ನ್ಯೂಸ್ ನಾಟೌಟ್: ಬೃಹತ್ ಗಾತ್ರದ ಲೋಹದ ಸಿಲಿಂಡರ್ ಒಂದು ಪಶ್ಚಿಮ ಆಸ್ಟ್ರೇಲಿಯಾ ಸಮುದ್ರ ತೀರದಲ್ಲಿ ಪತ್ತೆಯಾಗಿದ್ದು, ರಾಕೆಟ್, ವಿಮಾನ ಅಥವಾ ಹಡಗಿನ ಬಿಡಿ ಭಾಗ ಆಗಿರಬಹುದೇ ಅನ್ನೋದೂ ಗೊತ್ತಾಗುತ್ತಿಲ್ಲ. ಹೀಗಾಗಿ, ಈ ನಿಗೂಢ ಹಾಗೂ ವಿಚಿತ್ರ ವಸ್ತುವಿನಿಂದ ದೂರ ಉಳಿಯುವಂತೆ ಪೊಲೀಸರು ಬೀಚ್‌ಗೆ ಬರುವ ಜನರಿಗೆ ಸೂಚನೆ ನೀಡುತ್ತಿದ್ದಾರೆ. ಈ ವಸ್ತುವಿನ ಸಮೀಪ ಸಾಗಿದ ವೇಳೆ ಅಪಾಯಕಾರಿ ಅನಿಲ ಅಥವಾ ಇನ್ಯಾವುದೇ ಆಪತ್ತು ಎದುರಾಗುವ ಭೀತಿ ಹಿನ್ನೆಲೆಯಲ್ಲಿ ಪೊಲೀಸರು ಈ ಕ್ರಮ ಕೈಗೊಂಡಿದ್ದಾರೆ ಎಂದು ವರದಿ ತಿಳಿಸಿದೆ.
ಸಮುದ್ರ ತೀರದಲ್ಲಿ ಪತ್ತೆಯಾಗಿರುವ ಈ ವಸ್ತು ಯಾವುದೇ ವಿಮಾನದ ಬಿಡಿ ಭಾಗದಂತೆ ಕಂಡು ಬರುತ್ತಿಲ್ಲ. ಹೀಗಾಗಿ, ಜನರೂ ಕೂಡಾ ಚಿತ್ರ ವಿಚಿತ್ರ ರೀತಿಯ ವಿಶ್ಲೇಷಣೆಗಳನ್ನು ಮಾಡುತ್ತಿದ್ದಾರೆ. ಕೆಲವರು ಈ ವಸ್ತುವನ್ನು ಅನ್ಯ ಗ್ರಹ ಜೀವಿಗಳ ವಾಹನ ಯುಎಫ್‌ಒ ಇರಬಹುದೇ ಎಂದೂ ಊಹಿಸುತ್ತಿದ್ದಾರೆ. ಇನ್ನೂ ಕೆಲವರು ಕೆಲ ವರ್ಷಗಳ ಹಿಂದೆ ಸಮುದ್ರದ ಮೇಲೆ ಹಾರುತ್ತಿದ್ದಾಗ ನಾಪತ್ತೆಯಾಗಿದ್ದ ಮಲೇಷ್ಯಾದ ವಿಮಾನದ ಬಿಡಿ ಭಾಗ ಇರಬಹುದೇ ಎನ್ನುತ್ತಿದ್ದಾರೆ.
ಈ ಬೃಹತ್ ಗಾತ್ರದ ಲೋಹದ ವಸ್ತುವಿನ ಮೂಲವೇನು ಎಂಬ ಕುರಿತಾಗಿ ತನಿಖೆ ನಡೆಯುತ್ತಿದೆ. ಹೀಗಾಗಿ, ಯಾವುದೇ ನಿರ್ಧಾರಕ್ಕೆ ಈಗಲೇ ಬರಲಾಗದು ಎಂದು ಪಶ್ಚಿಮ ಆಸ್ಟ್ರೇಲಿಯಾ ಪೊಲೀಸರು ತಮ್ಮ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ಜನರು ಈ ನಿಗೂಢ ವಸ್ತುವಿನ ಬಳಿ ಬಾರದಂತೆ ತಡೆಯಲು ಸ್ಥಳದಲ್ಲಿ ಪೊಲೀಸ್ ಬಿಗಿ ಭದ್ರತೆ ಕೈಗೊಳ್ಳಲಾಗಿದೆ.
ಆಸ್ಟ್ರೇಲಿಯಾದ ಇಂಡಿಪೆಂಡೆಂಟ್ ಪತ್ರಿಕೆಯಲ್ಲಿ ಈ ಕುರಿತಾಗಿ ವರದಿ ಪ್ರಕಟವಾಗಿದ್ದು, ಈ ವಿಚಿತ್ರ ವಸ್ತುವನ್ನು ನೋಡಲು ಜನರು ತಂಡೋಪತಂಡವಾಗಿ ಬೀಚ್‌ಗೆ ಹರಿದು ಬರುತ್ತಿದ್ದಾರೆ ಎನ್ನಲಾಗಿದೆ. ಆಸ್ಟ್ರೇಲಿಯಾ ಪಶ್ಚಿಮ ಕರಾವಳಿಯ ಗ್ರೀನ್ ಹೆಡ್ ಟೌನ್‌ನಲ್ಲಿ ಈ ಘಟನೆ ನಡೆದಿದ್ದು, ಇದೀಗ ಪೊಲೀಸರು ಸಮುದ್ರದಲ್ಲಿ ಸಿಕ್ಕಿರುವ ವಸ್ತುವಿನ ಮೂಲವೇನು? ಇದು ಅಪಾಯಕಾರಿಯೇ ಎಂಬೆಲ್ಲಾ ಪರೀಕ್ಷೆಗಳನ್ನು ನಡೆಸುತ್ತಿದ್ದಾರೆ.
ಇನ್ನು ಆಸ್ಟ್ರೇಲಿಯಾದ ಬಾಹ್ಯಾಕಾಶ ತಜ್ಞರೂ ಕೂಡಾ ಈ ಕುರಿತಾಗಿ ತನಿಖೆ ನಡೆಸಲು ಮುಂದಾಗಿದ್ದಾರೆ. ಈ ವಸ್ತು ಏನಿರಬಹುದು? ಯಾವುದಾದ್ರೂ ದೇಶದ ರಾಕೆಟ್‌ನ ಬಿಡಿ ಭಾಗ ಇರಬಹುದೇ? ಸಮುದ್ರಕ್ಕೆ ಬಿದ್ದ ವಸ್ತು ತೇಲಿಕೊಂಡು ಇಲ್ಲಿಯವರೆಗೂ ಬಂದಿರಬಹುದೇ ಎಂದು ವಿಶ್ಲೇಷಿಸಲಾಗುತ್ತಿದೆ. ಇದಕ್ಕಾಗಿ ವಿಶ್ವಾದ್ಯಂತ ಮಾಹಿತಿ ಸಂಗ್ರಹಿಸಲಾಗುತ್ತಿದೆ. ಕೆಲವರು ಈ ವಸ್ತುವು ಭಾರತದ ಚಂದ್ರಯಾನ 3ರ ಗಗನ ನೌಕೆ ಉಡಾಯಿಸಿದ ರಾಕೆಟ್‌ನ ಬಿಡಿ ಭಾಗ ಇರಬಹುದು ಎಂದೂ ವಿಶ್ಲೇಷಿಸುತ್ತಿದ್ದಾರೆ ಎನ್ನಲಾಗಿದೆ.
