗಳಿಗೆ ಕಳ್ಳರು ನುಗ್ಗಲು ವಿಫಲ ಯತ್ನ ನಡೆಸಿದ್ದಾರೆ.
ಮಂಗಳವಾರ ರಾತ್ರಿ ಮಾವಿನಕಟ್ಟೆಯ ಸತೀಶ್‌ ಎಂಬವರಿಗೆ ಸೇರಿದ ಶ್ರೀದೇವಿಗೆ ಸ್ಟೋರ್‌ಗೆ ನುಗ್ಗಲು ಯತ್ನಿಸಿದ ಕಳ್ಳರು ಅಂಗಡಿಯ ಬೀಗ ಒಡೆಯಲು ವಿಫಲ ಯತ್ನ ನಡೆಸಿದ್ದಾರೆ. ಇದರಿಂದ ಈ ಭಾಗದ ಅಂಗಡಿ, ಮನೆ ಮಾಲೀಕರಿಗೆ ಆತಂಕ ಎದುರಾಗಿದೆ.
ಕಳ್ಳತನಕ್ಕೆ ಯತ್ನಿಸಿದ ಅಂಗಡಿಗೆ ಬುಧವಾರ ಸುಬ್ರಹ್ಮಣ್ಯ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಈ ಹಿಂದೆ ಎರಡು ಮೂರು ಬಾರಿ ಇದೇ ಭಾಗದಲ್ಲಿ ಕಳ್ಳತನದ ಹಾವಳಿ ನಡೆದಿತ್ತು. ಆದ್ದರಿಂದ ರಾತ್ರಿ ಹೊತ್ತು ಪೊಲೀಸರು ಹೆಚ್ಚು ಬಾರಿ ರೌಂಡ್ಸ್ ಮಾಡುವಂತೆ ಸ್ಥಳೀಯರು ಒತ್ತಾಯಿಸಿದ್ದಾರೆ.
