ನ್ಯೂಸ್ ನಾಟೌಟ್ :ಸರಕಾರಿ ಕಲೆಸ ಸಿಗಬೇಕು,ಲೈಫ್ ಸೆಟಲ್ ಆಗಬೇಕು ಅನ್ನೋದು ಹಲವರ ಕನಸು.ಆದರೆ ಮಹಿಳೆಯರಿಗೆ ಈ ಕನಸನ್ನು ನನಸು ಮಾಡಿಕೊಳ್ಳುವುದು ಇನ್ನೂ ಕಷ್ಟ.ಒಂದು ವೇಳೆ ಮಹಿಳೆಯರಿಗೆ ಸರಕಾರಿ ಕೆಲಸ ಸಿಕ್ಕಿತೆಂದರೆ ಅವರಿಗೆ ಕುಟುಂಬದಲ್ಲಿ ವಿಶೇಷ ಮರ್ಯಾದೆಯೇ ಇರುತ್ತೆ.
ಹೀಗೆ ಕಷ್ಟ ಪಟ್ಟು ಪಡ್ಕೊಂಡ ಕೆಲಸವೇ ಆಕೆಗೆ ಮುಳುವಾಗಿ ಹೋಯ್ತು.ಬಿಹಾರ ರಾಜ್ಯದ ಪಟ್ನಾದಲ್ಲಿ ಪೊಲೀಸ್ ಪೇದೆಯಾಗಿ ಕೆಲವೇ ದಿನಗಳ ಹಿಂದೆ ಕರ್ತವ್ಯಕ್ಕೆ ನಿಯುಕ್ತಿಗೊಂಡಿದ್ದಳು. ಆದರೆ ಕೆಲವೇ ದಿನಕ್ಕೆ ದುರಂತ ಅಂತ್ಯವನ್ನೇ ಕಂಡಳು.ಈ ಪ್ರಕರಣವನ್ನು ಸವಾಲಾಗಿ ತೆಗೆದುಕೊಂಡ ಪೊಲೀಸರು ತನಿಖೆ ನಡೆಸಿದ ವೇಳೆ ಮಹಿಳಾ ಪೊಲೀಸ್ ಪೇದೆಯ ಗಂಡನೇ ಈ ಕೃತ್ಯ ನಡೆಸಿದ್ದ ಎಂದು ತನಿಖೆಯಲ್ಲಿ ಬಯಲಾಗಿದೆ.
ಪೊಲೀಸ್ ಕೆಲಸ ಸಿಕ್ಕ ಬಳಿಕ ತನ್ನ ಪತ್ನಿ ತನಗೆ ಸಮಯ ನೀಡುತ್ತಿಲ್ಲ ಎಂದು ಕೋಪಗೊಂಡಿದ್ದ ಪತಿರಾಯ,ಪತ್ನಿಯನ್ನು ಬಾರದ ಲೋಕಕ್ಕೆ ಕಳುಹಿಸಿದ್ದಾನೆ.ಬಳಿಕ ಪತಿರಾಯ ನಾಪತ್ತೆಯಾಗಿದ್ದಾನೆ.ಪಟ್ನಾದ ಹೋಟೆಲ್ ಒಂದರಲ್ಲಿ ಈ ಕೃತ್ಯ ನಡೆದಿತ್ತು ಎಂದು ಪಟ್ನಾದ ಕೋಟ್ವಾಲಿ ಪೊಲೀಸ್ ಠಾಣೆಯ ಎಸ್‌ಎಚ್‌ಒ ಸಂಜೀತ್ ಕುಮಾರ್ ತಿಳಿಸಿದ್ದಾರೆ. ಪತ್ನಿಗೆ ಪೊಲೀಸ್ ಕೆಲಸ ಸಿಕ್ಕ ಬಳಿಕ ಆಕೆಯ ಪತಿರಾಯ ತುಂಬಾನೇ ಕಿರಿಕಿರಿಗೆ ಒಳಗಾಗಿದ್ದ. ಹೆಂಡತಿ ತನ್ನ ಕುಟುಂಬಕ್ಕೆ ಸಮಯವನ್ನೇ ಕೊಡುತ್ತಿಲ್ಲ ಎಂದು ಆತ ಸಿಟ್ಟಾಗಿದ್ದ. ಈ ದಂಪತಿ ಪ್ರೇಮ ವಿವಾಹ ಆಗಿದ್ದರು. ಇವರಿಗೆ ಒಂದು ಮಗು ಕೂಡಾ ಇತ್ತು ಎಂಬ ವಿಷಯ ಬೆಳಕಿಗೆ ಬಂದಿದೆ.
