ನ್ಯೂಸ್ ನಾಟೌಟ್ : ಹಾರಂಗಿ ನಾಲೆಗೆ ಏಡಿ ಹಿಡಿಯಲೆಂದು ಹೋದ ಬಾಲಕ ಕಣ್ಮರೆಯಾದ ಘಟನೆ ಕೊಡಗು ಜಿಲ್ಲೆಯ ಕುಶಾಲ ನಗರ ತಾಲೂಕಿನ ಬ್ಯಾಡಗೊಟ್ಟದಲ್ಲಿಂದ ವರದಿಯಾಗಿದೆ. ಹಾರಂಗಿ ನಾಲೆಗೆ (Harangi Channel) ಬಿದ್ದು ಒಬ್ಬ ಬಾಲಕ ಕಣ್ಮರೆಯಾಗಿದ್ದಾನೆಂದು ತಿಳಿದು ಬಂದಿದೆ.
ಬ್ಯಾಡಗೊಟ್ಟದಲ್ಲಿರುವ ದಿಡ್ಡಳ್ಳಿ ನಿರಾಶ್ರಿತರ ಕೇಂದ್ರ ಬಳಿ ಈ ಘಟನೆ ನಡೆದಿದ್ದು,ಸದ್ಗುರು ಅಪ್ಪಯ್ಯ ಸ್ವಾಮಿ ಶಾಲೆಯ ಬಾಲಕ ಅನಿತ್ ನೀರುಪಾಲಾದವನು ಎಂದು ತಿಳಿದು ಬಂದಿದೆ. ಇಲ್ಲಿನ ನಿರಾಶ್ರಿತರ ಕೇಂದ್ರದ ಸಮೀಪದಲ್ಲೇ ಹಾರಂಗಿ ನಾಲೆ ಹಾದುಹೋಗಿದ್ದು, ಆತಂಕದ ವಾತಾವರಣ ನಿರ್ಮಾಣವಾಗಿದೆ.
ಬುಧವಾರ ಬೆಳಗ್ಗೆ ನಾಲೆಯಲ್ಲಿ ಏಡಿ ಹಿಡಿಯಲು ಹೋದ ಸಂದರ್ಭ ಬಾಲಕ ನೀರುಪಾಲಾಗಿದ್ದಾನೆಂದು ತಿಳಿದು ಬಂದಿದೆ. ಆತನಿಗಾಗಿ ಎಲ್ಲ ಕಡೆ ಹುಡುಕಾಟ ನಡೆದಿದ್ದು ಶಕ್ತಿ ಮೀರಿ ಪ್ರಯತ್ನ ಮಾಡಲಾಗುತ್ತಿದೆ.ಊರಿನ ಜನರು ಹಾಗೂ ಕುಟುಂಬಸ್ಥರು ಸ್ಥಳದಲ್ಲಿದ್ದು, ಬಾಲಕನಿಗಾಗಿ ಪ್ರಾರ್ಥಿಸುತ್ತಿದ್ದಾರೆ. ಇದೀಗ ಜಲಾಶಯದಿಂದ ನಾಲೆಗೆ ಬರುವ ನೀರನ್ನು ಸ್ಥಗಿತಗೊಳಿಸಿ ಬಾಲಕನಿಗಾಗಿ ಶೋಧ ಕಾರ್ಯಾಚರಣೆ ನಡೆದಿದೆ.
