(ಲೇಖನ ಸಂಗ್ರಹ, ವರದಿ ವಿಶ್ಲೇಷಣೆ: ಹರ್ಷಿತಾ ವಿನಯ್)
ನ್ಯೂಸ್ ನಾಟೌಟ್: ಪ್ರಕೃತಿದತ್ತವಾಗಿ ಮಹಿಳೆಯರಿಗೆ ಒಲಿದು ಬಂದಿರುವ ಮುಟ್ಟಿನ ಬಗ್ಗೆ ಸಹಜವಾಗಿಯೇ ಹಲವಾರು ಮಹಿಳೆಯರಿಗೆ ಸಂಪೂರ್ಣ ಅರಿವಿನ ಕೊರತೆ ಇರುತ್ತದೆ. ಹಾರ್ಮೋನುಗಳು ಏರುಪೇರಾದಾಗ ಏನೇನಾಗುತ್ತದೆ..? ಮಹಿಳೆ ಮುಟ್ಟಿನ ಸಮಯದಲ್ಲಿ ಹೆಚ್ಚು ಒತ್ತಡಕ್ಕೆ ಒಳಗಾಗುವಂತೆ ಕಂಡು ಬರೋದು ಏಕೆ..? ಇದೆಲ್ಲದರ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ಸುಳ್ಯದ ಕೆವಿಜಿ ಆಯುರ್ವೇದ ಮೆಡಿಕಲ್ ಕಾಲೇಜು ಮತ್ತು ಆಸ್ಪತ್ರೆಯ ಅಸಿಸ್ಟೆಂಟ್ ಪ್ರೊಫೆಸರ್ ಡಾ| ರಾಘವೇಂದ್ರ ಪ್ರಸಾದ್ ಬಂಗಾರಡ್ಕ ಮಾಹಿತಿ ನೀಡಿದ್ದಾರೆ. ಈ ಬಗೆಗಿನ ಅವರ ಅಂಕಣದ ವಿಶ್ಲೇಷಣೆ ಇಲ್ಲಿದೆ ಓದಿ.
ಹಾರ್ಮೋನುಗಳು ಏರುಪೇರಾದಾಗ ಮಹಿಳೆಯಲ್ಲಿ ಏನೇನು ಆಗಬಹುದು? ಕುರಿತಾಗಿ ಅಚ್ಚರಿಯ ಅಂಶಗಳು ಇಲ್ಲಿವೆ. ಈ ಸ್ಟಾಂಡಯಾಲ್ ಹಾರ್ಮೋನು ಕಡಿಮೆಯಾದಾಗ ಮೆದುಳಿಗೆ ಹೆಚ್ಚು ಫಾಲ್ಲಿಕಲ್ ಸ್ಟಿಮ್ಯುಲೇಟಿಂಗ್ ಹಾರ್ಮೋನು ಸ್ರವಿಸಲು ಚಿತಾವಣೆ ಮಾಡುತ್ತದೆ. ಅಂಡಾಣುವನ್ನು ಹೊತ್ತಿರುವ ಪ್ರಾಥಮಿಕ ಫಾಲ್ಲಿಕಲ್ ಗಳನ್ನು ಹೆಚ್ಚು ಈಸ್ಟಾಂಡಯಾಲ್ ಹಾರ್ಮೋನು ಸ್ರವಿಸುವಂತೆ ಉತ್ತೇಜಿಸುತ್ತದೆ. ಹೆಚ್ಚಿದ ಎಫ್.ಎಸ್.ಹೆಚ್.(ಫಾಲ್ಲಿಕಲ್ ಸ್ಟಿಮ್ಯುಲೇಟಿಂಗ್ ಹಾರ್ಮೋನು) ಮಟ್ಟವು ಕೇವಲ ಮೆದುಳು ಸುರಿಸಿದ ಉತ್ಪನ್ನವಾಗಿರುವುದಿಲ್ಲ. ಫಾಲ್ಲಿಕಲ್ ಗಳನ್ನು ಬೆಳವಣಿಗೆ ಹೊಂದುವಂತೆ ಮಾಡುವುದಲ್ಲದೆ, ಮೆನೋಪಾಸ್ ಅವಸ್ಥೆಯ ಲಕ್ಷಣಗಳಿಗೆ ಜವಾಬ್ದಾರವಾಗಿರುತ್ತದೆ. ಮೂಳೆಗಳ ಸಾಂದ್ರತೆ ಕಡಿಮೆಯಾಗುವುದಕ್ಕೆ (ಓಸ್ಟಿಯೋಪೋರೋಸಿಸ್) ಕಾರಣವಾಗುತ್ತದೆ. ಮೆನೋಪಾಸ್ ಸ್ಥಿತಿಯನ್ನು ಕೇವಲ ಈಸ್ಟ್ರೋಜೆನ್ ಕೊರತೆ ಎಂದೋ, ಅವಳ ಸ್ತ್ರೀತ್ವದ ನಷ್ಟವೆಂದೋ ನೋಡಿದಾಗ, ಇತರ ಪ್ರಮುಖ ಹಾರ್ಮೋನುಗಳ ಮಟ್ಟದಲ್ಲಿನ ಬದಲಾವಣೆಯ ಅಂಶವು ನಮ್ಮ ಗಮನದಿಂದ ತಪ್ಪಿ ಹೋಗುತ್ತದೆ.
ಈಸ್ಟಾಂಡಯಾಲ್, ಪ್ರೊಜೆಸ್ಟರೋನ್ ಮತ್ತು ಎಫ್.ಎಸ್.ಹೆಚ್ ಹಾರ್ಮೋನುಗಳ ಮಟ್ಟವು ದಿನದಿಂದ ದಿನಕ್ಕೆ, ತಿಂಗಳಿನಿಂದ ತಿಂಗಳಿಗೆ ಪ್ರತೀ ಋತುಚಕ್ರದಲ್ಲಿ ಬದಲಾಗುತ್ತಲೇ ಇರುತ್ತದೆ. ಫಾಲ್ಲಿಕಲ್ ಗಳು ನಿಧಾನವಾಗಿ ಬೆಳವಣಿಗೆಯಾಗಬಹುದು. ಆಗ ಋತುಚಕ್ರದ ಅಂತರ ಹೆಚ್ಚಾಗಬಹುದು. ಋತುಚಕ್ರದ ಎರಡನೆಯ ಅರ್ಧಭಾಗ(ನಂತರದ ಹದಿನಾಲ್ಕು ದಿನ) ದೀರ್ಘವಾದಾಗ ಮಹಿಳೆಯು ಮೆನೋಪಾಸ್ ಆರಂಭದ ಲಕ್ಷಣಗಳನ್ನು ಅನುಭವಿಸಬಹುದು. ಈಸ್ಟ್ರೋಜೆನ್ ಮಟ್ಟವು ಋತುಚಕ್ರದಲ್ಲಿ ಹೆಚ್ಚಾಗಿದ್ದಾಗ ಋತುಸ್ರಾವದ ಅವಧಿಯಲ್ಲಿ ಅಧಿಕ ರಕ್ತಸ್ರಾವ, ಮೈಗ್ರೇನ್ ತಲೆನೋವು, ಸ್ತನ-ಎದೆಯಲ್ಲಿ ನೋವು, ಸುಸ್ತು ಕಾಣಿಸಿಕೊಳ್ಳಬಹುದು. ಪ್ರತೀ ತಿಂಗಳಿನಿಂದ ತಿಂಗಳಿಗೆ ಆಗುವ ಹಾರ್ಮೋನುಗಳ ಮಟ್ಟದ ವ್ಯತ್ಯಾಸಗಳೂ ಕೂಡಾ ಇದಕ್ಕೆ ಕಾರಣ. ಕೆಲವು ಮಹಿಳೆಯರು ಇಂಥಾ ಸಂದರ್ಭಗಳಿಗೆ ಹೆಚ್ಚು ಸೆನ್ಸಿಟಿವ್ ಆಗಿರುವುದರಿಂದ ತೀವ್ರ ಬಾಧೆಗೆ ಒಳಗಾಗುತ್ತಾರೆ. ಆ ಕಾರಣಕ್ಕೆ, ಮೆನೋಪಾಸ್ ಹಾಗೂ ಪ್ರಸವಾನಂತರದ ಖಿನ್ನತೆಯನ್ನು ಕೆಲವು ಮಹಿಳೆಯರು ಹೆಚ್ಚಾಗಿ ಅನುಭವಿಸುತ್ತಾರೆ. ಇದು ಆಕೆಯ ಜೀವನದ ಗುಣಮಟ್ಟದ ಮೇಲೆ ಎಷ್ಟು ಪ್ರಭಾವ ಬೀರುತ್ತದೆ ಎಂಬುದರಲ್ಲಿ ವ್ಯತ್ಯಾಸ ಇರುತ್ತದೆ. ಇದು ಮಹಿಳೆಯಿಂದ ಮಹಿಳೆಗೆ ಬದಲಾಗುತ್ತದೆ. ಈಸ್ಟಾçಡಯಾಲ್ ಪ್ರಮಾಣಬದ್ಧವಾಗಿದ್ದು, ಒಂದು ವರ್ಷದ ಅವಧಿಯಲ್ಲಿ ಹಠಾತ್ ಕುಸಿತಕ್ಕೆ ಒಳಗಾಗಬಹುದು. ಅಥವಾ ಈಸ್ಟಾಂಡಯಾಲ್ ಮಟ್ಟವು ಹಠಾತ್ತನೆ ಏರಿ, ಕೊನೆಯ ಋತುಸ್ರಾವದ ನಂತರ, ಎರಡು ವರ್ಷದ ಅವಧಿಯಲ್ಲಿ ನಿಧಾನವಾಗಿ ಕಡಿಮೆಯಾಗುತ್ತಾ ಹೋಗಬಹುದು. ಅಥವಾ, ಆರಂಭದಲ್ಲೇ ಕುಸಿಯತೊಡಗಿ, ಮತ್ತೆ ಗಮನಾರ್ಹ ಕುಸಿತ ಉಂಟಾಗದೇ ಇರಬಹುದು. ಅಥವಾ, ನಿಧಾನವಾಗಿ, ತುಂಬಾ ಸಮಯದ ಕಾಲಾವಕಾಶದೊಂದಿಗೆ ಕಡಿಮೆಯಾಗುತ್ತಾ ಸಾಗಬಹುದು.
ಎಫ್.ಎಸ್.ಹೆಚ್ ಮಟ್ಟವು ಏರುವ ರೀತಿಯಲ್ಲಿ ಗರಿಷ್ಠ, ಮಧ್ಯಮ ಮತ್ತು ಕನಿಷ್ಠ ಎಂಬ ಮೂರು ಸ್ತರಗಳಿವೆ. ಕೊನೆಯ ಋತುಸ್ರಾವದ ಮೊದಲು ಈಸ್ಟಾಂಡಯಾಲ್ ಮಟ್ಟವು ಏರದಿದ್ದಾಗ, ಎಫ್.ಎಸ್.ಹೆಚ್ ಪ್ರಮಾಣ ಸಣ್ಣಮಟ್ಟಿಗೆ ಏರತೊಡಗುತ್ತದೆ, ಅಷ್ಟೇ. ಇಂಥವರಲ್ಲಿ ಈ ಹಾರ್ಮೋನು ಬದಲಾವಣೆಗಳು ಅಷ್ಟೊಂದು ದೊಡ್ಡಮಟ್ಟದಲ್ಲಿರುವುದಿಲ್ಲ. ಹಾಗೆಂದು ಮೆನೋಪಾಸ್ ಗುರುತಿಸಲು ಹಾರ್ಮೋನು ಪರೀಕ್ಷೆ ಅನಿವಾರ್ಯವೇ? ಖಂಡಿತಾ ಇಲ್ಲ. ಋತುಚಕ್ರ ನಿಂತ ನಂತರ (ಮೆನೋಪಾಸ್), ಸಾಮಾನ್ಯವಾಗಿ ಈಸ್ಟಾçಡಯಾಲ್ ಮಟ್ಟವು 25 ಪಿ.ಜಿ/ಎಂ.ಎಲ್. ಹಾಗೂ ಎಫ್.ಎಸ್.ಹೆಚ್ ಪ್ರಮಾಣವು 30 ಐ.ಯು/ಎಂ.ಎಲ್. ಗಿಂತ ಹೆಚ್ಚು ಆಗಿರುತ್ತದೆ. ಆದರೆ, ಹೀಗೆಂದ ಮಾತ್ರಕ್ಕೆ, ಈ ಹಾರ್ಮೋನುಗಳ ಪರೀಕ್ಷೆ ಮಾಡಿದ ಕೂಡಲೇ ಮೆನೋಪಾಸ್ ಪತ್ತೆ ಅಥವಾ ದೃಢೀಕರಣ ಅಗುತ್ತದೆ ಎಂದು ಅರ್ಥವಲ್ಲ. ದಿನದಿಂದ ದಿನಕ್ಕೆ ಬದಲಾಗುವ ಹಾರ್ಮೋನುಗಳ ಮಟ್ಟ ಅಷ್ಟು ಸುಲಭವಾಗಿ ಎಟಕುವಂಥದ್ದಲ್ಲ.