ಆರೋಪಿ ಪತಿರಾಯ ಪಟ್ನಾದ ಜೆಹ್ನಾಬಾದ್‌ನಲ್ಲಿ ಕೋಚಿಂಗ್‌ ಇನ್‌ಸ್ಟಿಟ್ಯೂಟ್ ನಡೆಸುತ್ತಿದ್ದ. ಈ ಶೈಕ್ಷಣಿಕ ಸಂಸ್ಥೆಗೆ ಆತನ ಪತ್ನಿ ಪೊಲೀಸ್ ಕಾನ್ಸ್‌ಸ್ಟೆಬಲ್ ಆದ ಶೋಭಾ ಕುಮಾರಿ ಕೂಡಾ ಹೋಗುತ್ತಿದ್ದರು. ಇವರಿಬ್ಬರ ನಡುವೆ, ಇಲ್ಲಿಯೇ ಪ್ರೇಮಾಂಕುರವಾಗಿ ಮದುವೆ ಆಗಿತ್ತು. ಬಳಿಕ ಇವರಿಗೆ ಒಂದು ಮಗು ಕೂಡಾ ಆಗಿತ್ತು. ಇಷ್ಟಾದರೂ ಶೋಭಾ ಕುಮಾರಿ ಅವರ ವ್ಯಾಸಂಗ ಮುಂದುವರೆದಿತ್ತು.ಮದುವೆಯಾದ ಆರು ವರ್ಷಗಳ ಬಳಿಕ ಹೇಗೂ ಆಕೆಗೆ ಪೊಲೀಸ್ ಕೆಲಸ ಸಿಕ್ಕಿತ್ತು.
ಪೊಲೀಸ್ ಕೆಲಸ ಸಿಕ್ಕ ಬಳಿಕ ಶೋಭಾ ಕುಮಾರಿ ವಿಪರೀತ ಬ್ಯುಸಿಯಾದ್ರು.ತರಬೇತಿ ಹಾಗೂ ಇನ್ನಿತರ ಕಾರಣಗಳಿಂದಾಗಿ ಮನೆ ಕಡೆ ಹೆಚ್ಚು ಗಮನ ಕೊಡೋದಕ್ಕೆ ಸಮಯವಾಗಲಿಲ್ಲ.ಇದರಿಂದ ಸಿಟ್ಟಿಗೆದ್ದ ಗಂಡ ಆಕೆಯನ್ನು ಮುಗಿಸಿದ್ದಾನೆ.ಪಟ್ನಾ ಜಂಕ್ಷನ್‌ನಲ್ಲಿ ಇರುವ ಹೋಟೆಲ್‌ನಲ್ಲಿ ರೂಂ ಮಾಡಿದ್ದ ಗಂಡ, ಹೆಂಡತಿಯನ್ನು ಅಲ್ಲಿಗೆ ಬರಲು ಹೇಳಿದ್ದ.ಗಂಡನ ಮನವಿ ಮೇರೆಗೆ ಹೋಟೆಲ್‌ಗೆ ಬಂದ 23 ವರ್ಷ ವಯಸ್ಸಿನ ಶೋಭಾ ರಾಣಿಯನ್ನು ಶಾಶ್ವತವಾಗಿ ಕಣ್ಮುಚ್ಚುವಂತೆ ಮಾಡಿದ್ದಾನೆ.
ಮಹಿಳೆಯ ಮೈ ಮೇಲೆ ಬಟ್ಟೆ ಇರಲಿಲ್ಲ ಎಂದು ತಿಳಿದು ಬಂದಿದೆ. ಜೊತೆಗೆ ಪೊಲೀಸರು ಪರಿಶೀಲನೆ ನಡೆಸಲು ಆಗಮಿಸುವ ವೇಳೆಗೆ ಆಕೆಯ ದೇಹಕ್ಕೆ ಹುಳುಗಳು ಮುತ್ತಿಕೊಂಡಿದ್ದವು. ಪಟ್ನಾದಲ್ಲೇ ಮನೆ ಇದ್ದರೂ ಗಂಡ ಹೋಟೆಲ್ ರೂಂ ಬುಕ್ ಮಾಡಿದ್ದು ಏಕೆ? ಪತ್ನಿಯನ್ನು ಹೋಟೆಲ್ ರೂಂಗೆ ಕರೆಸಿಕೊಂಡಿದ್ದು ಏಕೆ ಅನ್ನುವ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಇನ್ನು ಮಹಿಳೆ ಮೇಲೆ ಗುಂಡು ಹಾರಿಸಲು ಬಳಕೆಯಾಗಿದ್ದ ಪಿಸ್ತೂಲ್ ಕೂಡಾ ಪೊಲೀಸರಿಗೆ ಸಿಕ್ಕಿದೆ. ಸದ್ಯ ಪೊಲೀಸರು ಆರೋಪಿ ಪತಿಯನ್ನು ಪತ್ತೆ ಹಚ್ಚಿ ಬಂಧಿಸಲು ಬಲೆ ಬೀಸಿದ್ದಾರೆ.
