ನ್ಯೂಸ್ ನಾಟೌಟ್: ಶಾಲಾ-ಕಾಲೇಜುಗಳಲ್ಲಿ ಜಗಳ, ಹೊಡೆದಾಟಗಳು ನಡೆಯುವುದು ಆಗಾಗ ಕೇಳುತ್ತಿರುತ್ತೇವೆ, ಆದರೆ ಕೆಲವೊಂದು ಮಿತಿಮೀರಿ ವಿಪರೀತಕ್ಕೆ ಕಾರಣವಾಗಿ ಸುದ್ದಿಯಾಗುತ್ತವೆ. ಅಂತಹದ್ದೇ ಘಟನೆಯೊಂದು ನಡೆದಿದಿದ್ದು, ಆದರೆ ಇಂತಹ ವಿವಾದ ಬಗೆಹರಿಸಲು ಯತ್ನಿಸುತ್ತಿದ್ದ ಶಿಕ್ಷಕಿಯೊಬ್ಬರ ಜೀವಕ್ಕೆ ಅಪಾಯ ಎದುರಾಗಿದೆ. ಇದರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಈ ಪ್ರಕರಣ ಸೆಪ್ಟೆಂಬರ್ 28 ರಂದು ಅಮೆರಿಕದ ಮಿಚಿಗನ್‌ನ ಫ್ಲಿಂಟ್‌ನಲ್ಲಿರುವ ಸೌತ್‌ವೆಸ್ಟರ್ನ್ ಕ್ಲಾಸಿಕಲ್ ಅಕಾಡೆಮಿಯಲ್ಲಿ ನಡೆದಿದೆ. ಇದರಲ್ಲಿ ಇಬ್ಬರು ಹುಡುಗಿಯರ ನಡುವೆ ತೀವ್ರ ಜಗಳ ನಡೆದಿದ್ದು, ವೈರಲ್ ಆಗಿರುವ ಈ ವಿಡಿಯೋದಲ್ಲಿ ಇಬ್ಬರೂ ಪರಸ್ಪರ ನಿಂದಿಸಿಕೊಂಡು ಹೊಡೆದಾಡಿದ್ದಾರೆ.
ಈ ವೇಳೆ ಮಧ್ಯಪ್ರವೇಶಿಸಲು ಮುಂದಾದ ಶಿಕ್ಷಕಿ ಇಬ್ಬರ ಮನವೊಲಿಸಲು ಯತ್ನಿಸುತ್ತಿರುವುದು ಕಂಡು ಬಂದಿದೆ. ಆದರೆ ಹುಡುಗಿಯೊಬ್ಬಳು ಏಕಾಏಕಿ ಕೋಪಗೊಂಡು ತರಗತಿಯಲ್ಲಿ ಇಟ್ಟಿದ್ದ ಕಬ್ಬಿಣದ ಕುರ್ಚಿಯನ್ನು ಎತ್ತಿಕೊಂಡು ಇನ್ನೊಬ್ಬ ಹುಡುಗಿಯ ಮೇಲೆ ಎಸೆಯುತ್ತಾಳೆ.
ಆದರೆ ಈ ಕುರ್ಚಿ ಎದುರಾಳಿ ಹುಡುಗಿಗೆ ಬಡಿಯುವ ಬದಲು ಶಿಕ್ಷಕಿಯ ತಲೆಗೆ ಬಡಿಯುತ್ತದೆ, ನಂತರ ಅವಳು ನೆಲದ ಮೇಲೆ ಬೀಳುತ್ತಾಳೆ. ಕೆಲಕಾಲ ಆಕೆಯ ದೇಹದಲ್ಲಿ ಯಾವುದೇ ರೀತಿಯ ಚಲನವಲನ ನಿಮಗೆ ಕಾಣಿಸುವುದಿಲ್ಲ .
ಆದರೆ ಇಷ್ಟೆಲ್ಲಾ ಆದರೂ ಹುಡುಗಿಯರು ತಮ್ಮ ತಮ್ಮಲ್ಲೇ ಜಗಳವಾಡುವುದನ್ನು ನಿಲ್ಲಿಸದೆ ಪರಸ್ಪರ ಬೈಯುತ್ತಲೇ ಇರುತ್ತಾರೆ. ಇದರ ನಂತರ ಶಿಕ್ಷಕಿಯನ್ನು ತಕ್ಷಣವೇ ಆಸ್ಪತ್ರೆಗೆ ಕರೆದೊಯ್ಯಲಾಯಿತು, ಅಲ್ಲಿ ಅವರು ಚಿಕಿತ್ಸೆ ಪಡೆಯುತ್ತಿದ್ದಾರೆ. ವಿಷಯದ ಗಂಭೀರತೆಯನ್ನು ಕಂಡ ಶಾಲಾ ಆಡಳಿತವು ಆ ಬಾಲಕಿಯರ ಪೋಷಕರಿಗೆ ಪತ್ರ ಬರೆದಿದ್ದು, ಈ ಘಟನೆಯಲ್ಲಿ ಶಾಲೆಯ ಮಹಿಳಾ ಶಿಕ್ಷಕಿಯೊಬ್ಬರು ತೀವ್ರವಾಗಿ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ಈ ವಿದ್ಯಾರ್ಥಿನಿಯರ ಮೇಲೆ ಕಾನೂನು ಕ್ರಮ ