ನ್ಯೂಸ್ ನಾಟೌಟ್‌ : ಆಧ್ಯಾತ್ಮಿಕ ಗುರು ಜಗ್ಗಿ ವಾಸುದೇವ್ ಅಂದ್ರೆ ಯಾರಿಗೆ ತಾನೇ ಗೊತ್ತಿಲ್ಲ ಹೇಳಿ.. ಇಶಾ ಫೌಂಡೇಶನ್‌ನ ಸಂಸ್ಥಾಪಕ,ಆಧ್ಯಾತ್ಮಿಕ ಗುರು,ಜ್ಞಾನಿ ಕೂಡ ಹೌದು..ಇವರ ವಿಡಿಯೋ ತುಣುಕುಗಳು ಆಗಾಗ ವೈರಲ್ ಆಗುತ್ತಲೇ ಇರುತ್ತವೆ.ಇವರು ಆಡುವ ಒಂದೊಂದು ಮಾತು ಕೂಡ ಜೀವನಕ್ಕೆ ಹತ್ತಿರವಾಗಿರುತ್ತೆ ಜತೆಗೆ ಮುತ್ತಿನಂತೆ ಇರುತ್ತೆ. ಇದೀಗ ಈ ಗುರುಗಳು ಇನ್ಮುಂದೆ ನಟರಾಗುತ್ತಿದ್ದಾರೆ.ಅರೇ ! ಇದೇನಿದು ಎಂದು ಯೋಚಿಸುತ್ತಿದ್ದೀರಾ..ಹೌದು, ಭಾರತದ ಅಧ್ಯಾತ್ಮ ಗುರುಗಳಿಗೂ ಹಾಲಿವುಡ್ನಲ್ಲಿ ಬೇಡಿಕೆ ಹೆಚ್ಚಾಗಿದೆ. ಭಾರತದ ಜನಪ್ರಿಯ ಆಧ್ಯಾತ್ಮಿಕ ಗುರು ಜಗ್ಗಿ ವಾಸುದೇವ್ ಹಾಲಿವುಡ್ನ ಮ್ಯೂಸಿಕ್ ಸಿನಿಮಾನಲ್ಲಿ ಕಾಣಿಸಿಕೊಂಡಿದ್ದಾರೆ.
ಭಾರತೀಯ ಸಿನಿಮಾಗಳಿಗೆ ವಿಶ್ವದಾದ್ಯಂತ ಬೇಡಿಕೆ ಸೃಷ್ಟಿಯಾಗಿದೆ. ಭಾರತದ ನಟರನ್ನು ಹಾಲಿವುಡ್ (Hollywood) ಸಿನಿಮಾಗಳಲ್ಲಿ ಹಾಕಿಕೊಳ್ಳುವ ಪ್ರತೀತಿಯೂ ಇತ್ತೀಚೆಗೆ ಜೋರಾಗಿದೆ. ಇದರ ಹಿಂದೆ ದೊಡ್ಡ ಮಾರುಕಟ್ಟೆ ಗಿಮಿಕ್ ಕೂಡ ಇದೆ. ಇರ್ಫಾನ್ ಖಾನ್, ನಾಸಿರುದ್ಧೀನ್ ಶಾ, ಐಶ್ವರ್ಯಾ ರೈ ಮುಂತಾದವರು ಮೊದಲೇ ಹಾಲಿವುಡ್ನಲ್ಲಿ ನಟಿಸಿದ್ದರು. ಇವರ ಬಳಿಕ ಪ್ರಿಯಾಂಕಾ ಚೋಪ್ರಾ, ದೀಪಿಕಾ ಪಡುಕೋಣೆ, ಆಲಿಯಾ ಭಟ್, ಧನುಶ್ ಇನ್ನೂ ಹಲವು ನಟರು ನಟಿಸಿದ್ದಾರೆ. ಇನ್ನೂ ಹಲವು ನಟರು ಒಬ್ಬರಾದ ಬಳಿಕ ಒಬ್ಬರು ಅವಕಾಶ ಪಡೆದುಕೊಳ್ಳುತ್ತಿದ್ದಾರೆ. ಇದೆಲ್ಲದರ ನಡುವೆ ಭಾರತದ ಅಧ್ಯಾತ್ಮ ಗುರುಗಳಿಗೂ ಹಾಲಿವುಡ್ನಲ್ಲಿ ಬೇಡಿಕೆ ಹೆಚ್ಚಾಗಿದ್ದು,ಅವರು ಕೂಡ ಹಾಲಿವುಡ್ನಲ್ಲಿ ಅಭಿನಯಿಸುತ್ತಿದ್ದಾರೆ.
ಹಾಲಿವುಡ್ನ ಅತ್ಯಂತ ಜನಪ್ರಿಯ ಗಾಯಕಿ, ಸಂಗೀತಜ್ಞೆ ಜೆನ್ನಿಫರ್ ಲೊಪೇಜ್ರ ಹೊಸ ಮ್ಯೂಸಿಕ್ ಸಿನಿಮಾ ‘ದಿಸ್ ಈಸ್ ಮಿ ನೌ: ಎ ಲವ್ ಸ್ಟೋರಿ’ ಸಿನಿಮಾನಲ್ಲಿ ಸದ್ಗುರು ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಜೆನ್ನಿಫರ್ ಲೊಪೇಜ್ ‘ದಿಸ್ ಈಸ್ ಮಿ ನೌ’ ಹೆಸರಿನ ಸ್ಟುಡಿಯೋ ಆಲ್ಬಂ ಮಾಡಿದ್ದಾರೆ. ಅದನ್ನು ಆಧರಿಸಿ ‘ದಿಸ್ ಈಸ್ ಮಿ ನೌ: ಎ ಲವ್ ಸ್ಟೋರಿ’ ಮ್ಯೂಸಿಕಲ್ ಸಿನಿಮಾ ಮಾಡಲಾಗಿದೆ.
ಸದ್ಗುರು ಅವರು ಹಾಲಿವುಡ್ ಸಿನಿಮಾದಲ್ಲಿ ಕಾಣಿಸಿಕೊಂಡಿರುವ ವಿಡಿಯೋ ತುಣುಕು ಸಖತ್ ವೈರಲ್ ಆಗಿದೆ. ಹಾಲಿವುಡ್ ನಟರೊಟ್ಟಿಗೆ ಸದ್ಗುರು ನಟಿಸಿರುವ ವಿಡಿಯೋವನ್ನು ನೆಟ್ಟಿಗರು ವೈರಲ್ ಮಾಡಿದ್ದಾರೆ. ಸದ್ಗುರು ಅವರಿಗೆ ಚಿತ್ರರಂಗ ಅಪರಿಚಿತವೇನಲ್ಲ. ಭಾರತದ ಹಲವಾರು ಸಿನಿಮಾ ನಟ-ನಟಿಯರೊಟ್ಟಿಗೆ ಸದ್ಗುರು ಅವರಿಗೆ ಗೆಳೆತನವಿದೆ. ಹಲವಾರು ನಟ-ನಟಿಯರು ಸದ್ಗುರು ಅವರ ನೇರ ಶಿಷ್ಯರೂ ಆಗಿದ್ದಾರೆ ಕೂಡ.
