ನ್ಯೂಸ್ ನಾಟೌಟ್ : ಆ್ಯಪಲ್‌ ಕಂಪನಿ ಮಂಗಳವಾರ ಭಾರತದ ಕನಿಷ್ಠ ಐದು ಮಂದಿ ವಿಪಕ್ಷ ನಾಯಕರಿಗೆ ಎಚ್ಚರಿಕೆ ಸಂದೇಶವನ್ನು ರವಾನಿಸಿ ಅವರ ಐಫೋನ್‌ಗಳು “ಸರ್ಕಾರ ಪ್ರಾಯೋಜಿತ ದಾಳಿಕೋರರಿಂದ” ಗುರಿಯಾಗಿರಬಹುದೆಂದು ಮಾಹಿತಿ ನೀಡಿದೆ.
ತೃಣಮೂಲ ಕಾಂಗ್ರೆಸ್‌ ಸಂಸದೆ ಮಹುವಾ ಮೊಯಿತ್ರಾ, ಸಿಪಿಐ(ಎಂ) ನಾಯಕ ಸೀತಾರಾಂ ಯೆಚೂರಿ, ಕಾಂಗ್ರೆಸ್‌ ಕಾರ್ಯಕಾರಿ ಸಮಿತಿ ಸದಸ್ಯ ಪವನ್‌ ಖೇರಾ ಮತ್ತು ಶಿವಸೇನೆಯ (ಉದ್ಧವ್‌ ಬಣ) ರಾಜ್ಯಸಭಾ ಸಂಸದೆ ಪ್ರಿಯಾಂಕ ಚತುರ್ವೇದಿ ಈ ಎಚ್ಚರಿಕೆ ಸಂದೇಶಗಳನ್ನು ಬಂದಿದೆ ಎನ್ನಲಾಗಿದೆ.
ಸ್ಥಾಪಕ ಸಂಪಾದಕ ಸಿದ್ದಾರ್ಥ ವರದರಾಜನ್‌ ಹಾಗೂ ಆಪ್‌ ನಾಯಕ ರಾಘವ್‌ ಛಡ್ಡಾ ಅವರ ಫೋನ್‌ಗಳಿಗೂ ಈ ಸಂದೇಶ ಬಂದಿದೆ ಎನ್ನಲಾಗಿದೆ.
“ಸರ್ಕಾರ ಪ್ರವರ್ತಿತ ದಾಳಿಕೋರರಿಂದ ನಿಮ್ಮ ಸಾಧನ ದುರ್ಬಳಕೆಯಾದರೆ ಅವರು ನಿಮ್ಮ ಸೂಕ್ಷ್ಮ ಡೇಟಾ, ಸಂವಹನಗಳು, ಅಥವಾ ಕ್ಯಾಮೆರಾ ಮತ್ತು ಮೈಕ್ರೋಫೋನ್‌ಗೆ ಕೂಡ ಪ್ರವೇಶ ಪಡೆಯುವ ಸಾಧ್ಯತೆ ಇದೆ,” ಎಂದು ಸಂದೇಶದಲ್ಲಿ ಎಚ್ಚರಿಸಲಾಗಿದೆ. ಈ ಬಗ್ಗೆ ಸರ್ಕಾರ ಅಧಿಕೃತವಾಗಿ ಯಾವುದೇ ಮಾಹಿತಿ ನೀಡಿಲ್ಲ.
