ನ್ಯೂಸ್ ನಾಟೌಟ್‌: ವಾಹನದಲ್ಲಿ ಪ್ರಯಾಣಿಸುತ್ತಿದ್ದ ಕುಟುಂಬವೊಂದು ಗೂಗಲ್ ಮ್ಯಾಪ್ ಬಳಕೆ ಮಾಡಿ, ತಮ್ಮೂರನ್ನು ಸೇರಲು ಮ್ಯಾಪ್ ತೋರಿದ ಮಾರ್ಗವನ್ನು ಅನುಸರಿಸಿದ್ದಾರೆ. ಕಾಮಗಾರಿ ನಡೆಯುತ್ತಿದ್ದ ಫ್ಲೈ ಓವರ್ ಮೇಲೆ ಇವರ ಕಾರು ಸಾಗಿದೆ. ಇದು ಇದ್ದಕ್ಕಿದ್ದಂತೆ ರಸ್ತೆ ಅಂತ್ಯವಾಗಿ ಕಾರು ನಿಯಂತ್ರಣ ಸಿಗದೆ ಗುಂಡಿಗೆ ಬಿದ್ದು ಅಪಘಾತಕ್ಕೆ ಒಳಗಾಗಿದೆ.
ಉತ್ತರಪ್ರದೇಶದ ಮಹಾರಾಜ್‌ಗಂಜ್ ಜಿಲ್ಲೆಯ ಭಯ್ಯಾ ಫರೆಂಡಾದಲ್ಲಿ ಈ ಅಪಘಾತ ಸಂಭವಿಸಿದೆ. ಭಾರತ ಮತ್ತು ನೇಪಾಳ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ 24 (ಗೋರಖ್‌ಪುರ-ಸೋನೌಲಿ ರಸ್ತೆ) ರಲ್ಲಿ ನಿರ್ಮಾಣ ಮಾಡಲಾಗುತ್ತಿರುವ ಫ್ಲೈ ಓವರ್ ಮೇಲೆ ಕಾರು ತೆರಳುತ್ತಿತ್ತು.
ಫ್ಲೈಓವರ್ ನಿರ್ಮಾಣ ಕಾರ್ಯ ಸದ್ಯ ಪ್ರಗತಿಯಲ್ಲಿದೆ. ಸ್ಥಳೀಯ ಜನರ ಪ್ರಕಾರ, ಫ್ಲೈಓವರ್ ನ ಒಂದು ಭಾಗವು ಪೂರ್ಣಗೊಂಡಿದೆ. ಫ್ಲೈಓವರ್ ರಸ್ತೆ ಸಾಮಾನ್ಯ ಮತ್ತು ಬಳಕೆಗೆ ಯೋಗ್ಯವಾಗಿ ಕಂಡಿದೆ. ಆದರೆ, ಫ್ಲೈಓವರ್‌ನ ಇನ್ನೊಂದು ಬದಿಯು ಕಾಮಗಾರಿ ಇನ್ನೂ ಅಪೂರ್ಣವಾಗಿದೆ. ರಾತ್ರಿಯ ಕತ್ತಲೆಯಲ್ಲಿ ಈ ಕುರಿತು ಎಚ್ಚರಿಕೆಯ ಯಾವುದೇ ಬೋರ್ಡ್ ಗಳು ಸೂಚನೆಗಳು ಇಲ್ಲದೇ ಇರುವುದರಿಂದ ಈ ರೀತಿ ಅನಾಹುತ ಸಂಭವಿಸಿದೆ ಎಂದು ಹೇಳಿದ್ದಾರೆ.
ಜಿಲ್ಲಾಡಳಿತ ಈ ಅಪಘಾತ ಪ್ರಕರಣ ಕುರಿತು ತನಿಖೆ ಮಾಡುವಂತೆ ಆದೇಶಿಸಿದೆ. ಸಂಬಂಧಪಟ್ಟವರ ವಿರುದ್ಧ ಕ್ರಮಕ್ಕೆ ಸೂಚಿಸಲಾಗಿದೆ.
ಈ ನಡುವೆ ಫರೆಂಡ ಪೊಲೀಸ್ ಠಾಣೆಯ ಉಸ್ತುವಾರಿ ಪ್ರಶಾಂತ್ ಪಾಠಕ್ ಮಾತನಾಡಿ, ಬೆಳಗ್ಗೆ ಈ ಕುರಿತು ಮಾಹಿತಿ ಲಭ್ಯವಾಗಿದೆ. ಪೊಲೀಸರು ಬರುವ ಹೊತ್ತಿಗೆ ಕಾರನ್ನು ಕ್ರೇನ್ ಸಹಾಯದಿಂದ ಕೆಳಗೆ ಇಳಹಿಸಲಾಗಿತ್ತು, ಸಣ್ಣ ಪುಟ್ಟ ಗಾಯಗಳೊಂದಿಗೆ ಅವರನ್ನು ರಕ್ಷಿಸಲಾಗಿದೆ ಎಂದಿದ್ದಾರೆ.
