ನ್ಯೂಸ್ ನಾಟೌಟ್‌ : ನಟ ಉಪೇಂದ್ರ ಅವರು ಯಾವುದೇ ಚಿತ್ರವನ್ನು ಹೊರ ತಂದರೂ ಅದರಲ್ಲೇನೋ ವಿಭಿನ್ನತೆ ಇರುತ್ತೆ. ಭರ್ಜರಿ ಮನರಂಜನೆ ಸಿಗುತ್ತೆ. ಹೀಗಾಗಿ ಅವರು ತುಂಬಾ ಸಮಯ ತೆಗೆದುಕೊಂಡು ಮಾಡುವ ಚಿತ್ರಗಳು ಪ್ರೇಕ್ಷಕರಿಗೂ ಅದು ತುಂಬಾ ಇಷ್ಟವಾಗುತ್ತೆ. ಸದ್ಯ ಉಪೇಂದ್ರ ಅಭಿನಯಿಸಿ, ನಿರ್ದೇಶಿಸುತ್ತಿರುವ “ಯುಐ’ ಸಿನಿಮಾದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಭರದಿಂದ ನಡೆಯುತ್ತಿದೆ. ಇದೀಗ “ಪ್ರೇಮಿಗಳ ದಿನ’ವಾಗಿರುವ ಫೆ. 14ರಂದು “ಯುಐ’ ಸಿನಿಮಾದ ಮೊದಲ ಹಾಡನ್ನು ಬಿಡುಗಡೆ ಮಾಡಲು ಚಿತ್ರತಂಡ ಪ್ಲಾನ್‌ ಮಾಡಿಕೊಂಡಿದೆ.
ಕೆಲ ದಿನಗಳ ಹಿಂದಷ್ಟೇ ಸಿನಿಮಾದ ಟೀಸರ್‌ ಅನ್ನು ಬಿಡುಗಡೆಗೊಳಿಸಿತ್ತು. ಈ ಟೀಸರ್‌ಗೆ ನಿರೀಕ್ಷೆಗೂ ಮೀರಿದ ಪ್ರತಿಕ್ರಿಯೆ ಸಿಕ್ಕಿದ್ದು, ಇದೀಗ “ಯುಐ’ ಚಿತ್ರತಂಡ ಸಿನಿಮಾದ ಮೊದಲ ಹಾಡನ್ನು ಬಿಡುಗಡೆ ಮಾಡುವ ಯೋಜನೆ ಹಾಕಿಕೊಂಡಿದೆ. ಎರಡು ದಿನಗಳ ಮುಂಚೆಯೇ ಈ ಬಗ್ಗೆ ಸೋಶಿಯಲ್‌ ಮೀಡಿಯಾದಲ್ಲಿ ಸ್ವತಃ ಮಾಹಿತಿ ಹಂಚಿಕೊಂಡಿರುವ “ಯುಐ’ ಸಿನಿಮಾದ ನಾಯಕ ನಟ ಕಂ ನಿರ್ದೇಶಕ ಉಪೇಂದ್ರ, “ಪ್ರೇಮಿಗಳ ದಿನ’ದ ಅಂಗವಾಗಿ “ಯುಐ’ ಸಿನಿಮಾದ ಮೊದಲ ಹಾಡು ಫೆ.14 ರ ಬೆಳಿಗ್ಗೆ 10 ಗಂಟೆಗೆ “ಫಸ್ಟ್ ಸಿಂಗಲ್‌ ಪ್ರೊಮೋ’ ಬಿಡುಗಡೆ ಯಾಗುತ್ತಿರುವುದಾಗಿ ಘೋಷಿಸಿದ್ದಾರೆ.
ಅಲ್ಲದೆ ಇದೇ ಸಂದರ್ಭದಲ್ಲಿ “ಯುಐ’ ಸಿನಿಮಾದ ಹೊಚ್ಚ ಹೊಸ ಪೋಸ್ಟರ್‌ ಅನ್ನು ಕೂಡ ಬಿಡುಗಡೆ ಮಾಡಿದ್ದಾರೆ. ಈ ಪೋಸ್ಟರ್‌ನಲ್ಲಿ ಉಪೇಂದ್ರ ವಿಚಿತ್ರ ಗೆಟಪ್‌ ಸಹಜವಾಗಿಯೇ ಅಭಿಮಾನಿಗಳ ಕುತೂಹಲ ಕೆರಳಿಸಲು ಯಶಸ್ವಿಯಾಗಿದ್ದು, ಸದ್ಯ ಉಪ್ಪಿ ಅಭಿಮಾನಿಗಳ ಚಿತ್ತ “ಯುಐ’ ಹಾಡಿನತ್ತ ನೆಟ್ಟಿದೆ.ಇನ್ನು ಈ ಚಿತ್ರ ಹೇಗಿರುತ್ತೆ ಅನ್ನೋದಕ್ಕೆ ನೀವು ಸ್ವಲ್ಪ ದಿನ ಕಾಯಲೇ ಬೇಕಾಗಿದೆ.
