ನ್ಯೂಸ್ ನಾಟೌಟ್ : ಬೈಕ್ ಅಪಘಾತದಲ್ಲಿ (Road Accident) ಸಂಭವಿಸಿ ಇಬ್ಬರು ಸ್ಥಳದಲ್ಲೇ ದುರಂತ ಅಂತ್ಯ ಕಂಡಿರುವ ಘಟನೆ ವರದಿಯಾಗಿದೆ.ಕೊಡಗು ಜಿಲ್ಲೆ ಸುಂಟಿಕೊಪ್ಪ ಸಮೀಪದ ಬಿರ್ಚಿ ವುಡ್ ರೆಸಾರ್ಟ್ ಸಮೀಪದಲ್ಲಿ ರಾತ್ರಿ ವೇಳೆ ಈ ಅವಘಡ ನಡೆದಿದೆ ಎನ್ನಲಾಗಿದ್ದು, ನಿರ್ಜನ ಪ್ರದೇಶವಾದ್ದರಿಂದ ಬೆಳಗ್ಗಿನವರೆಗೂ ಯಾರ ಗಮನಕ್ಕೂ ಬಂದಿರಲಿಲ್ಲ ಎನ್ನಲಾಗಿದೆ.
ಉದಯ(25) ಹಾಗೂ ಚಂದನ್(26) ದುರಂತ ಅಂತ್ಯಕ್ಕೀಡಾದವರು.ಬೈಕ್ ಲೈಟ್ ಕಂಬಕ್ಕೆ ಅಪ್ಪಳಿಸಿದ್ದರಿಂದ ಬೈಕ್‌ನಿಂದ ಚಿಮ್ಮಿ ಬಿದ್ದ ಸವಾರರು ಸ್ಥಳದಲ್ಲೆ ಉಸಿರು ಚೆಲ್ಲಿದ್ದಾರೆ. ಧಾರಾಕಾರವಾಗಿ ಮಳೆ ಬರುತ್ತಿದ್ದುದರಿಂದ ದಾರಿ ಕಾಣದೆ ಅಥವಾ ಸ್ಕಿಡ್‌ ಆಗಿ ಅಪಘಾತ ಸಂಭವಿಸಿರಬಹುದು ಎಂದು ಶಂಕಿಸಲಾಗಿದೆ.
ಇಬ್ಬರು ಯುವಕರು ಕೂಡ ಸುಂಟಿಕೊಪ್ಪದ ಮದುರಮ ಬಡಾವಣೆ ನಿವಾಸಿಗಳು ಎಂದು ವರದಿಯಾಗಿದೆ. ನಿನ್ನೆ ರಾತ್ರಿಯೇ ಇವರು ಕುಶಾಲನಗರದಿಂದ ಸುಂಟಿಕೊಪ್ಪಕ್ಕೆ ಬರುವಾಗ ಅಪಘಾತ ನಡೆದಿದ್ದು, ಮುಂಜಾನೆ ಬೆಳಕಿಗೆ ಬಂದಿದೆ.ಅಪಘಾತವಾಗುವ ವೇಳೆ ಯಾರದ್ದಾದರೂ ಗಮನಕ್ಕೆ ಬರುತ್ತಿದ್ದರೇ ಯುವಕರು ಬದುಕುಳಿಯುತ್ತಿದ್ದ ಸಾಧ್ಯತೆ ಹೆಚ್ಚಿತ್ತೇನೋ..ಆದರೆ ದುರದೃಷ್ಟವಶಾತ್ ಘಟನೆ ಬೆಳಕಿಗೆ ಬಂದಾಗಲೇ ತಡವಾಗಿತ್ತು.ಈ ವೇಳೆಗಾಗಲೇ ಇಬ್ಬರು ಯುವಕರು ಬಾರದ ಲೋಕಕ್ಕೆ ತೆರಳಿದ್ದರು. ಸ್ಥಳಕ್ಕೆ ಸುಂಟಿಕೊಪ್ಪ ಪೊಲೀಸರು ಭೇಟಿ ನೀಡಿ ಪರಿಶೀಲಿಸಿದ್ದಾರೆ.
