ನ್ಯೂಸ್ ನಾಟೌಟ್ : ಅಣ್ಣನ ವಿರುದ್ಧವೇ ತಮ್ಮನಿಂದ ಪೊಲೀಸ್ ಠಾಣೆಗೆ ದೂರು ನೀಡಿದ ಘಟನೆ ಧರ್ಮಸ್ಥಳ ಸಮೀಪದ ನಿಡ್ಲೆ ಎಂಬಲ್ಲಿ ನಡೆದಿದೆ. ಅಣ್ಣನಾದ ಲಕ್ಷ್ಮಣ ಗೌಡ ಎಂಬವರು ತಮ್ಮನಾದ ಡೀಕಯ್ಯ ಗೌಡ ಎಂಬವರಿಗೆ ದುಡುಕಿನ ನಿರ್ಧಾರ ತೆಗೆದುಕೊಂಡು ಗುಂಡು ಹಾರಾಟ ಮಾಡಿದ್ದು, ಇದರಿಂದ ತಮ್ಮ ಡೀಕಯ್ಯ ಗೌಡರಿಗೆ ಕೈ ಮತ್ತು ಕಾಲಿಗೆ ಬಲವಾದ ಏಟಾಗಿದೆ ಎಂದು ತಿಳಿದು ಬಂದಿದೆ.ಕೂಡಲೇ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಯಿತು.
ವ್ಯಕ್ತಿಯೋರ್ವರು ಪರವಾನಿಗೆ ಹೊಂದಿರುವ ಕೋವಿಯನ್ನು ಸಿಡಿಸಿದ್ದು, ಗಾಯಗೊಂಡಿರುವ ವ್ಯಕ್ತಿ ಠಾಣೆಗೆ ದೂರು ನೀಡಿದ ಘಟನೆ ನಡೆದಿದೆ.ಬೆಳ್ತಂಗಡಿ ನಿಡ್ಲೆ ನೂಜಿಲ ನಿವಾಸಿ ಡೀಕಯ್ಯ ರವರು ಅವರ ಸಹೋದರ ಬೆಳ್ತಂಗಡಿ ನಿಡ್ಲೆ ನೂಜಿಲ ನಿವಾಸಿಲಕ್ಷ್ಮಣ ಗೌಡ ರವರ ವಿರುದ್ಧ ಠಾಣೆಗೆ ದೂರು ನೀಡಿದ್ದಾರೆ.
ಮಾ.2 ರಂದು ರಾತ್ರಿ ಅಣ್ಣನಾದ ಲಕ್ಷ್ಮಣ ಗೌಡ ರವರ ಮನೆಗೆ ಡೀಕಯ್ಯ ರವರು ಬಂದಿದ್ದಾರೆ. ರಾತ್ರಿ ವೇಳೆ ನಾಯಿಗಳು ಎಡಬಿಡದೇ ಬೊಗಳುತ್ತಿರುವುದನ್ನು ಗಮನಿಸಿದ ಲಕ್ಷ್ಮಣ ಗೌಡ ರವರು ತನ್ನ ಜಮೀನಿಗೆ ಬರುತ್ತಿರುವ ಕಾಡು ಪ್ರಾಣಿಗಳನ್ನು ಹೆದರಿಸಲು ಪರವಾನಿಗೆ ಹೊಂದಿರುವ ಎಸ್‌ಬಿಬಿಎಲ್ ತೋಟೆ ಕೋವಿಯನ್ನು ತೆಗೆದುಕೊಂಡು ಬರುತ್ತಾರೆ. ಅದಕ್ಕೆ ಮದ್ದುಗುಂಡನ್ನು ತುಂಬಿಸಿ ತನ್ನ ತಮ್ಮ ಡೀಕಯ್ಯ ರವರು ಅಂಗಳದಲ್ಲಿ ಇರುವಾಗಲೇ ಅವರು ಗುಂಡು ಹಾರಾಟ ಮಾಡಿದ್ದಾರೆ.
ಆದರೆ ಅಣ್ಣನಾದ ಲಕ್ಷ್ಮಣ ಗೌಡ ಅವರು ಉದ್ದೇಶಪೂರ್ವಕವಾಗಿ ಈ ಕೃತ್ಯವನ್ನು ಮಾಡಿಲ್ಲವೆಂದು ಮೇಲ್ನೋಟಕ್ಕೆ ತಿಳಿದು ಬಂದಿದೆ.ಡೀಕಯ್ಯ ಎಂಬುವವರು ತನ್ನ ಮನೆಗೆ ಬಂದಿರುವುದು ಅಣ್ಣನಿಗೆ ತಿಳಿದಿರಲಿಲ್ಲ. ಜತೆಗೆ ಅಂಗಳದಲ್ಲಿ ನಿಂತಿರುವುದನ್ನು ಗಮನಿಸದೇ ದುಡುಕತನದಿಂದ ಮನೆಯ ಮುಂದುಗಡೆ ಇರುವ ತೋಟದ ಕಡೆ ಗುರಿ ಇಟ್ಟು ಕೋವಿಯನ್ನು ಸಿಡಿಸಿದ್ದಾರೆ. ಈ ವೇಳೆ ಚಿಕ್ಕ 2 ಗುಂಡುಗಳು ಡೀಕಯ್ಯ ಅವರ ಬಲಕೈಯ ಕೈಗೆ ಮತ್ತು ಎಡಕಾಲಿನ ತೊಡೆಗೆ ತಾಗಿ ಗಾಯವಾಗಿದೆ. ಈ ಬಗ್ಗೆ ದೂರು ದಾಖಲಾಗಿದ್ದು, ಠಾಣೆಯಲ್ಲಿ ಕಲಂ: 336,337 ಐಪಿಸಿ ಮತ್ತು 30 Arms ಆಕ್ಟ್ ರಂತೆ ಪ್ರಕರಣ ದಾಖಲಾಗಿದೆ.ಉಜಿರೆಯ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವುದಾಗಿ ತಿಳಿದು ಬಂದಿದೆ. ಧರ್ಮಸ್ಥಳ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
