ನ್ಯೂಸ್ ನಾಟೌಟ್‌ : ಬಿಗ್ ಬಾಸ್‌ ಕುರಿತು ಪರ ವಿರೋಧ ಚರ್ಚೆ ಇದ್ದರೂ ಈ ಕಾರ್ಯಕ್ರಮವನ್ನು ನೋಡದಿರುವವರೇ ವಿರಳ.ಹೌದು, ಕಲರ್ಸ್‌ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಬಿಗ್ ಬಾಸ್‌ ಭಾರಿ ಜನಮನ್ನಣೆಯನ್ನು ಗಳಿಸಿತ್ತು. ಮುಖ್ಯವಾಗಿ ಈ ಕಾರ್ಯಕ್ರಮ ಕ್ಕೆ ಕಿಚ್ಚ ಸುದೀಪ್ ಅವರು ಹೋಸ್ಟ್ ಆಗಿ ಗಮನ ಸೆಳೆದಿದ್ದರು. ಬಹುತೇಕರು ಈ ಬಗ್ಗೆ ಹೇಳೋದೇನೆಂದ್ರೆ ಈ ಶೋದಲ್ಲಿ ಕಿಚ್ಚ ಸುದೀಪ್ ಬಿಟ್ರೆ ಬೇರ್ಯಾರಿಗೂ ಆ ಪ್ಲೇಸನ್ನು ತುಂಬಕ್ಕಾಗಲ್ಲ ಎಂದು.
ಹೌದು, ಕಿಚ್ಚ ಸುದೀಪ್ ಅವರು ಇದುವೇ ನಾನು ಹೋಸ್ಟ್ ಆಗಿ ನಡೆಸಿಕೊಡುವ ಕೊನೆಯ ಸೀಸನ್ ಎಂದು ಭಾವನಾತ್ಮಕ ಹೇಳಿಕೆ ನೀಡಿರುವ ಬಗ್ಗೆ ನಿಮಗೆ ಗೊತ್ತೇ ಇದೆ. ಹಾಗಾದರೆ ಇನ್ಮುಂದೆ ಬಿಗ್ ಬಾಸ್‌ ನಡೆಸಿಕೊಡುವವರು ಯಾರು?ಯಾರಾದರೂ ಒಬ್ಬ ನಿರೂಪಕ ಬೇಕಲ್ವ? ಹೀಗಾಗಿ ಎಲ್ಲೆಡೆ ಕುತೂಹಲ ಮನೆ ಮಾಡಿದೆ.ಈಗ ಪಟ್ಟಿಯಲ್ಲಿ ಐವರ ಹೆಸರು ಮುಂಚೂಣಿಯಲ್ಲಿದೆ ಎಂಬ ಮಾತು ಕೇಳಿಬರುತ್ತಿದೆ. ರಮೇಶ್ ಅರವಿಂದ್‌, ಡಾ.ಶಿವರಾಜ್‌ ಕುಮಾರ್‌, ರಿಯಲ್‌ ಸ್ಟಾರ್‌ ಉಪೇಂದ್ರ, ರಾಕಿಂಗ್‌ ಸ್ಟಾರ್‌ ಯಶ್‌ ಮತ್ತು ಡಿವೈನ್‌ ಸ್ಟಾರ್‌ ರಿಷಬ್ ಶೆಟ್ಟಿ ಹೆಸರು ಮುಂದಿದೆ ಎನ್ನಲಾಗುತ್ತಿದೆ.
