ನ್ಯೂಸ್‌ ನಾಟೌಟ್‌: ಕೊಲೆ ಯತ್ನದಿಂದ ಬದುಕುಳಿದ ಮೃತ ಭೂಗತ ಪಾತಕಿ ಮುತ್ತಪ್ಪ ರೈ ಪುತ್ರ ರಿಕಿ ರೈ ಬಿಡದಿ ಪೊಲೀಸರ ಮುಂದೆ ಹಾಜರಾಗಿದ್ದರು. ಆ ದಿನ ಏನು ನಡೆಯಿತು ಎಂಬ ಕುರಿತು ಪೊಲೀಸರಿಗೆ ವಿವರಿಸಿದ್ದಾರೆ. ಘಟನೆ ಕುರಿತಂತೆ ಈ ಹಿಂದೆ ಪೊಲೀಸ್ ಸಮನ್ಸ್‌ ಗೆ ಪ್ರತಿಕ್ರಿಯಿಸಲು ರಿಕಿ ರೈ ಸಮಯ ಕೋರಿದ್ದರು.
ಏಪ್ರಿಲ್ 19ರಂದು ರಿಕಿ ರೈ ಬಿಡದಿಯಲ್ಲಿರುವ ಫಾರ್ಮ್‌ಹೌಸ್‌ ನಿಂದ ಬೆಂಗಳೂರಿಗೆ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ ಗೇಟ್‌ ಕೀಪರ್ ವಿಠಲ್ ಮೋನಪ್ಪ ಗುಂಡು ಹಾರಿಸಿದ್ದಾನೆ ಎಂದು ಆರೋಪಿಸಲಾಗಿದೆ. ಇಂದು(ಜೂ.4) ವಿಚಾರಣೆಗೆ ರಿಕಿ ರೈ ಖಾಸಗಿ ಭದ್ರತಾ ಸಿಬ್ಬಂದಿಯೊಂದಿಗೆ ಪೊಲೀಸ್ ಠಾಣೆಗೆ ಬಂದಿದ್ದರು. ಅವರನ್ನು ಉಪ ಪೊಲೀಸ್ ವರಿಷ್ಠಾಧಿಕಾರಿ ಶ್ರೀನಿವಾಸ್ ಮತ್ತು ಬಿಡದಿ ಪೊಲೀಸ್ ಠಾಣೆ ಇನ್ಸ್‌ ಪೆಕ್ಟರ್ ಶಂಕರ್ ನಾಯಕ್ ಸುಮಾರು 4 ಗಂಟೆಗಳ ಕಾಲ ವಿಚಾರಣೆ ನಡೆಸಿದರು. ಪೊಲೀಸರು ಹೇಳಿಕೆಯನ್ನು ವಿಡಿಯೋ ಚಿತ್ರೀಕರಣ ಮಾಡಿದ್ದಾರೆ.
“ಅದೃಷ್ಟವಶಾತ್, ನಾನು ಕೊಲೆ ಯತ್ನದಿಂದ ಬದುಕುಳಿದೆ. ವಿವರವಾದ ತನಿಖೆ ಅಗತ್ಯವಿದೆ, ಮತ್ತು ನ್ಯಾಯ ಸಿಗುತ್ತದೆ ಎಂದು ನಾನು ಭಾವಿಸುತ್ತೇನೆ. ಇಲ್ಲದಿದ್ದರೆ, ದಾಳಿಯ ಹಿಂದಿನವರನ್ನು ನಾವೇ ನೋಡಿಕೊಳ್ಳುತ್ತೇನೆ” ಎಂದು ರಿಕಿ ಮಾಧ್ಯಮಗಳೊಂದಿಗೆ ಮಾತನಾಡುತ್ತಾ ಹೇಳಿದ್ದಾರೆ.
“ನಾವು ಎಲ್ಲಾ ಅಗತ್ಯ ಮಾಹಿತಿಯನ್ನು ಹಂಚಿಕೊಂಡಿದ್ದೇವೆ. ಸುಳ್ಳು ವದಂತಿಗಳು ಹರಡುತ್ತಿದ್ದರೂ, ತನಿಖೆಯಲ್ಲಿ ನಮಗೆ ಸಂಪೂರ್ಣ ನಂಬಿಕೆ ಇದೆ” ಎಂದು ರಿಕಿ ರೈ ಪರ ವಕೀಲ ಹೇಳಿದ್ದಾರೆ.
