ನ್ಯೂಸ್ ನಾಟೌಟ್ : ತಮಿಳು ಚಿತ್ರರಂಗದ ಖ್ಯಾತ ಹಾಸ್ಯ ನಟ ೫೭ ವರ್ಷದ ಮೈಲ್ ಸ್ವಾಮಿ ಫೆ. ೧೯ ಭಾನುವಾರ ಮುಂಜಾನೆ ಹೃದಯಾಘಾತವಾಗಿ ನಿಧನರಾಗಿದ್ದಾರೆ.
ಚೆನೈನ ಆಸ್ಪತ್ರೆಯಲ್ಲಿ ಅನಾರೋಗ್ಯದಿಂದ ಕೆಲ ಕಾಲ ಚಿಕಿತ್ಸೆ ಪಡೆಯುತ್ತಿದ್ದರು ಎಂದು ವರದಿಯಾಗಿದೆ . ಇಂದು ಮುಂಜಾನೆ ದಿಢೀರ್ ನಿಧನರಾಗಿದ್ದು, ಪರಿಶೀಲಿಸಿದ ವೈದ್ಯರು ಹೃದಯಾಘಾತದಿಂದ ನಿಧನರಾಗಿದ್ದಾರೆ ಎಂದು ತಿಳಿಸಿದ್ದಾರೆ. 1980 ರ ದಶಕದಲ್ಲಿ ಸಣ್ಣ ಪಾತ್ರಗಳಿಂದ ಬಣ್ಣದ ಲೋಕದ ಯಾನವನ್ನು ಆರಂಭಿಸಿದ ಮೈಲ್ ಸ್ವಾಮಿ, ಕಮಲ್ ಹಾಸನ್ ಅಭಿನಯದ ಅಪೂರ್ವ ಸಾಗೋಧರರ್ಗಲ್, ಮೈಕೆಲ್ ಮದನ ಕಾಮ ರಾಜನ್ ಚಿತ್ರಗಳಲ್ಲಿ ನಟಿಸಿ, ಬಳಿಕ ಹತ್ತಾರು ಹಾಸ್ಯ ಪಾತ್ರಗಳಿಗೆ ಬಣ್ಣ ಹಚ್ಚಿದ್ದರು.
ಪೂವೆಲ್ಲಂ ಉನ್ವಾಸಂ , ಪಾರ್ಥಲೆ ಪರವಾಸಂ, ವಿಜಿಲ್ , ಗಿಲ್ಲಿ ಚಿತ್ರದಲ್ಲಿ ಗಮನ ಸೆಳೆದಿದ್ದ ಈ ನಟ, ʼಕಂಗಳಲ್ ಕೈದು ಸೇʼ ಸಿನಿಮಾದಲ್ಲಿನ ಹಾಸ್ಯ ಪಾತ್ರಕ್ಕಾಗಿ ತಮಿಳುನಾಡು ರಾಜ್ಯ ಚಲನಚಿತ್ರ ಪ್ರಶಸ್ತಿಯನ್ನು ಪಡೆದುಕೊಂಡಿದ್ದರು. ತಮಿಳಿನ ಹಲವು ಟಿವಿ ಕಾರ್ಯಕ್ರಮಗಳಲ್ಲಿ ಜಡ್ಜ್ ಆಗಿಯೂ ಮೈಲ್ ಸ್ವಾಮಿ ಕಾಣಿಸಿಕೊಂಡಿದ್ದಾರೆ.ಸಿಎಂ ಸ್ಟ್ಯಾಲಿನ್, ಕಮಲ್ ಹಾಸನ್, ನಟ ವಿಕ್ರಮ್‌, ಶರತ್ ಕುಮಾರ್‌ ಸೇರಿದಂತೆ ಅನೇಕ ಕಲಾವಿದರು ಖ್ಯಾತ ಹಾಸ್ಯನಟನ ನಿಧನಕ್ಕೆ ಕಂಬನಿ ಮಿಡಿದಿದ್ದಾರೆ.
