ನ್ಯೂಸ್ ನಾಟೌಟ್ : ಬಿಜೆಪಿಯ ಹಿರಿಯ ನಾಯಕ,ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರು ತಮ್ಮ ಪುತ್ರ ಬಿ.ವೈ. ವಿಜಯೇಂದ್ರ ಅವರ ನಾಮಪತ್ರ ಸಲ್ಲಿಕೆಯ ಸಂದರ್ಭದಲ್ಲಿ ನಟಿ ಶ್ರುತಿಯ ಕೆನ್ನೆ ಹಿಂಡುವ ಮೂಲಕ ವಿಶೇಷವಾಗಿ ಗಮನ ಸೆಳೆದಿದ್ದು ವಿಡಿಯೋ ಭಾರಿ ವೈರಲ್ ಆಗಿದೆ.
ನಗರದಲ್ಲಿ ನಾಮಪತ್ರ ಸಲ್ಲಿಕೆಗೂ ಮುನ್ನ ಹಮ್ಮಿಕೊಳ್ಳಲಾಗಿದ್ದ ಬೃಹತ್ ಮೆರವಣಿಗೆಯಲ್ಲಿ ಈ ಸನ್ನಿವೇಶ ಕಂಡುಬಂದಿದೆ. ಈ ಸಂದರ್ಭ ಸಾವಿರಾರು ಜನರು ಜಮಾಯಿಸಿದ್ದು, ಅದ್ದೂರಿ ಮೆರವಣಿಗೆಯಲ್ಲಿ ನಟಿ ಶ್ರುತಿ ಕೂಡ ಪಾಲ್ಗೊಂಡಿದ್ದರು.ತೆರೆದ ವಾಹನದಲ್ಲಿ ಎದುರು ಭಾಗದಲ್ಲಿ ನಟಿ ಶೃತಿಯವರು ಇದ್ದರೆ, ಅವರ ಪಕ್ಕದಲ್ಲೇ ಬಿಎಸ್ವೈ ಅವರು ನಿಂತಿದ್ದರು. ನಟಿ ಶೃತಿಯವರೊಂದಿಗೆ ಏನನ್ನೋ ಮಾತನಾಡಿದ್ದ ಬಿಎಸ್ ವೈಯವರು ಇದೇ ಸಂದರ್ಭದಲ್ಲಿ ಅವರ ಕೆನ್ನೆ ಹಿಂಡಿದ್ದು, ಈ ಫೋಟೋ ಜತೆಗೆ ವಿಡಿಯೋ ಎಲ್ಲೆಡೆ ಹರಿದಾಡಲಾರಂಭಿಸಿದೆ.
ಮೆರವಣಿಗೆಗೆ ಸೇರಿಕೊಂಡ ನಟಿ ಶ್ರುತಿ ಮೊದಲು ಬಿ.ಎಸ್. ಯಡಿಯೂರಪ್ಪ ಅವರಿಗೆ ಕೈಮುಗಿದು ನಮಸ್ಕಾರ ಮಾಡಿದ್ದರು. ನಂತರ ಬಿಎಸ್ವೈ ಅವರ ಆಶೀರ್ವಾದ ಪಡೆಯಲು ತಲೆ ಬಾಗಿಸಿದ್ದರು. ಆಗ ಆಕೆಯ ತಲೆ ನೇವರಿಸಿದ ಯಡಿಯೂರಪ್ಪ, ಕೆನ್ನೆಯನ್ನೂ ಹಿಂಡಿ, ಆತ್ಮೀಯತೆಯಿಂದ ಏನನ್ನೋ ಹೇಳಿದ್ದು ಕಂಡುಬಂತು.
ಇದುವರೆಗೆ ಬಿಎಸ್ವೈ ಸ್ಪರ್ಧಿಸುತ್ತಿದ್ದ ಶಿವಮೊಗ್ಗದ ಶಿಕಾರಿಪುರ ವಿಧಾನಸಭಾ ಕ್ಷೇತ್ರದಲ್ಲಿ ಈ ಸಲ ಅವರ ಪುತ್ರ ಬಿ.ವೈ.ವಿಜಯೇಂದ್ರ ಸ್ಪರ್ಧೆ ಮಾಡುತ್ತಿದ್ದು, ಅದ್ಧೂರಿಯಾಗಿ ಬೃಹತ್ ಮೆರವಣಿಗೆಯಲ್ಲಿ ಸಾಗಿ ನಾಮಪತ್ರ ಸಲ್ಲಿಸಲಾಯಿತು. ಶಾಸಕ ಪಿ.ರಾಜೀವ್, ನಾರಾಯಣಸ್ವಾಮಿ ಸೇರಿದಂತೆ ಹಲವರು ಈ ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದರು.
