ನ್ಯೂಸ್ ನಾಟೌಟ್: ಪ್ರೀತಿ, ಮದುವೆ ಇದೆಲ್ಲ ಸ್ವರ್ಗದಲ್ಲಿಯೇ ನಿಶ್ಚಯವಾಗಿರುತ್ತದೆ ಅನ್ನುವುದನ್ನು ನಾವೆಲ್ಲ ಕೇಳಿದ್ದೇವೆ. ಎಷ್ಟೇ ಪ್ರೀತಿ ಮಾಡಿದರೂ ಋಣ ಇದ್ದವರೇ ಬಾಳಿನಲ್ಲಿ ಸಿಗುತ್ತಾರೆ ಅಂತ ಅದೆಷ್ಟೋ ಪ್ರೇಮಿಗಳು ಗೊಣಗುತ್ತಿರುತ್ತಾರೆ. ಆದರೆ ಇತ್ತೀಚಿನ ದಿನಗಳಲ್ಲಿ ಲವ್ ಅನ್ನೋದು ಪ್ಯಾಶನ್ ಆಗ್ಬಿಟ್ಟಿದೆ. ಹಣ, ಟೈಮ್ ಪಾಸ್, ಲೈಂಗಿಕ ಸಂಪರ್ಕಕ್ಕಾಗಿ, ಕ್ಷಣಿಕ ಸುಖಕ್ಕಾಗಿ ಪ್ರೀತಿಯ ನಾಟಕವಾಗುತ್ತಿರುವುದು ವಿಪರ್ಯಾಸವೇ ಸರಿ. ಆದರೆ ಇಂಥಹ ನಾಟಕೀಯ ಬದುಕಿನ ನಡುವೆಯೂ ಅಲ್ಲೊಂದು ಇಲ್ಲೊಂದು ಅಪರೂಪದ ನೈಜ ಪ್ರೀತಿಯೂ ಇರುತ್ತದೆ. ಆ ಪ್ರೀತಿ ಅರಳುವ ಮೊದಲೇ ದುರಂತ ಅಂತ್ಯ ಕಂಡರೆ ಎಂತ ವಿಪರ್ಯಾಸ ಅಲ್ವಾ? ಇಂತಹದ್ದೊಂದು ಅಪರೂಪದ ಮನಕಲುಕುವ ಘಟನೆ ನಡೆದಿದೆ.
ಪ್ರಣವ್ ಹಾಗೂ ಸಹನಾ ಪರಸ್ಪರ ಪ್ರೀತಿಸುತ್ತಿದ್ದರು. ಕೇರಳ ಮೂಲದ ಜೋಡಿ ಮದುವೆಯಾಗಲು ನಿಶ್ಚಯಿಸಿದ್ದರು. ಆದರೆ ಮನೆಯವರಿಂದ ತೀವ್ರ ವಿರೋಧ ವ್ಯಕ್ತವಾಯಿತು. ಈ ನಡುವೆ ಪ್ರಣವ್ ಅಪಘಾತಕ್ಕೆ ತುತ್ತಾದರು. ಜತೆಗೆ ಅವರಿಗೆ ಪಾರ್ಶ್ವವಾಯುಗೆ ಕೂಡ ಬೆನ್ನತ್ತಿಕೊಂಡಿತು. ಈ ವಿಚಾರ ಗೊತ್ತಾದ ಬಳಿಕವೂ ಸಹನಾ ಆತನನ್ನು ದೂರ ಮಾಡಲಿಲ್ಲ. ಆತನನ್ನೇ ಮದುವೆಯಾಗುವುದಾಗಿ ಹಠ ಹಿಡಿದಳು. ಮನೆಯವರ ವಿರೋಧದ ನಡುವೆಯೂ ಸಹನಾ 2020ರ ಮಾರ್ಚ್ ತಿಂಗಳಲ್ಲಿ ಪ್ರಣವ್ ಅನ್ನು ಮದುವೆಯಾಗಿದ್ದರು. ಇವರಿಬ್ಬರ ನೈಜ ಪ್ರೀತಿಯನ್ನೂ ದೇವರು ಕೂಡ ಸಹಿಸಿಕೊಳ್ಳಲಿಲ್ಲ. ಇಬ್ಬರು ಮೂರು ವರ್ಷದಿಂದ ಕಷ್ಟಕ್ಕೆ ಸುಖಕ್ಕೆ ಸಮಪಾಲುದಾರರಾಗಿ ಬದುಕುತ್ತಿದ್ದಾಗ ವಿಧಿ ಕ್ರೂರ ಲೀಲೆಗೆ ಪ್ರಣವ್ ಬಲಿಯಾಗಿದ್ದರು. ಪ್ರಣವ್ ರಕ್ತ ವಾಂತಿ ಮಾಡಿಕೊಂಡು ಮೃತಪಟ್ಟಿದ್ದಾರೆ. ಹಿಂದೆ ನಡೆದಿದ್ದ ಅಪಘಾತದಿಂದ ಈ ಸಾವು ಸಂಭವಿಸಿದೆ ಎಂದು ತಿಳಿದು ಬಂದಿದೆ. ಇದೀಗ ಸಹನಾ ತನ್ನ ಪ್ರಿಯಕರನ ನೆನಪಿನಲ್ಲಿ ಕಣ್ಣೀರಾಗಿದ್ದಾರೆ.
