ನ್ಯೂಸ್ ನಾಟೌಟ್: ಬಾಲಿವುಡ್‌ನ ಖ್ಯಾತ ನಟ ಪ್ರಶಸ್ತಿ ಪಡೆದುಕೊಳ್ಳಲು ಹಣ ನೀಡಲು ಮುಂದಾಗಿದ್ದರು ಎಂಬ ಸುದ್ದಿ ಹರಿದಾಡುತ್ತಿದೆ. ಈ ಬಗ್ಗೆ ಸ್ವತಃ ಆ ಖ್ಯಾತ ನಟನೇ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ ಎನ್ನಲಾಗಿದೆ.
ಈ ಹಿಂದೆಯೂ ಒಬ್ಬ ನಟ ತನಗಾಗಿ ಪ್ರಶಸ್ತಿಗಳನ್ನು ಖರೀದಿಸಿದ ಆರೋಪಕ್ಕೆ ಗುರಿಯಾದ ಉದಾಹರಣೆಗಳಿವೆ. ನಾನು ಸಹ ಹೀಗೆ ಪ್ರಶಸ್ತಿಯನ್ನು ಪಡೆಯಲು ಹಣವನ್ನು ನೀಡಲು ಮುಂದಾಗಿದ್ದೆ ಎಂದು ಬಾಲಿವುಡ್‌ನ ಬಾದ್‌ಷಾ ಶಾರೂಕ್ ಖಾನ್ ಈ ಹಿಂದೆ ಹೇಳಿದ್ದರು.
2023ರಲ್ಲಿ ಮೂರು ಬ್ಲಾಕ್‌ಬಸ್ಟರ್‌ಗಳನ್ನು ನೀಡಿದ ಭಾರತೀಯ ಚಿತ್ರರಂಗದ ದೊಡ್ಡ ಸೂಪರ್‌ಸ್ಟಾರ್, ಒಮ್ಮೆ ತಾನು ಎಡಿಟರ್‌ಗೆ ಹೋಗಿ ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಪಡೆಯಲು ಲಂಚ ನೀಡಿದ್ದೇನೆ ಎಂದು ಒಪ್ಪಿಕೊಂಡಿದ್ದರು. 90 ರ ದಶಕದ ಆರಂಭದಲ್ಲಿ, ಶಾರೂಕ್ ಖಾನ್ ರಜತ್ ಶರ್ಮಾ ಅವರ ಆಪ್ ಕಿ ಅದಾಲತ್‌ನಲ್ಲಿ ತಮ್ಮ ತಪ್ಪನ್ನು ಒಪ್ಪಿಕೊಂಡರು. ವೈರಲ್ ಕ್ಲಿಪ್‌ನಲ್ಲಿ, ಶಾರುಖ್ ಖಾನ್ ಅವರನ್ನು ಪ್ರಶಸ್ತಿ ಖರೀದಿಸಲು ನೀವು ಹಣವನ್ನು ನೀಡಿದ್ದೀರಾ ಎಂದು ಕೇಳಲಾಯಿತು. ಆಗ ನಟ ಹೌದು ಎಂದು ಒಪ್ಪಿಕೊಂಡರು.
‘ಒಬ್ಬ ವ್ಯಕ್ತಿ ಯಾವುದನ್ನಾದರೂ ಪಡೆಯಬೇಕೆಂದು ಬಯಸಿದರೆ ಅದಕ್ಕಾಗಿ ಕೆಟ್ಟ ದಾರಿಯನ್ನು ಸಹ ಹಿಡಿಯಲು ಹಿಂಜರಿಯುವುದಿಲ್ಲ’ ಎಂದು ಶಾರೂಕ್ ಹೇಳಿದರು. ‘ನಾನು ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಪಡೆಯಲು ತುಂಬಾ ಉತ್ಸುಕನಾಗಿದ್ದೆ. ಏಕೆಂದರೆ ನಾನು ಅದಕ್ಕೆ ಅರ್ಹನಿದ್ದೇನೆ ಎಂದು ನನಗೆ ತಿಳಿದಿತ್ತು.
ಆದರೆ ನನಗೆ ಪ್ರಶಸ್ತಿ ಸಿಗುವುದಿಲ್ಲ ಎಂದು ನನಗೆ ಗೊತ್ತಾಯಿತು. ಹೀಗಾಗಿ ನಾನು ಸಂಪಾದಕರಿಗೆ ಹಣ ನೀಡಿಯಾದರೂ ಪ್ರಶಸ್ತಿ ಪಡೆಯಬೇಕು ಎಂದು ಭಾವಿಸಿದೆ’ ಎಂದು ಶಾರೂಕ್ ತಿಳಿಸಿದರು.
ಈ ಘಟನೆಯ ನಂತರ, ಶಾರೂಕ್ ಅತ್ಯುತ್ತಮ ನಟ ಪ್ರಶಸ್ತಿಯನ್ನು ಗೆದ್ದರು. ಸಾರ್ವಜನಿಕವಾಗಿ ಸಂಪಾದಕರಲ್ಲಿ ಕ್ಷಮೆಯಾಚಿಸಿದರು ಎನ್ನಲಾಗಿದೆ.
