ನ್ಯೂಸ್ ನಾಟೌಟ್: 50ಕ್ಕೂ ಹೆಚ್ಚು ಶಾಲಾ ವಿದ್ಯಾರ್ಥಿನಿಯರಿಗೆ ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಹರಿಯಾಣದ ಜಿಂದ್ ಜಿಲ್ಲೆಯಲ್ಲಿ ಸರ್ಕಾರಿ ಶಾಲಾ ಪ್ರಾಂಶುಪಾಲನನ್ನು ಬಂಧಿಸಲಾಗಿದೆ.
“ಕಳೆದ ಐದು ದಿನಗಳಿಂದ ತಲೆಮರೆಸಿಕೊಂಡಿದ್ದರು. ಆದರೆ ನಮ್ಮ ತಂಡ ಅವರನ್ನು ಬಂಧಿಸುವಲ್ಲಿ ಸಫಲವಾಗಿದೆ. ಅವರನ್ನು ಜಿಂದ್‌ನಲ್ಲಿನ ನ್ಯಾಯಾಲಯವೊಂದರ ಮುಂದೆ ಹಾಜರುಪಡಿಸಲಾಗುವುದು. ಮುಂದಿನ ವಿಚಾರಣೆಗೆ ನಡೆಸಲು ಅವರನ್ನು ಪೊಲೀಸ್ ವಶಕ್ಕೆ ಒಪ್ಪಿಸುವಂತೆ ನ್ಯಾಯಾಲಯಕ್ಕೆ ಮನವಿ ಮಾಡಲಾಗುವುದು” ಎಂದು ಪೊಲೀಸ್ ಅಧಿಕಾರಿ ಮಾಹಿತಿ ನೀಡಿದ್ದಾರೆ.
ಜಿಂದ್ ಜಿಲ್ಲೆಯ ಸರ್ಕಾರಿ ಶಾಲೆಯೊಂದರ 50ಕ್ಕೂ ಹೆಚ್ಚು ವಿದ್ಯಾರ್ಥಿನಿಯರು ಪ್ರಿನ್ಸಿಪಾಲರಿಂದ ಲೈಂಗಿಕ ಕಿರುಕುಳ ಎದುರಿಸುತ್ತಿರುವ ಬಗ್ಗೆ ಆರೋಪ ಮಾಡಿದ್ದಾರೆ ಎಂದು ಈ ಮೊದಲು ಹರ್ಯಾಣ ಮಹಿಳಾ ಆಯೋಗ ತಿಳಿಸಿತ್ತು. ಲೈಂಗಿಕ ಕಿರುಕುಳ ನೀಡಿದ ಆರೋಪದಲ್ಲಿ ಜಿಂದ್ ಆಡಳಿತವು ಶಾಲಾ ಪ್ರಾಂಶುಪಾಲನನ್ನು ಅಮಾನತ್ತು ಮಾಡಿದ ಕೆಲವು ದಿನಗಳ ಬಳಿಕ ಪೊಲೀಸರು ಸೋಮವಾರ ಪ್ರಕರಣ ದಾಖಲಿಸಿದ್ದರು ಎನ್ನಲಾಗಿದೆ.
“ಶಾಲಾ ವಿದ್ಯಾರ್ಥಿನಿಯರಿಂದ ಪ್ರಾಂಶುಪಾಲರ ವಿರುದ್ಧ ನಮಗೆ 60 ಲಿಖಿತ ದೂರುಗಳು ಬಂದಿವೆ. ಇವುಗಳಲ್ಲಿ 50 ದೂರುಗಳು, ಆರೋಪಿಯ ಕೈಗಳಿಂದ ದೈಹಿಕ ಕಿರುಕುಳ ಅನುಭವಿಸಿರುವುದಾಗಿ ತಿಳಿಸಿವೆ. ಇನ್ನು ಹತ್ತು ಬಾಲಕಿಯರು, ಪ್ರಾಂಶುಪಾಲ ಇಂತಹ ಕೃತ್ಯಗಳಲ್ಲಿ ತೊಡಗಿರುವುದು ತಿಳಿದಿದೆ ಎಂದು ತಿಳಿಸಿರುವುದಾಗಿದೆ” ಎಂದು ರಾಜ್ಯ ಮಹಿಳಾ ಆಯೋಗದ ಅಧ್ಯಕ್ಷೆ ರೇಣು ಭಾಟಿಯಾ ಮಾಹಿತಿ ನೀಡಿದ್ದರು.
ಜಿಂದ್ ಜಿಲ್ಲಾ ಪೊಲೀಸರು ಪ್ರಾಂಶುಪಾಲನ ವಿರುದ್ಧ ಐಪಿಸಿ ಸೆಕ್ಷನ್ 354- A (ಲೈಂಗಿಕ ಕಿರುಕುಳ), 341 (ಕಾನೂಬಾಹಿರ ತಡೆ) ಮತ್ತು 342 (ಕಾನೂನುಬಾಹಿರ ನಿರ್ಬಂಧ) ಹಾಗೂ ಲೈಂಗಿಕ ಅಪರಾಧಗಳಿಂದ ಮಕ್ಕಳ ರಕ್ಷಣೆ ಕಾಯ್ದೆಯ (ಪೋಕ್ಸೋ) ವಿವಿಧ ನಿಯಮಗಳ ಅಡಿ ಪ್ರಕರಣಗಳನ್ನು ದಾಖಲಿಸಲಾಗಿದೆ ಎಂದು ಪೊಲೀಸರು ಮಾಹಿತಿ ನೀಡಿದ್ದರು. ಎಲ್ಲಾ ದೂರುದಾರರೂ ಅಪ್ರಾಪ್ತ ವಯಸ್ಕರಾಗಿದ್ದಾರೆ. ತಮ್ಮ ಕಚೇರಿಗೆ ಬರುವಂತೆ ಕರೆಸಿಕೊಳ್ಳುತ್ತಿದ್ದ ಆರೋಪಿ, ಅಲ್ಲಿ ‘ಅಶ್ಲೀಲ ಕೃತ್ಯ’ಗಳನ್ನು ಎಸಗುತ್ತಿದ್ದ ಎಂದು ಸಂತ್ರಸ್ತರು ಆರೋಪಿಸಿರುವುದಾಗಿ ಭಾಟಿಯಾ ಹೇಳಿದ್ದಾರೆ. ಶಾಲೆಯ ವಿದ್ಯಾರ್ಥಿನಿಯರ ಗುಂಪೊಂದು ಇತ್ತೀಚೆಗೆ ತಾವು ಎದುರಿಸುತ್ತಿರುವ ನೋವಿನ ಬಗ್ಗೆ ವಿವರಿಸಿ ಪ್ರಧಾನಿ ಕಚೇರಿ ಹಾಗೂ ರಾಷ್ಟ್ರೀಯ ಮಹಿಳಾ ಆಯೋಗಕ್ಕೆ ಪತ್ರಗಳನ್ನು ಬರೆದಿತ್ತು ಎನ್ನಲಾಗಿದೆ.