ಒಂದು ವಿಚಾರ ನೀವು ಚೆನ್ನಾಗಿ ನೆನಪಿಟ್ಟುಕೊಳ್ಳಬೇಕು. ಹನ್ನೆರಡು ವರ್ಷದ ಹುಡುಗಿ ಪ್ರಾಯಪ್ರಬುದ್ಧಳಾಗಿದ್ದಾಳೆ ಎಂದು ಹೇಳುವುದಕ್ಕೆ ಹಾರ್ಮೋನು ಪರೀಕ್ಷೆ ಬೇಕಾಗಿಲ್ಲ. ಎತ್ತರದಲ್ಲಿ ಹೆಚ್ಚಳ, ಸ್ತನಗಳ ಬೆಳವಣಿಗೆಯೇ ಅದನ್ನು ಹೇಳುತ್ತದೆ. ಅದೇ ರೀತಿಯಲ್ಲಿ ವಯಸ್ಸಿನಲ್ಲಿ ನಲುವತ್ತರ ಆಸುಪಾಸಿನ ಮಹಿಳೆ ಮೆನೋಪಾಸ್ ಅಥವಾ ಋತುಬಂಧಕ್ಕೆ ಒಳಗಾಗಿದ್ದಾಳೆ ಎಂದು ಹೇಳಲು ಹಾರ್ಮೋನು ಟೆಸ್ಟ್ ಬೇಕಾಗಿಲ್ಲ. ಅನಿಯಮಿತ ಋತುಚಕ್ರ ಅಥವಾ ಋತುಸ್ರಾವ, ಮೈಬಿಸಿ ಅತಿಯಾಗಿ ಏರುವುದು, ನಿದ್ರೆಯ ತೊಂದರೆ, ಅತಿಯಾದ ಆಯಾಸ, ಮೈಕೈಸೆಳೆತ- ಇತ್ಯಾದಿಗಳೇ ಆಕೆಯ ಸ್ಥಿತಿಯನ್ನು ಹೇಳುತ್ತದೆ. ಅಷ್ಟೇ ಅಲ್ಲ, ಟೆಸ್ಟ್ ಮೂಲಕ ಕಂಡ ಆಕೆಯ ಹಾರ್ಮೋನು ಮಟ್ಟವು ಹಾರ್ಮೋನು ಥೆರಪಿ ನೀಡುವುದಕ್ಕೆ ಮಾರ್ಗದರ್ಶಿಯೂ ಅಲ್ಲ. ಈ ಹಾರ್ಮೋನು ಟೆಸ್ಟ್ ಗಳು , ಮಹಿಳೆಯಲ್ಲಿ ನಲುವತ್ತು ವರ್ಷದ ಮೊದಲು ಋತುಚಕ್ರ ನಿಂತರೆ ಪ್ರಾಮುಖ್ಯವಾಗುತ್ತದೆ. ಆದುದರಿಂದ “ಮೆನೋಪಾಸ್”ನ ನಿಖರ ಗುರುತಿಸುವಿಕೆಯು ವಯಸ್ಸು, ಋತುಸ್ರಾವದ ಕ್ರಮ ತಪ್ಪುವಿಕೆ ಹಾಗೂ ಹನ್ನೆರಡು ತಿಂಗಳು ಒಂದು ಸಲವೂ ಮುಟ್ಟು ಆಗದಿರುವುದರಿಂದಲೇ ತೀರ್ಮಾನ ಆಗಬೇಕಾದದ್ದೇ ಹೊರತು, ಯಾವುದೇ ಹಾರ್ಮೋನು ಟೆಸ್ಟ್, ರಕ್ತಪರೀಕ್ಷೆಗಳಿಂದಲ್ಲ.
