ನ್ಯೂಸ್ ನಾಟೌಟ್: ಸಾವಿರ ಸುಳ್ಳು ಹೇಳಿ ಒಂದು ಮದುವೆ ಮಾಡು ಅನ್ನುವ ಮಾತಿದೆ. ಕೆಲವು ಸಲ ಒಂದು ಸುಳ್ಳಿನಿಂದ ಏನೆಲ್ಲ ಅನಾಹುತ ಸಂಭವಿಸುತ್ತದೆ ಅನ್ನುವುದಕ್ಕೆ ಇಲ್ಲೊಂದು ಪ್ರತ್ಯಕ್ಷ ಉದಾಹರಣೆಯನ್ನು ನಿಮ್ಮ ಮುಂದೆ ನಾವು ಇಡುತ್ತಿದ್ದೇವೆ.
ಇಲ್ಲೊಬ್ಬಳು ಎರಡು ಮಕ್ಕಳ ತಾಯಿ 54 ವರ್ಷದ ಮಹಿಳೆ ನಾನಿನ್ನೂ ಎಳೆ ಹುಡುಗಿ ಅನ್ನುತ್ತಲೇ 35 ವರ್ಷದ ಯುವಕನಿಗೆ ನೀರು ಕುಡಿಸಿದ್ದಾಳೆ. ಹುಡುಗನಿಗೆ ಈ ಸತ್ಯ ಅರ್ಥ ಆಗುವಷ್ಟರ ಹೊತ್ತಿಗೆ ಮೂರ್ಚೆ ಹೋಗುವುದು ಒಂದೇ ಬಾಕಿ…ಈ ಘಟನೆಯ ಇಂಟ್ರಸ್ಟಿಂಗ್ ಸ್ಟೋರಿ ಇಲ್ಲಿದೆ ಓದಿ..
ಆರು ವರ್ಷಗಳಿಂದ ಖಾಸಗಿ ಸಂಸ್ಥೆಯಲ್ಲಿ ಮ್ಯಾನೇಜರ್ ಆಗಿ ಕೆಲಸ ಮಾಡುತ್ತಿರುವ ವಿಚ್ಛೇದಿತ ಹುಡುಗ ಅವರ ತಾಯಿ ಇಂದ್ರಾಣಿ ಜೊತೆ ತಮಿಳುನಾಡಿನಲ್ಲಿ ವಾಸವಿದ್ದರು. ತಮ್ಮ ವಿಚ್ಛೇದಿತ 35 ವರ್ಷದ ಮಗನಿಗಾಗಿ ಹುಡುಗಿಯ ಹುಡುಕಾಟದಲ್ಲಿದ್ದ ಇಂದ್ರಾಣಿ ಅವರು ದಲ್ಲಾಳಿ ಮೂಲಕ ಆಂಧ್ರಪ್ರದೇಶದ ತಿರುಪತಿ ಜಿಲ್ಲೆಯ ಪುತ್ತೂರು ಮೂಲದ ಶರಣ್ಯ ಎಂಬ ವಧುವನ್ನು ಹುಡುಕಿದ್ದಾರೆ. ಮಾತುಕತೆಗೆ ಇಂದ್ರಾಣಿ ಕುಟುಂಬ ಹೋಗುತ್ತಿದ್ದಂತೆ ಇತ್ತ ಶರಣ್ಯ ಬ್ಯೂಟಿಪಾರ್ಲರ್ ಗೆ ಹೋಗಿ ಚೆನ್ನಾಗಿ ಮೇಕ್ ಅಪ್ ಮಾಡಿಸಿಕೊಂಡಿದ್ದಾಳೆ. ತನ್ನ ಮುಖದಲ್ಲಿದ್ದ ನೆರಿಗೆಯನ್ನು ಯಾರಿಗೂ ಕಾಣದಂತೆ ಮಾಡಿಸಿಕೊಂಡಿದ್ದಾಳೆ. ಅಜ್ಜಿ ಸುಂದರ ಯುವತಿಯಂತೆ ಹುಡುಗನ ಮುಂದೆ ಬಂದಿದ್ದಾಳೆ. ಈಕೆಯನ್ನು ನೋಡಲು ಬಂದ ಯುವಕ ವಾವ್…ವಾವ್ ಎಂದಿದ್ದಾನೆ. ಇಬ್ಬರಿಗು ಮದುವೆ ನಿಶ್ಚಯವಾಯಿತು. ಹುಡುಗ ರಾತ್ರಿಯೆಲ್ಲ ನಿದ್ದೆ ಬಿಟ್ಟು ತರುಣಿಯ ಬಗ್ಗೆ ಕನಸು ಕಂಡಿದ್ದಾನೆ. ಮದುವೆಯೂ ನಡೆದೇ ಬಿಟ್ಟಿತು. ಶರಣ್ಯಗೆ ಮದುವೆ ವೇಳೆ ಇಂದ್ರಾಣಿ 25 ಪವನ್ ಬಂಗಾರವನ್ನು ನೀಡಿದ್ದರು. ಆದರೆ ಮದುವೆ ಆದ ಕೆಲವೇ ದಿನಗಳಲ್ಲಿ ಶರಣ್ಯಾ ತನ್ನ ವರಸೆ ಬದಲಾಯಿಸಿದ್ದಾಳೆ, ಪತಿ ಮತ್ತು ಅತ್ತೆಗೆ ತಮ್ಮ ಆಸ್ತಿಯನ್ನು ತನ್ನ ಹೆಸರಿಗೆ ಮಾಡುವಂತೆ ಪೀಡಿಸಿದ್ದಾಳೆ. ಈಕೆಯ ಕಿರುಕುಳ ಸಹಿಸಲಾಗದೆ ಆಕೆಯ ಪತಿ ಶರಣ್ಯಳ ಹೆಸರಿಗೆ ಆಸ್ತಿ ವರ್ಗಾವಣೆಗೆ ಮುಂದಾಗಿದ್ದಾರೆ. ಆಸ್ತಿ ನೋಂದಾವಣಿ ವೇಳೆ ಶರಣ್ಯ ಆಧಾರ್ ಕಾರ್ಡ್ ನೀಡಿದ್ದು, ಅದರಲ್ಲಿ ಕೇರ್ ಆಫ್ ನಲ್ಲಿ ‘ರವಿ’ ಎಂಬ ಹಸರು ಇರುವುದನ್ನು ನೋಡಿ, ಇಂದ್ರಾಣಿ ಮತ್ತು ಅವರ ಮಗ ಶರಣ್ಯ ಮೇಲೆ ಅನುಮಾನಗೊಂಡು ಪೊಲೀಸರಿಗೆ ದೂರು ನೀಡಿದರು. ಈ ವೇಳೆ ಖತರ್ನಾಕ್ ಆಂಟಿಯ ಅಸಲಿ ಸತ್ಯಾಂಶ ಬಯಲಾಗಿದೆ. ಈ ಘಟನೆಯಿಂದ ಮದುವೆಯಾದ ಯುವಕನಿಗೆ ಕರೆಂಟ್ ಶಾಕ್ ಹೊಡೆದ ಅನುಭವ ಆಗಿದೆ, ಶರಣ್ಯ ವಿರುದ್ಧ ಪ್ರಕರಣ ದಾಖಲಾಗಿದೆ.
