ನ್ಯೂಸ್ ನಾಟೌಟ್ : ಇತ್ತೀಚೆಗೆ ಮುಸ್ಲಿಂ ಹುಡುಗರ ಜತೆ ಹಿಂದೂ ಹುಡುಗಿಯರು ಕಾಣಿಸಿಕೊಂಡು ಹಿಂದೂ ಸಂಘಟನೆಗಳ ಯುವಕರು ಅವರನ್ನು ಹಿಡಿದು ಪೊಲೀಸ್ ಗೆ ಒಪ್ಪಿಸಿದ ಹಲವು ಪ್ರಕರಣದ ಬಗ್ಗೆ ವರದಿಯಾಗಿದ್ದವು. ಇದೀಗ ಅಂತಹುದ್ದೇ ಪ್ರಕರಣವೆಂದು ಮುಸ್ಲಿಂ ಯುವಕನೋರ್ವನಿಗೆ ಇಬ್ಬರು ಯುವತಿಯರ ಸಮ್ಮುಖದಲ್ಲಿ ಚೆನ್ನಾಗಿ ಥಳಿಸಿರುವ ಘಟನೆ ಸುಳ್ಯ ತಾಲೂಕಿನ ಸಂಪಾಜೆಯ ಕಲ್ಲುಗುಂಡಿ ಎಂಬಲ್ಲಿ ಮಂಗಳವಾರ ತಡರಾತ್ರಿ ನಡೆದಿದೆ ಎಂದು ತಿಳಿದು ಬಂದಿದೆ.
ಸುಳ್ಯದಲ್ಲಿ ಕೇರಳ ಮೂಲದ ಮುಸ್ಲಿಂ ವ್ಯಕ್ತಿಯೊಬ್ಬರು ಇಬ್ಬರು ಯುವತಿಯರ ಜತೆಗೆ ಊಟಕ್ಕೆಂದು ಮಂಗಳವಾರ ತಡ ರಾತ್ರಿ ಸುಳ್ಯದ ಹೋಟೆಲ್ ವೊಂದರ ಸಮೀಪ ಕಾರು ನಿಲ್ಲಿಸಿದ್ದರು. ಈ ವೇಳೆ ಒಬ್ಬಾಕೆ ಮಹಿಳೆ ಬುರ್ಕಾ ತೊಟ್ಟುಕೊಂಡಿದ್ದು ಮತ್ತೋರ್ವ ಯುವತಿ ಆಧುನಿಕ ಡ್ರೆಸ್ ಧರಿಸಿದ್ದಳು ಎನ್ನಲಾಗಿದೆ. ಇದನ್ನು ಗಮನಿಸಿದ ಯುವಕರ ತಂಡವೊಂದು ಆ ವಾಹನದಲ್ಲಿ ಬಂದಿದ್ದ ಮೂವರ ಮೇಲೆ ಕಣ್ಣಿರಿಸಿದ್ದರು. ಮಾತ್ರವಲ್ಲ ಮಡಿಕೇರಿಯತ್ತ ತೆರಳುತ್ತಿದ್ದ ಐ20 ಕಾರನ್ನು ಪರಿವಾರಕಾನದ ಬಳಿ ತಡೆಯುವ ಪ್ರಯತ್ನ ಮಾಡಲಾಗಿದೆ. ಆದರೆ ಯುವತಿಯರ ಜತೆ ಕಾರು ಚಲಾಯಿಸಿಕೊಂಡು ಬರುತ್ತಿದ್ದ ಆತ ಕಾರು ನಿಲ್ಲಿಸದೆ ಅಲ್ಲಿಂದ ಪರಾರಿಯಾಗಿ ಬಂದಿದ್ದಾನೆ. ಇದರಿಂದ ರೊಚ್ಚಿಗೆದ್ದ ಯುವಕರು ಸಂಪಾಜೆಯ ಕಲ್ಲುಗುಂಡಿ ಸಮೀಪ ಪೊಲೀಸ್ ಠಾಣೆಯ ಸಮೀಪದಲ್ಲಿ ಬ್ಯಾರಿಕೇಡ್ ಅಡ್ಡಹಾಕಿ ಕಾರನ್ನು ತಡೆದಿದ್ದಾರೆ. ಮಾತ್ರವಲ್ಲ ಯುವಕನಿಗೆ ಚೆನ್ನಾಗಿ ಥಳಿಸಿದ್ದಾರೆ ಎಂದು ಬಲ್ಲಮೂಲಗಳು ನ್ಯೂಸ್ ನಾಟೌಟ್ ಗೆ ತಿಳಿಸಿವೆ.
