ನ್ಯೂಸ್ ನಾಟೌಟ್: ಹಾಲಿವುಡ್‌ ಸಿನಿಮಾಗಳ ರೀತಿಯಲ್ಲಿ ನಡೆದ ಕಳ್ಳತನ ಪ್ರಕರಣವೊಂದು ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ವರದಿಯಾಗಿದೆ. ಇಲ್ಲಿನ ಕಲಾ ಗ್ಯಾಲರಿ ಒಂದರಲ್ಲಿ ಇಡಲಾಗಿದ್ದ ಶತಮಾನಗಳಷ್ಟು ಹಳೆಯ ಬುದ್ಧನ ಪ್ರತಿಮೆಯನ್ನು ಕಳ್ಳನೊಬ್ಬ ದೋಚಿದ್ದಾರೆ. ಜಪಾನ್ ದೇಶದ ಮೂಲದ್ದು ಎನ್ನಲಾದ ಬುದ್ಧನ ಈ ಕಂಚಿನ ಪ್ರತಿಮೆಯ ಮೌಲ್ಯ ಸುಮಾರು 12.5 ಕೋಟಿ ಎಂದು ಅಂದಾಜು ಮಾಡಲಾಗಿದೆ.
ಪ್ರಕರಣ ಸಂಬಂಧ ತನಿಖೆ ನಡೆಸುತ್ತಿರುವ ಲಾಸ್ ಏಂಜಲಿಸ್ ನಗರದ ಪೊಲೀಸರು ಇದೀಗ ಮಾಧ್ಯಮಗಳಿಗೆ ಮಾಹಿತಿ ಬಹಿರಂಗ ಮಾಡಿದ್ದಾರೆ. ಲಾಸ್ ಏಂಜಲೀಸ್‌ ನಗರದ ಬೆವರ್ಲಿ ಗ್ರೋವ್ ಪ್ರದೇಶದಲ್ಲಿ ಇರುವ ಬರಾಕಾಟ್ ಕಲಾ ಗ್ಯಾಲರಿಯಲ್ಲಿ ಸೆಪ್ಟೆಂಬರ್ 18 ರಂದು ಬೆಳಗಿನ ಜಾವ 3.45ರ ಸುಮಾರಿಗೆ ಕಳ್ಳತನ ಮಾಡಲಾಗಿದೆ.
ಒಬ್ಬನೇ ಒಬ್ಬ ಕಳ್ಳ ಈ ಕೃತ್ಯ ಎಸಗಿದ್ದು, ಬುದ್ಧನ ಪ್ರತಿಮೆ ಕಳ್ಳತನ ಮಾಡುವ ವೇಳೆ ಈತನಿಗೆ ಈ ಗ್ಯಾಲರಿಯಲ್ಲಿ ಸಿಸಿಟಿವಿ ಇದೆ ಅನ್ನೋದು ಗೊತ್ತಿತ್ತು.
ಸಿಸಿಟಿವಿಗೆ ಯಾವುದೇ ರೀತಿಯ ಹಾನಿಯನ್ನೂ ಈ ದುಷ್ಕರ್ಮಿ ಮಾಡಿಲ್ಲ. ಮೊದಲಿಗೆ ಪ್ರವೇಶ ದ್ವಾರವನ್ನು ಮುರಿದು ಒಳ ನುಗ್ಗಿದ ಈ ಕಳ್ಳ, ದೊಡ್ಡದೊಂದು ಟ್ರಾಲಿ ರೀತಿಯ ಸಾಧನವನ್ನು ಒಳಗೆ ತಂದು ವಿಗ್ರಹವನ್ನು ಅದರಲ್ಲಿ ಇಟ್ಟಿದ್ದಾನೆ. ನಂತರ ತನ್ನ ವಾಹನದವರೆಗೂ ಈ ಟ್ರಾಲಿಯನ್ನು ತಳ್ಳಿಕೊಂಡು ಹೋಗಿ ವಿಗ್ರಹವನ್ನು ಲಾರಿಯೊಳಗೆ ಇಟ್ಟು ಪರಾರಿಯಾಗಿದ್ದಾನೆ.
ಒಟ್ಟು 25 ನಿಮಿಷಗಳ ಕಾಲ ಈ ಕಳ್ಳ ನಡೆಸಿದ ಕರಾಮತ್ತು ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಭಾರೀ ಗಾತ್ರದ ಹಾಗೂ ಅತಿ ಹೆಚ್ಚು ತೂಕದ ವಿಗ್ರಹವನ್ನು ಒಬ್ಬನೇ ಕಳ್ಳ ಹೇಗೆ ಕಳ್ಳತನ ಮಾಡಿದ ಅನ್ನೋದು ಪೊಲೀಸರಿಗೂ ತಲೆನೋವಾಗಿ ಪರಿಣಮಿಸಿದ್ದು, ಕನಿಷ್ಟ 4 ಅಡಿ ಎತ್ತರ ವಿಗ್ರಹ, ಬುದ್ಧನ ಅತ್ಯಂತ ಅಪರೂಪದ ಕಲಾಕೃತಿಗಳಲ್ಲಿ ಒಂದು. ಜಪಾನ್ ದೇಶದಲ್ಲಿ 1603 – 1867ರ ನಡುವೆ ಈ ವಿಗ್ರಹವನ್ನು ನಿರ್ಮಿಸಿರಬಹುದು ಎಂಬ ಅಂದಾಜಿಸಿದೆ. ಜಪಾನ್‌ನ ದೇಗುಲವೊಂದರ ಗರ್ಭ ಗೃಹದಲ್ಲಿ ಈ ಮೂರ್ತಿ ಇರಿಸಲಾಗಿತ್ತು ಎಂದು ನಂಬಲಾಗಿದೆ.
ಭಗವಾನ್ ಬುದ್ದ ವಜ್ರ ಮುದ್ರೆಯಲ್ಲಿ ಇರುವ ಈ ವಿಗ್ರಹವು ಅತ್ಯಂತ ಅಪರೂಪವಾದದ್ದು. ಇದೀಗ ಲಾಸ್ ಏಂಜಲಿಸ್ ನಗರ ಪೊಲೀಸರು ಬುದ್ಧನ ವಿಗ್ರಹ ಹೊತ್ತೊಯ್ದಿರುವ ಕಳ್ಳತನ ಪತ್ತೆಗೆ ತನಿಖೆ ಆರಂಭಿಸಿದ್ದಾರೆ.