ಹಾಗೆಂದು. ಕ್ರಮತಪ್ಪಿ ಆಗುವ ಮುಟ್ಟಿಗೆ ಇತರ ಅನೇಕ ಕಾರಣಗಳಿವೆ. ಅವುಗಳನ್ನು ತಿಳಿಯಲು , ಮೂವತ್ತು ನಲುವತ್ತರ ವಯಸ್ಸಿನ ಮಹಿಳೆಯಲ್ಲಿ ರಕ್ತಪರೀಕ್ಷೆ ಅಗತ್ಯ. ಉದಾಹರಣೆಗೆ, ಥೈರಾಯ್ಡ್ ಕಾಯಿಲೆಯಲ್ಲಿ ಮುಟ್ಟು ಕ್ರಮತಪ್ಪಿ ಆಗಬಹುದು. ಆಗ ಟೆಸ್ಟ್ ಅವಶ್ಯಕ. ಅಂಡಾಣು ಬಿಡುಗಡೆ ಆಗುವಲ್ಲಿ ತೊಡಕು ಉಂಟುಮಾಡುವ ಅಂಡಾಶಯದ ಗುಳ್ಳೆ(ಪಾಲಿಸಿಸ್ಟಿಕ್ ಓವರಿಯನ್ ಸಿಂಡ್ರೋಮ್) ಲಕ್ಷಣಗಳನ್ನು ತೀರ್ಮಾನಿಸಲು ಇಂತಹ ಟೆಸ್ಟ್ ಅವಶ್ಯಕ. ಕೆಲವು ತಜ್ಞವೈದ್ಯರು ಜೊಲ್ಲುರಸದ ಹಾರ್ಮೋನು ಟೆಸ್ಟ್ ಸೂಚಿಸುತ್ತಾರಾದರೂ, ಅದು ಪ್ರಯೋಜನವಿಲ್ಲ. ರಕ್ತದ ಹಾರ್ಮೋನು ಮಟ್ಟವನ್ನು ಜೊಲ್ಲುರಸದ ಪರೀಕ್ಷೆ ಪ್ರತಿಬಿಂಬಿಸಲಾರದು. ಅಂಡಾಶಯದ ಗುಳ್ಳೆ ಇರುವ ಮಹಿಳೆಯರಲ್ಲಿ ಕಂಡುಬರುವ ಋತುಚಕ್ರದ ಏರುಪೇರುಗಳನ್ನು, ಮೆನೋಪಾಸ್ನ ಅಳತೆಗೋಲು ಆಗಿ ಪರಿಗಣಿಸಲಾಗದು. ಆಕೆಯಲ್ಲಿ ಮುಟ್ಟಿನ ಅವಧಿಯಲ್ಲಿ ವ್ಯತ್ಯಾಸಗಳಿರಬಹುದು; ಆದರೆ ಮೆನೋಪಾಸ್ ಮಹಿಳೆಯಲ್ಲಿ ನಿದ್ರೆಯ ಸಮಸ್ಯೆ, ಶರೀರದ ತಾಪ ಹೆಚ್ಚುವುದು- ಇತ್ಯಾದಿ ಲಕ್ಷಣಗಳೂ ಇರುತ್ತವೆ.
ಬೆರಗಾಗಿಸುವ ಸಂಗತಿಯೆಂದರೆ, ಹದಿಹರೆಯದ ಋತುಮತಿಯಾಗುವ ಕನ್ಯೆಯಲ್ಲಿ ಹೆಚ್ಚುಕಡಿಮೆ 300000 ದಷ್ಟು ಪ್ರಬುದ್ಧತೆಗೆ ಬಾರದ ಅಂಡಗಳು ಅಂಡಾಶಯದಲ್ಲಿರುತ್ತವೆ. ಆದರೆ ಮೆನೋಪಾಸ್ ಹಂತಕ್ಕೆ ಬಂದಾಗ, ಅದು ಕೇವಲ ಒಂದುಸಾವಿರದಷ್ಟು! ಅಥವಾ ಅದಕ್ಕೂ ಕಡಿಮೆ! ಆದರೆ ಅವುಗಳಿಗೆ ಪಕ್ವಗೊಳ್ಳುವ ಸಾಮರ್ಥ್ಯ ಇರುವುದಿಲ್ಲ. ನಲುವತ್ತರ ಮಹಿಳೆಯಲ್ಲಿ ಎರಡು ಋತುಸ್ರಾವಗಳ ನಡುವಿನ ಅಂತರ ಅರುವತ್ತು ದಿನಗಳಿಗಿಂತ ಹೆಚ್ಚಾದರೆ, ಮೆನೋಪಾಸ್ ಗೆ ಹತ್ತಿರವಾಗುತ್ತಿದ್ದಾಳೆ ಎಂದು ಅರ್ಥ. ಕೊನೆಯ ಋತುಸ್ರಾವ, ಮುಂದಿನ ಮೂರು ವರ್ಷಗಳ ಒಳಗೇ ಆಗಿರುತ್ತದೆ ಎಂಬ ಸೂಚನೆ.
ಕೊನೆಯದಾಗಿ, ಮೆನೋಪಾಸ್ ಅಥವಾ ಋತುಬಂಧವು ಹಾರ್ಮೋನುಗಳ ಬದಲಾವಣೆಗೆ ಮತ್ರ ಸೀಮಿತವಲ್ಲ; ಅದು ಆವರೆಗಿನ ಜೀವನ, ಭಾವನೆ, ಜೀವನಶೈಲಿಯ ಪ್ರತಿಫಲನ. ಉದಾಹರಣೆಗೆ, ಇಬ್ಬರು ಅವಳಿ ಹೆಣ್ಣುಮಕ್ಕಳಲ್ಲಿ ಒಂದು ಮಗು ಹುಟ್ಟಿದ ಎರಡೇ ದಿನಕ್ಕೆ ಸೋಂಕಿಗೆ ಒಳಗಾಗಿ ಸಾಯುತ್ತದೆ. ಇನ್ನೊಂದು ಮಗು ಎಪ್ಪತ್ತು ವರ್ಷ ಬದುಕುತ್ತದೆ. ಸರಾಸರಿ ಆಯುಷ್ಯ ಲೆಕ್ಕ ಹಾಕಿದರೆ, ಪ್ರತೀ ಮಗುವಿನ ಆಯುಷ್ಯ ಮೂವತ್ತೈದು ವರ್ಷ. ಆದರೆ ಈ ಲೆಕ್ಕಾಚಾರವು ಅ ಅವಳಿ ಮಕ್ಕಳ ಜೀವಿತಾವಧಿಯ ಬಗ್ಗೆ ಯಾವುದೇ ಸರಿಯಾದ ಮಾಹಿತಿ ನೀಡುವುದಿಲ್ಲ. ಒಬ್ಬಳು ಮಹಿಳೆಯ (ಮೆನೋಪಾಸ್) ಋತುಚಕ್ರ ನಿಲ್ಲುವ ಅವಧಿ, ಲಕ್ಷಣಗಳ ತೀವ್ರತೆಗೂ ಈ ವಿಚಾರ ಅನ್ವಯಿಸುತ್ತದೆ. ಮಹಿಳೆಯಿಂದ ಮಹಿಳೆಗೆ ಇದು ಭಿನ್ನ. ಆರೋಗ್ಯ ಮತ್ತು ಆಯುಷ್ಯಕ್ಕೆ ಲೆಕ್ಕವಿಲ್ಲ!
ಡಾ.ರಾಘವೇಂದ್ರ ಪ್ರಸಾದ್ ಬಂಗಾರಡ್ಕ (ಬಿ.ಎ.ಎ.ಎಸ್, ಎಂ.ಎಸ್. (ಆಯು)
ಆಯುರ್ವೇದ ತಜ್ಞರು ಹಾಗೂ ಆಡಳಿತ ನಿರ್ದೇಶಕರು,ಪ್ರಸಾದಿನೀ ಆಯುರ್ನಿಕೇತನ ಆಯುರ್ವೇದ ಆಸ್ಪತ್ರೆ, ನರಿಮೊಗರು ಗ್ರಾಮಪಂಚಾಯತ್ ಸಮೀಪ, ಕಾಣಿಯೂರು-ಸುಬ್ರಮಣ್ಯ ರಾಜ್ಯ ಹೆದ್ದಾರಿ, ಪಾದೆ, ನರಿಮೊಗರು, ಪುತ್ತೂರು ಮೊಬೈಲ್: 9740545979