ನ್ಯೂಸ್ ನಾಟೌಟ್: ಬಂಗಾಳಿ ರೂಪದರ್ಶಿ, ನಟಿ ಬಿದಿಶಾ ಡಿ ಮಜುಂದಾರ್ ಕೋಲ್ಕತ್ತಾದ ದಮ್ ಡಮ್ ನಲ್ಲಿರುವ ತಮ್ಮ ಅಪಾರ್ಟ್ ಮೆಂಟ್ ನಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.
21 ವರ್ಷದ ನಟಿ ಕಳೆದ ನಾಲ್ಕು ತಿಂಗಳಿನಿಂದ ಬಾಡಿಗೆ ಫ್ಲಾಟ್ ನಲ್ಲಿ ವಾಸಿಸುತ್ತಿದ್ದರು. ಮೇ 25ರ ಬುಧವಾರ ಸಂಜೆ ನಾಗರ್ ಬಜಾರ್ ಪ್ರದೇಶದಲ್ಲಿನ ಆಕೆಯ ಫ್ಲಾಟ್ ನಿಂದ ಪೊಲೀಸರು ಆಕೆಯ ಶವವನ್ನು ವಶಪಡಿಸಿಕೊಂಡಿದ್ದಾರೆ. ನೇಣು ಬಿಗಿದ ಸ್ಥಿತಿಯಲ್ಲಿ ಶವ ಪತ್ತೆಯಾಗಿದೆ. ಮೂಲಗಳ ಪ್ರಕಾರ, ಪೊಲೀಸರು ಬಿದಿಶಾ ಅವರ ಫ್ಲಾಟ್ ನಿಂದ ಡೆತ್ ನೋಟ್ ಸಹ ವಶಪಡಿಸಿಕೊಂಡಿದ್ದಾರೆ. ಮೃತ ಮಾಡೆಲ್ ಗೆ ಅನುಭಾಬ್ ಬೇರಾ ಎಂಬ ಗೆಳೆಯನಿದ್ದ. ಆತನ ಜೊತೆಗಿನ ಸಂಬಂಧದಿಂದಾಗಿ ಆಕೆ ಖಿನ್ನತೆಗೆ ಒಳಗಾಗಿದ್ದಳು ಎಂದು ಆಕೆಯ ಸ್ನೇಹಿತರು ಹೇಳಿಕೊಂಡಿದ್ದಾರೆ. ಮಾಡೆಲಿಂಗ್ ಉದ್ಯಮದಲ್ಲಿ ಪರಿಚಿತ ಮುಖವಾಗಿರುವ ಬಿದಿಶಾ ಡಿ ಮಜುಂದಾರ್ ಅವರು 2021ರಲ್ಲಿ ಅನಿರ್ಬೇಡ್ ಚಟ್ಟೋಪಾಧ್ಯಾಯ ನಿರ್ದೇಶನದ ಭಾರ್-ದಿ ಕ್ಲೌನ್ ಎಂಬ ಕಿರುಚಿತ್ರದಲ್ಲಿ ತಮ್ಮ ನಟನೆಯನ್ನು ಪ್ರಾರಂಭಿಸಿದರು. ಜನಪ್ರಿಯ ನಟ ದೇಬ್ರಾಜ್ ಮುಖರ್ಜಿ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
