ನ್ಯೂಸ್ ನಾಟೌಟ್ : ಕೆನಡಾದ ವಾಟರ್ ಲೂ ವಿಶ್ವವಿದ್ಯಾಲಯದ ಸಂಶೋಧಕರ ತಂಡ ವಸ್ತುಗಳನ್ನು ಪತ್ತೆ ಹಚ್ಚಲು ಹೊಸ ರೋಬೋಟ್ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದ್ದಾರೆ ಎನ್ನಲಾಗಿದೆ. ಈ ರೋಬೋಟ್ ಆರ್ಟಿಫಿಶಿಯಲ್ ಮೆಮೊರಿ ತಂತ್ರಜ್ಞಾನದ ಮೂಲಕ ಕಾರ್ಯನಿರ್ವಹಿಸುತ್ತದೆ.
ಈ ಬಗ್ಗೆ ಮಾಹಿತಿ ನೀಡಿದ ಸಂಶೋಧಕ ಡಾ.ಅಲಿ ಅಯೂಬ್, ಒಬ್ಬ ಬಳಕೆದಾರ ಕೇವಲ ರೋಬೋಟ್ ಜೊತೆಗೆ ಇರುವುದನ್ನು ಹೊರತುಪಡಿಸಿ ಇದು ನಮ್ಮ ವೈಯಕ್ತಿಕ ಒಡನಾಡಿಯಾಗಿ ಕಾರ್ಯ ನಿರ್ವಹಿಸುತ್ತದೆ ಎಂದು ಹೇಳಿದರು. ಅನೇಕರು ದಿನನಿತ್ಯದ ವಸ್ತುಗಳ ಇಟ್ಟ ಸ್ಥಳವನ್ನು ಪದೇ ಪದೇ ಮರೆಯುತ್ತಾರೆ. ಇದಕ್ಕೆ ಪರಿಹಾರವಾಗಿ ರೋಬೋಟ್ನ್ನು ಬಳಸಿ ವಸ್ತುಗಳನ್ನು ಪತ್ತೆಹಚ್ಚಲು ಸಹಕಾರಿಯಾಗುತ್ತದೆ.
ಈ ರೋಬೋಟ್ ಎಪಿಸೋಡಿಕ್ ಮೆಮೊರಿ ಮೂಲಕ ಕಾರ್ಯ ನಿರ್ವಹಿಸುತ್ತದೆ. ಅಂದರೆ ದೈನಂದಿನ ಕಾರ್ಯಗಳನ್ನು ಈ ರೋಬೋಟ್ನ ಮೆಮೊರಿಯಲ್ಲಿ ಇರಿಸಲಾಗುತ್ತದೆ. ಅಲ್ಲದೆ ಇದರಲ್ಲಿ ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ನ್ನು ಬಳಕೆ ಮಾಡಿ ಹೊಸ ರೀತಿಯ ಆರ್ಟಿಫಿಷಿಯಲ್ ಮೆಮೊರಿಯನ್ನು ಅಳವಡಿಸಲಾಗುತ್ತದೆ. ಈ ರೋಬೋಟ್ ತನ್ನ ಸುತ್ತಲಿನ ಪರಿಸರವನ್ನು ಗಮನಿಸಲು ಕ್ಯಾಮೆರಾವನ್ನು ಹೊಂದಿದೆ.
ಅಲ್ಲದೆ ಈ ರೋಬೋಟ್ ಆಬ್ಜೆಕ್ಟ್ ಡಿಟೆಕ್ಷನ್ ತಂತ್ರಜ್ಞಾನದ ಮೂಲಕ ವಸ್ತುಗಳನ್ನು ಗುರುತಿಸುತ್ತದೆ. ರೋಬೋಟ್ನ ಮೆಮೊರಿಯಲ್ಲಿ ದೈನಂದಿನ ಚಟುವಟಿಕೆ ವಸ್ತುಗಳ ಬಗ್ಗೆ ಮಾಹಿತಿಯನ್ನು ತುಂಬಲಾಗಿರುತ್ತದೆ. ಅಷ್ಟೇ ಅಲ್ಲದೆ ತನ್ನಲ್ಲಿ ಅಳವಡಿಸಿರುವ ಕ್ಯಾಮೆರಾದ ಮೂಲಕ ವಿವಿಧ ವಸ್ತುಗಳನ್ನು ಗ್ರಹಿಸಲು ರೋಬೋಟ್ಗೆ ಸಾಧ್ಯವಾಗುತ್ತದೆ. ರೋಬೋಟ್ನ ಕಣ್ಣಿಗೆ ಬಿದ್ದ ವಸ್ತುಗಳ ಸಮಯ ಮತ್ತು ದಿನಾಂಕವನ್ನು ಇದು ತನ್ನಲ್ಲಿ ನಮೂದಿಸಿಕೊಳ್ಳುತ್ತದೆ ಎನ್ನಲಾಗಿದೆ.
ಇನ್ನು, ಬಳಕೆದಾರ ವ್ಯಕ್ತಿಯು ಕಳೆದುಕೊಂಡ ವಸ್ತುಗಳ ಬಗ್ಗೆ ರೋಬೋಟ್ನ ಗ್ರಾಫಿಕ್ ಇಂಟರ್ಫೇಸ್ ಮೇಲೆ ಟೈಪ್ ಮಾಡಿದಾಗ, ಅಥವಾ ಇದಕ್ಕೆ ಹೊಂದಿಕೊಂಡಿರುವ ಫೋನ್ ಮೂಲಕ ಮತ್ತು ಕಂಪ್ಯೂಟರ್ ಮೂಲಕ ನಾವು ವಸ್ತುಗಳ ಹೆಸರನ್ನು ನಮೂದಿಸಿದರೆ ಇದು ನಿರ್ದಿಷ್ಟವಾಗಿ ವಸ್ತು ಇರುವ ಸ್ಥಳವನ್ನು ನಮಗೆ ತಿಳಿಸುತ್ತದೆ. ಈ ರೋಬೋಟಿಕ್ ಪ್ರಯೋಗವು ಯಶಸ್ವಿಯಾಗಿದೆ ಎನ್ನಲಾಗಿದೆ.
