ನ್ಯೂಸ್ ನಾಟೌಟ್: ಆಸ್ಪತ್ರೆಯೊಂದರಲ್ಲಿ ಸೇವೆ ಸಲ್ಲಿಸುತ್ತಿದ್ದ ಶುಶ್ರೂಷಕಿಯೊಬ್ಬಳು, ಆಸ್ಪತ್ರೆಯಲ್ಲಿ ದಾಖಲಾಗಿದ್ದ ರೋಗಿಗಳಿಗೆ ಡ್ರಿಪ್ ಔಷಧದ ಬದಲಿಗೆ ನಲ್ಲಿ ನೀರನ್ನು ರೋಗಿಗಳಿಗೆ ನೀಡಿದ್ದರಿಂದಾಗಿ10 ರೋಗಿಗಳು ಮೃತಪಟ್ಟಿರುವ ಘಟನೆ ಅಮೆರಿಕ ಒರೆಗಾನ್ ರಾಜ್ಯದಲ್ಲಿ ಬೆಳಕಿಗೆ ಬಂದಿದೆ. ಅಮೆರಿಕದ ಆಸ್ಪತ್ರೆಗಳಲ್ಲಿ ನೋವು ನಿವಾರಕವಾಗಿ ಬಳಸಲಾಗುವ ಫೆಂಟಾನಿಲ್ ಐವಿ ಎಂಬ ಡ್ರಿಪ್ ಮಾದರಿಯ ಔಷಧಿಯನ್ನು ನೀಡಲಾಗುತ್ತದೆ. ಇದು ಗ್ಲೂಕೋಸ್ ಡ್ರಿಪ್ ಮಾದರಿಯಲ್ಲೇ ರೋಗಿಗಳ ದೇಹಕ್ಕೆ ನೀಡಲಾಗುತ್ತದೆ. ಇದರಲ್ಲಿನ ಔಷಧೀಯ ಗುಣವು, ಶಸ್ತ್ರಚಿಕಿತ್ಸೆಯ ಗಾಯಗಳಿಂದ ಅಥವಾ ಅಂತಿಮ ಹಂತದ ಕ್ಯಾನ್ಸರ್ ರೋಗಗಳಿಂದ ನರಳುವ ರೋಗಿಗಳ ನೋವನ್ನು ಉಪಶಮನ ಮಾಡುತ್ತದೆ ಎನ್ನಲಾಗಿದೆ. ಒರೆಗಾನ್ ರಾಜ್ಯದ ಮೆಡ್ ಫೋರ್ಡ್ ನಲ್ಲಿರುವ ಅಸ್ಯಾಂಟ್ ರೊಗ್ ರೀಜನಲ್ ಮೆಡಿಕಲ್ ಸೆಂಟರ್ ಎಂಬ ಖಾಸಗಿ ಆಸ್ಪತ್ರೆಯಲ್ಲಿ ಈ ರೀತಿಯ ವೈದ್ಯಕೀಯ ಹತ್ಯಾಕಾಂಡ ನಡೆದಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆ ವರದಿ ಮಾಡಿದೆ ಎನ್ನಲಾಗಿದೆ. ತೀರಾ ಅನಿವಾರ್ಯತೆ ಇರುವ ರೋಗಿಗಳಿಗೆ, ವೈದ್ಯರ ಶಿಫಾರಸಿನ ಮೇಲೆ ಹಾಕಲಾಗುತ್ತದೆ. ಇದು ರೋಗಿಗಳಲ್ಲಿ ನಿದ್ರೆಯನ್ನು ತರಿಸುವಂಥ ಅಂಶವಿರುವುದರಿಂದ ಇದನ್ನು ಕದ್ದು, ಕಳ್ಳಸಾಗಣೆ ಮಾಡಿ ಕಾಳಸಂತೆಯಲ್ಲಿ ಮಾರಾಟ ಮಾಡಲಾಗುತ್ತದೆ. ಮಾದಕದ್ರವ್ಯ ವ್ಯಸನಿಗಳು ಇದನ್ನು ಬಳಸಿಕೊಳ್ಳುವುದರಿಂದ ಅವರಿಗೆ ಇದನ್ನು ಮಾರಾಟ ಮಾಡಲಾಗುತ್ತದೆ. ಈ ವಿಚಾರ ತಿಳಿದಿದ್ದ ಅಸ್ಯಾಂಟ್ ರೊಗ್ ಆಸ್ಪತ್ರೆಯ ಶುಶ್ರೂಷಕಿಯೊಬ್ಬಳು, ಆಸ್ಪತ್ರೆಯ ಔಷಧ ಭಂಡಾರದಲ್ಲಿದ್ದ ಫೆಂಟಾನಿಲ್ ಐವಿ ಡ್ರಿಪ್ ಪ್ಯಾಕೆಟ್ ಗಳನ್ನು ಕದ್ದು, ಅವುಗಳ ಜಾಗದಲ್ಲಿ ನಲ್ಲಿ ನೀರು ತುಂಬಿದ, ಥೇಟ್ ಫೆಂಟಾನಿಲ್ 4 ಡ್ರಿಪ್ ಪ್ಯಾಕೆಟ್ ಗಳನ್ನೇ ಹೋಲುವಂಥ ಪ್ಯಾಕೆಟ್ ಗಳನ್ನು ಇಟ್ಟಿದ್ದಾಳೆ. ಆಕೆಯ ಕುಕೃತ್ಯವನ್ನು ತಿಳಿಯದ ಆಸ್ಪತ್ರೆಯ ಇತರೆ ವೈದ್ಯರು, ಶಸ್ತ್ರಚಿಕಿತ್ಸೆಯ ಗಾಯದಿಂದ ಬಳಲುತ್ತಿದ್ದವರಿಗೆ, ಕ್ಯಾನ್ಸರ್ ರೋಗದಿಂದಾಗುವ ದೈಹಿಕ ನೋವುಗಳಿಂದ ಬಳಲುತ್ತಿರುವ ರೋಗಿಗಳಿಗೆ ನಲ್ಲಿ ನೀರು ತುಂಬಿದ್ದ ನಕಲಿ ಫೆಂಟಾನಿಲ್ ಐವಿ ಡ್ರಿಪ್ ಗಳನ್ನು ಹಾಕಿದ್ದಾರೆ. ನೀರು ದೇಹದೊಳಗೆ ಹೋಗಿ, ಅವರ ದೇಹದೊಳಗಿನ ಅಂಗಾಂಗಳಿಗೆ ವಿವಿಧ ಬ್ಯಾಕ್ಟೀರಿಯಾಗಳ ಸೋಂಕು ತಗುಲಿ ಅವರು ಮೃತಪಟ್ಟಿದ್ದಾರೆ. ಆ ಆಸ್ಪತ್ರೆಯಲ್ಲಿ 2022ರಿಂದ ಇಂಥ ಅವಗಢಗಳು ಸಂಭವಿಸುತ್ತಾ ಬಂದಿವೆ. ಆದರೆ, ಇದನ್ನರಿಯದ ವೈದ್ಯರು, ರೋಗಿಗಳ ಸಾವು ಸಹಜ ಎಂದು ಸುಮ್ಮನಾಗಿದ್ದಾರೆ ಎನ್ನಲಾಗಿದೆ.