ಒಂದು ಮೂಲಗಳು ಹೇಳುವ ಪ್ರಕಾರ ಕಾರಿನೊಳಗೆ ಇದ್ದದ್ದು ಮುಸ್ಲಿಂ ಯುವತಿಯರು. ಆದರೆ ಕೆಲವರು ಒಬ್ಬಾಕೆ ಹಿಂದೂ ಹುಡುಗಿ ಮುಸ್ಲಿಂ ಯುವಕನ ಕಾರಿನಲ್ಲಿದ್ದಳು ಎಂದು ತಪ್ಪಾಗಿ ಅರ್ಥೈಸಿಕೊಂಡು ಕಾರು ತಡೆದು ಯುವಕನಿಗೆ ಹಲ್ಲೆ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಯುವಕನಿಗೆ ಥಳಿಸಿದ ಬಳಿಕ ಆಕೆ ಮುಸ್ಲಿಂ ಹುಡುಗಿ ಅನ್ನುವ ಸತ್ಯ ಗೊತ್ತಾಗಿದೆ ಎಂದು ಹೇಳಲಾಗಿದೆ. ಆದರೆ ಈ ಬಗ್ಗೆ ಖಚಿತವಾದ ಮಾಹಿತಿಯನ್ನು ಪೊಲೀಸರು ತಿಳಿಸಿಲ್ಲ.
ಕೆಲವು ಮೂಲಗಳು ಹೇಳುವ ಪ್ರಕಾರ ಕಾರಿನಲ್ಲಿ ಇದ್ದದ್ದು ಹಿಂದೂ ಹುಡುಗಿಯರು ಎಂದು ಹೇಳಲಾಗುತ್ತಿದೆ. ‘ಈ ಸೆಂಟ್ ವಾಸನೆಗೆ ಮೂಸಿಕೊಂಡು ಹೋಗುವ ಉಷ್ಣ ಮಾರಿ ಹುಡುಗಿಯರಿಗೆ ನಾವ್ ಎಂಥ ಮಾಡಬೇಕು ನೀವೇ ಹೇಳಿ’ ಅನ್ನುವ ಪೋಸ್ಟ್‌ವೊಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು ಈ ಘಟನೆಗೆ ಮತ್ತಷ್ಟು ಪುಷ್ಠಿ ನೀಡಿದೆ. ಈ ಕುರಿತಂತೆ ನ್ಯೂಸ್ ನಾಟೌಟ್ ತಂಡ ಕಲ್ಲುಗುಂಡಿ ಪೊಲೀಸ್ ಠಾಣೆಗೆ ಸಂಪರ್ಕಿಸಿ ಮಾಹಿತಿ ಕೇಳಿದಾಗ ಹೆಚ್ಚಿನ ಮಾಹಿತಿ ನೀಡುವುದಕ್ಕೆ ಪೊಲೀಸರು ನಿರಾಕರಿಸಿದರು. ಆದರೆ ಕಾರಿನಲ್ಲಿ ಇದ್ದವರು ಯಾರು? ಅನ್ನುವುದರ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ಸಿಕ್ಕಿಲ್ಲ. ಮೂಲಗಳ ಪ್ರಕಾರ ಎಫ್‌ಐಆರ್ ದಾಖಲಿಸುವುದಕ್ಕೆ ಪೆಟ್ಟು ತಿಂದ ಯುವಕ ನಿರಾರಿಸಿದ್ದಾನೆ ಎನ್ನಲಾಗಿದೆ.
