ನ್ಯೂಸ್ ನಾಟೌಟ್ : ಕಡಬ ತಾಲೂಕಿನಲ್ಲಿ ಮತ್ತೆ ಕಾಡಾನೆಯೊಂದು ಕಾಣಿಸಿಕೊಂಡಿದೆ.ಸುಬ್ರಹ್ಮಣ್ಯ –ಗುಂಡ್ಯ ರಾಜ್ಯ ಹೆದ್ದಾರಿ ಬದಿಯಲ್ಲಿ ಕಾಡಾನೆ ಪ್ರತ್ಯಕ್ಷವಾಗಿದ್ದು,ಅದು ಅನಾರೋಗ್ಯಕ್ಕೀಡಾಗಿರುವ ಶಂಕೆ ವ್ಯಕ್ತವಾಗಿದೆ.
ಕಾಡಾನೆ ಹೆದ್ದಾರಿ ದಾಟುವ ವಿಡಿಯೋ ಇದ್ದು, ಅದು ಈಗ ವೈರಲ್ ಆಗಿದೆ.ಕುಂಟುತ್ತಾ ನಡೆಯುತ್ತಿರುವ ಆನೆಯ ಎಡಕಾಲಿಗೆ ಬಲವಾದ ಗಾಯವಾದಂತೆ ಕಾಣಿಸುತ್ತಿದೆ. ಭಾನುವಾರ ಸಂಜೆಯಿಂದ ರಾತ್ರಿ ವರೆಗೆ ಬಿಳಿನೆಲೆ ಭಾಗದ ಚೇರು ಪರಿಸರದಲ್ಲಿ ಸಂಚರಿಸಿರುವ ಕಾಡಾನೆ ಸೋಮವಾರ ಬೆಳಗ್ಗೆ ಎರ್ಮಾಯಿಲ್‌ ಭಾಗದಲ್ಲಿ ಕಾಣಸಿಕ್ಕಿದೆ. ಅಸ್ವಸ್ಥಗೊಂಡಿರುವಂತೆ ಕಾಣಿಸುತ್ತಿರುವ ಆನೆ ಭಾರಿ ಕಷ್ಟ ಪಟ್ಟು ನಡೆದಾಡುತ್ತಿದೆ.
ಅದಕ್ಕೆ ಆಹಾರವೂ ಹೊಟ್ಟೆ ಸೇರದೇ ಚಡಪಡಿಸುತ್ತಿದೆ. ತಿಂದ ಆಹಾರವನ್ನು ಜಗಿದು ಅಲ್ಲಲ್ಲೇ ಉಗುಳಿ ಹೋಗುತ್ತಿದ್ದು, ಅರಣ್ಯ ಇಲಾಖೆ ಗಮನ ಹರಿಸುವಂತೆ ಸ್ಥಳೀಯರು ತಿಳಿಸಿದ್ದಾರೆ.