ಈ ಐವರಲ್ಲಿ ಯಾರು ಕಾರ್ಯಕ್ರಮವನ್ನು ಹೋಸ್ಟ್ ಮಾಡಬಹುದು?ವೀಕೆಂಡ್‌ ವಿತ್‌ ರಮೇಶ್ ನಡೆಸಿಕೊಟ್ಟಿದ್ದ ರಮೇಶ್ ಅವರು ಹೋಸ್ಟ್ ಮಾಡಬಹುದು ಎಂದು ಹೇಳಲಾಗುತ್ತಿದೆ. ಆದರೆ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದ ರಮೇಶ್ ಅವರು “ನನಗೆ ಆ ರೀತಿಯ ಯಾವುದೇ ಆಫರ್ ಬಂದಿಲ್ಲ, ಆ ಬಗ್ಗೆ ಚರ್ಚೆ ಸಹ ನಡೆಸಲಾಗಿಲ್ಲ. ನನ್ನ ಹಾದಿ ಬೇರೆ ಇದೆ” ಎಂದು ಹೇಳಿದ್ದರು. ನಂತರ ಕೇಳಿ ಬಂದ ಹೆಸರು ಶಿವಣ್ಣ ಅವರದ್ದು. ಆದರೆ ಶಿವಣ್ಣ ಅವರು ಈಗಷ್ಟೇ ಆರೋಗ್ಯ ಸಮಸ್ಯೆ ಎದುರಿಸಿ ಚಿಕಿತ್ಸೆ ಪಡೆದು ಕಂಬ್ಯಾಕ್‌ ಮಾಡಿದ್ದಾರೆ.ಸದ್ಯ ಹೋಸ್ಟ್ ಮಾಡೋದು ಅನುಮಾನ. ಇನ್ನು ಕನ್ನಡದ ಮತ್ತೋರ್ವ ಖಡಕ್‌ ನಟ ಅಂದ್ರೆ ಉಪೇಂದ್ರ. ತನ್ನ ನೇರಾ ನುಡಿಗಳಿಂದಲೇ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿರುವವರು. ಉಪ್ಪಿ ಈ ಶೋಗೆ ಹೋಸ್ಟ್ ಆಗಬಹುದು ಎನ್ನಲಾಗುತ್ತಿದೆ. ಆದರೆ ಯಾವುದೇ ನಿಖರ ಮಾಹಿತಿ ಇದುವರೆಗೆ ಲಭ್ಯವಾಗಿಲ್ಲ.
ಇದಾದ ಬಳಿಕ ಯಶ್‌ ಅವರು ಕೂಡ ಬಿಗ್ ಬಾಸ್‌ ಹೋಸ್ಟ್ ಆಗಬಹುದು ಎನ್ನಲಾಗುತ್ತಿದೆಯಾದರೂ ಅವರು ಸಿಕ್ಕಾಪಟ್ಟೆ ಬ್ಯುಸಿ ಆಗಿದ್ದಾರೆ.ಇವರೆಲ್ಲರನ್ನೂ ಹೊರತುಪಡಿಸಿ ಖ್ಯಾತ ನಟ ರಿಷಬ್ ಶೆಟ್ಟಿ ಹೆಸರು ಕೇಳಿ ಬರುತ್ತಿದೆ.ಇವರಿಗೆ ಬಿಗ್ ಬಾಸ್‌ ಕೆಲ ಸಮಯಗಳ ಹಿಂದೆಯೇ ಆಫರ್ ನೀಡಿದೆ ಎನ್ನಲಾಗುತ್ತಿದೆ. ಆದರೆ ಕಾಂತಾರ 2 ಚಿತ್ರದಲ್ಲಿ ಬ್ಯುಸಿ ಇರೋ ಕಾರಣಕ್ಕೆ ಆಫರ್‌ನಿಂದ ಹಿಂದೆ ಸರಿದಿದ್ದರು ಎನ್ನಲಾಗಿದೆ. ಆದರೆ ಮುಂಬರುವ ಸೀಸನ್‌ಗೆ ರಿಷಬ್ ಶೆಟ್ಟಿಯೇ ಹೋಸ್ಟ್ ಆಗಲಿದ್ದಾರೆ ಎಂದು ಹೇಳಲಾಗುತ್ತಿದೆ. ರಿಷಬ್ ಶೆಟ್ಟಿಯವರು ಕನ್ನಡದ ಹೆಸರಾಂತ ನಟ-ನಿರ್ದೇಶಕ. ಜತೆಗೆ ಕಾಂತಾರ ಚಿತ್ರದ ಮೂಲಕ ಇಡೀ ಅಂತರಾಷ್ಟ್ರೀಯ ಮಟ್ಟದಲ್ಲಿಯೂ ಗುರುತಿಸಿಕೊಂಡವರು. ಕನ್ನಡಕ್ಕೆ ಮೂರು ರಾಷ್ಟ್ರಪ್ರಶಸ್ತಿಗಳನ್ನು ತಂದುಕೊಟ್ಟ ಧೀಮಂತ ನಟ ಎಂದೇ ಹೇಳಬಹುದು. ಬಿಗ್ ಬಾಸ್‌ ಸೀಸನ್ ೧೨ರಲ್ಲಿ ರಿಷಬ್ ಶೆಟ್ಟಿಯವರೇ ಹೋಸ್ಟ್ ಆಗ್ತಾರಾ? ಕಾದು ನೋಡಬೇಕಷ್ಟೇ ..
