ನ್ಯೂಸ್ ನಾಟೌಟ್ : ಕ್ರಿಸ್ಮಸ್, ಹೊಸವರ್ಷ ಪ್ರಯುಕ್ತ ಮಕ್ಕಳು ಕೇಕ್ ಖರೀದಿಸಿ ಸಂಭ್ರಮ ಪಡೋದು ಸಾಮಾನ್ಯ.ಆದರೆ ಇಲ್ಲೊಬ್ಬ ಬಾಲಕ ಕ್ರಿಸ್ಮಸ್, ಹೊಸವರ್ಷಕ್ಕೆ ಯಾವುದೇ ಕೇಕ್ ಖರೀದಿಸದೇ ಅದರ ದುಡ್ಡಿನಿಂದ ತಾನು ಓದುತ್ತಿರುವ ಅಂಗನವಾಡಿಗೆ ಗ್ಯಾಸ್ ಸ್ಟವ್ ನೀಡುವ ಮೂಲಕ ಮಾದರಿಯಾಗಿದ್ದಾನೆ..!
ದಕ್ಷಿಣ ಕನ್ನಡ ಜಿಲ್ಲೆಯ ಕಡಬ ತಾಲೂಕಿನ ಕೋಡಿಂಬಾಳ ಗ್ರಾಮದ ಮಡ್ಯಡ್ಕ ಸರಕಾರಿ ಅಂಗನವಾಡಿ ಯಲ್ಲಿ ಅಡುಗೆ ಮಾಡಲು ಯೋಗ್ಯವಲ್ಲದಂತಹ ಗ್ಯಾಸ್ ಸ್ಟವ್ ಒಂದಿತ್ತು.ಇಲ್ಲಿನ ಅಂಗನವಾಡಿ ಸಿಬ್ಬಂದಿ ಇದ್ದ ಸ್ಟವ್‌ನ್ನೇ ಹೇಗಾದರೂ ದುರಸ್ತಿ ಮಾಡಿ ಮಕ್ಕಳಿಗೆ ಅಡುಗೆ ಮಾಡುವ ಸಲುವಾಗಿ ಬಳಸುತ್ತಿದ್ದರು.ಅಂತೂ ಕೊನೆಗೆ ಈ ಸ್ಟವ್ ಸಂಪೂರ್ಣವಾಗಿ ಕೆಟ್ಟು ಹೋಯಿತು. ಈ ವಿಚಾರವನ್ನು ಇದೇ ಅಂಗನವಾಡಿಯಲ್ಲಿ ಓದುತ್ತಿರುವ ಪುಟಾಣಿ ಮಾಸ್ಟರ್ ಅಭಿನಿತ್ತ್ ಮನೆಗೆ ಬಂದು ತನ್ನ ಪೋಷಕರಿಗೆ ತಿಳಿಸಿದ್ದಾನೆ.
ಕೊನೆಗೆ ತನಗೆ ಮತ್ತು ತನ್ನ ಸಹಪಾಠಿಗಳಿಗೆ ಅಡುಗೆ ಮಾಡಲು ಟೀಚರ್ ಬಳಸುವ ಸ್ಟವ್ ಸರಿ ಮಾಡಿಕೊಡುವಂತೆ ಅಭಿನಿತ್ತ್ ತನ್ನ ತಂದೆಗೆ ತಿಳಿಸಿದ್ದಾನೆ.ಮಗನ ಒತ್ತಡದಿಂದಾಗಿ ಅಂಗನವಾಡಿಗೆ ಭೇಟಿ ಕೊಟ್ಟ ಪತ್ರಕರ್ತರೂ ಆದ ಪ್ರಕಾಶ್ ಅವರು ನೋಡಿದಾಗ ಆ ಸ್ಟವ್ ರಿಪೇರಿ ಮಾಡುವ ಸ್ಥಿತಿಯಲ್ಲಿ ಇರಲಿಲ್ಲ. ಮಾತ್ರವಲ್ಲದೇ ಈ ಸ್ಟವ್ ಬಳಸಿದರೆ ಅಲ್ಲೇ ಪಕ್ಕದಲ್ಲಿ ಓದುತ್ತಿರುವ ಪುಟಾಣಿಗಳಿಗೆ ಉಂಟಾಗಬಹುದಾದ ಅಪಾಯನ್ನರಿತ ಪ್ರಕಾಶ್ ಅವರು ಕಡಬದ ಸಂಗೀತ ಎಲೆಕ್ಟ್ರಾನಿಕ್ಸ್ ಮಾಲಕ ದಿನೇಶ್ ಅವರನ್ನು ಸಂಪರ್ಕಿಸಿ ರಿಯಾಯಿತಿ ದರದಲ್ಲಿ ಗುಣಮಟ್ಟದ ಗ್ಯಾಸ್ ಸ್ಟವ್ ಒಂದನ್ನು ತನ್ನ ಮಗ ಅಭಿನಿತ್ತ್ ಮೂಲಕ ಅಂಗನವಾಡಿಗೆ ನೀಡಿದ್ದಾರೆ.ಹೊಸವರ್ಷ ಮತ್ತು ಕ್ರಿಸ್ಮಸ್ ಹಬ್ಬದ ಸಂದರ್ಭದಲ್ಲಿ ತನ್ನ ಅಂಗನವಾಡಿಗೆ ಹೊಸ ಗ್ಯಾಸ್ ಸ್ಟವ್ ದೊರೆತ ಸಂಭ್ರಮದಲ್ಲಿದ್ದಾನೆ ಮಾಸ್ಟರ್ ಅಭಿನಿತ್ತ್.ಇಷ್ಟು ಸಣ್ಣ ಪ್ರಾಯಕ್ಕೆ ಈ ಬಾಲಕ ದೊಡ್ಡ ಮನಸ್ಸು ಮಾಡಿ ತಾನು ಓದುತ್ತಿರುವ ಅಂಗನವಾಡಿಗೆ ಅಳಿಲು ಸೇವೆ ಮಾಡಿ ಮಾದರಿಯಾಗಿದ್ದಾನೆ.ಈ ಮಗು ಬೆಳೆದು ಮುಂದೆ ಸಮಾಜ ಗುರುತಿಸುವಂತಹ ವ್ಯಕ್ತಿಯಾಗಿ ಬೆಳೆಯಲಿ.ಉಜ್ವಲ ಭವಿಷ್ಯ ಆತನದಾಗಲಿ ಅನ್ನೋದೇ ‘ನ್ಯೂಸ್ ನಾಟೌಟ್’ ಆಶಯ.
