ನ್ಯೂಸ್‌ ನಾಟೌಟ್‌: ಕಳೆದ ಎರಡು ದಿನಗಳಿಂದ ರಾಜ್ಯದ ಹಲವೆಡೆ ಭಾರಿ ಮಳೆಯಾಗುತ್ತಿದ್ದು, ಕೆಲವು ಭಾಗಗಳಲ್ಲಿ ವರುಣ ಅಬ್ಬರಕ್ಕೆ ಅಪಾರ ಹಾನಿಯಾಗಿದೆ. ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ತಾಲೂಕಿನ ದುರ್ಗದಹಳ್ಳಿ ಕಾಲಬೈರವೇಶ್ವರ ದೇವಸ್ಥಾನದ ಬಳಿ ನಿಲ್ಲಿಸಿದ ಕಾರಿನ ಮೇಲೆ ಮರ ಬಿದ್ದು ಹೊಸ ಕಾರೊಂದು ಜಖಂಗೊಂಡಿದೆ. ಅದೃಷ್ಟವಶಾತ್‌ ಕಾರಿನಲ್ಲಿ ಯಾರೂ ಇಲ್ಲದ ಕಾರಣ ಸಾವು-ನೋವು ಸಂಭವಿಸಿಲ್ಲ ಆದರೆ ಕಾರು ಮಾತ್ರ ಜಖಂಗೊಂಡಿದೆ.
ಬಾಳೂರು ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ಸಂಭವಿಸಿದ್ದು, ಮರ ಬಿದ್ದು ಹೊಸ ಬಲೆನೋ ಕಾರು ಜಖಂಗೊಂಡಿದೆ. ಬೆಂಗಳೂರು ಮೂಲದ ಯುವಕರ ತಂಡವೊಂದು ಬೆಂಡಾಜೆ ಬೆಟ್ಟಕ್ಕೆ ಚಾರಣಕ್ಕೆಂದು ಇಲ್ಲಿಗೆ ಆಗಮಿಸಿದ್ದರು. ಅದರಂತೆ ದುರ್ಗದಹಳ್ಳಿ ಕಾಲಬೈರವೇಶ್ವರ ದೇವಸ್ಥಾನದ ಬಳಿ ಕಾರು ನಿಲ್ಲಿಸಿ ಚಾರಣಕ್ಕೆ ತೆರಳಿದ್ದರು. ಪಾರ್ಕಿಂಗ್‌ ಮಾಡಿದ ಸ್ಥಳದಿಂದ ಬೆಂಡಾಜೆ ಬೆಟ್ಟಕ್ಕೆ 10 ಕಿ.ಮೀ. ದೂರವಿದೆ. ಆದರೆ ಚಾರಣಕ್ಕೆ ಹೋದವರಿಗೆ ತಮ್ಮ ಕಾರು ಜಖಂಗೊಂಡ ವಿಚಾರ ಮಾತ್ರ ಗೊತ್ತಾದದ್ದು ಚಾರಣ ಮುಗಿಸಿ ಬಂದ ಮೇಲೆಯೇ..!
