ಅಪಘಾತಕ್ಕೆ ಸಿಲುಕಿದ್ದ ಯುವಕನ ಪ್ರಾಣ ರಕ್ಷಿಸಿದ ಹಿಂದೂ ಕಾರ್ಯಕರ್ತ, ಅಪರಿಚಿತನ ಪ್ರಾಣ ರಕ್ಷಿಸಲು ಗೆಳೆಯರಿಂದ ಹಣ ಸಂಗ್ರಹಿಸಿದ ಯುವಕನಿಗೆ ಎಲ್ಲೆಡೆಯಿಂದ ಪ್ರಶಂಸೆ

ನ್ಯೂಸ್ ನಾಟೌಟ್: ಯಾರಿಗಾದರೂ ರಸ್ತೆಯಲ್ಲಿಅಪಘಾತ ಸಂಭವಿಸಿದ್ದರೆ ನಮಗ್ಯಾಕೆ ಉಸಾಬರಿ ಎಂದು ಸುಮ್ಮನಾಗುವ ಜನರ ನಡುವೆ ಇಲ್ಲೊಬ್ಬ ಯುವಕ ವಿಭಿನ್ನವಾಗಿ ನಿಲ್ಲುತ್ತಾರೆ. ತನ್ನದೇ ಆಟೋ ರಿಕ್ಷಾದಲ್ಲಿ ಬಿದ್ದಿದ್ದ ಗಾಯಾಳುವನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಿದ್ದಲ್ಲದೆ ಸಂಪೂರ್ಣ ವೆಚ್ಚವನ್ನು ಕೂಡ ಭರಿಸಿ ಸುದ್ದಿಯಾಗಿದ್ದಾರೆ. ಈತನ ಸಾಧನೆಗೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗಿದೆ.

30.03.2023ನೇ ಗುರುವಾರ ಕುಕ್ಕುಜಡ್ಕ ಸುಳ್ಯ ರಸ್ತೆಯಲ್ಲಿ ಪಂಜದ ಯುವಕನೊಬ್ಬನ ಬೈಕ್ ಸ್ಕಿಡ್ ಆಗಿ ಕೆಳಕ್ಕೆ ಬಿದ್ದಿತ್ತು. ಸವಾರನಿಗೆ ಗಂಭೀರ ಗಾಯಗಳಾಗಿದ್ದವು. ಈ ವೇಳೆ ಇದೇ ರಸ್ತೆಯಲ್ಲಿ ಬರುತ್ತಿದ್ದ ವಿಶ್ವ ಹಿಂದೂ ಪರಿಷತ್ ಬಜರಂಗ ದಳ ವಜ್ರಕಾಯ ಚೊಕ್ಕಾಡಿ ಪದವು ಕಾರ್ಯಕರ್ತ ಪುನೀತ್‌ ಕುಕ್ಕುಜಡ್ಕ ಗಮನಿಸಿದ್ದಾರೆ. ಗಾಯಾಳುವಿಗೆ ಪ್ರಥಮ ಚಿಕಿತ್ಸೆ ಕೊಡಿಸಿದ ಅವರು ಹೆಚ್ಚಿನ ಚಿಕಿತ್ಸೆಗಾಗಿ ತನ್ನದೇ ಆಟೋದಲ್ಲಿ ಸುಳ್ಯದ ಕೆವಿಜಿ ಆಸ್ಪತ್ರೆಗೆ ಕರೆದುಕೊಂಡು ಬಂದಿದ್ದಾರೆ. ಈ ವೇಳೆ ಗಾಯಾಳು ಯುವಕನ ಚಿಕಿತ್ಸೆ ವೆಚ್ಚವನ್ನು ಭರಿಸಲು ಹಣದ ಅಗತ್ಯ ಇರುತ್ತದೆ, ಇದನ್ನು ಕೊಡುವುದಕ್ಕೆ ಪುನೀತ್‌ ಕುಕ್ಕುಜಡ್ಕ ಅವರ ಬಳಿಯೂ ಹೆಚ್ಚು ಹಣ ಇರುವುದಿಲ್ಲ. ತಕ್ಷಣ ಅವರು ತನ್ನ ಗೆಳೆಯರಿಗೆ ಫೋನ್ ಮಾಡಿ ಅಗತ್ಯವಾಗಿದ್ದ ಹೆಚ್ಚಿನ ಹಣವನ್ನು ಸಿದ್ಧಪಡಿಸುತ್ತಾರೆ. ಗುರುತು ಪರಿಚಯ ಇಲ್ಲದ ವ್ಯಕ್ತಿಯ ಒಂದು ಜೀವ ಉಳಿಸಲು ಪುನೀತ್‌ ಕುಕ್ಕುಜಡ್ಕ ಮಾಡಿದ ಪ್ರಯತ್ನಕ್ಕೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗಿದೆ.