ಸೋಮವಾರಪೇಟೆ: ಆಕಾಶದಲ್ಲಿ ಹಾರಾಡುತ್ತಿದ್ದ ಹೆಲಿಕಾಪ್ಟರ್ ವೊಂದು ಹಠಾತ್‌ ಶಾಲಾ ಮೈದಾನದಲ್ಲಿ ಇಳಿದಿದೆ. ಖಾಸಗಿ ಹೆಲಿಕಾಪ್ಟರ್ ಮಡಿಕೇರಿಗೆ ಪ್ರವಾಸಕ್ಕೆ ಬಂದಿದ್ದ ಕುಟುಂಬವೊಂದನ್ನು ಬೆಂಗಳೂರಿಗೆ ಕರೆದುಕೊಂಡು ಹೋಗಲು ಬಂದಿತ್ತು. ಹೀಗೆ ಬಂದ ಹೆಲಿಕಾಪ್ಟರ್ ಗೆ ಭಾನುವಾರ ಮಂಜು ಮುಸುಕಿದ ವಾತಾವರಣದಿಂದಾಗಿ ಸಂಚರಿಸುವುದಕ್ಕೆ ಕಷ್ಟವಾಗಿದೆ. ತಕ್ಷಣ ಮುಂದೆ ಪ್ರಯಾಣಿಸುವುದು ಅಪಾಯ ಎಂದು ಅರಿತುಕೊಂಡ ಪೈಲಟ್‌ ಮಧ್ಯಾಹ್ನ 1.30ಕ್ಕೆ ಕಾಪ್ಟರ್ ಅನ್ನು ಐಗೂರು ಶಾಲಾ ಮೈದಾನದಲ್ಲಿ ಇಳಿಸಿದ್ದಾರೆ. ತಕ್ಷಣ ಏನಾಯಿತೋ ಎಂದು ಸ್ಥಳೀಯರು ಓಡಿ ಬಂದಿದ್ದಾರೆ. ನಂತರ ಮಡಿಕೇರಿಯಿಂದ ಕಾರಿನಲ್ಲಿ ಬಂದ ಮಹಿಳೆ ಹಾಗೂ ಇಬ್ಬರು ಮಕ್ಕಳನ್ನು ಕರೆದುಕೊಂಡು ಅಲ್ಲಿಂದಲೇ ಹೆಲಿಕಾಪ್ಟರ್ ಬೆಂಗಳೂರಿನತ್ತ ಹಾರಿತು.
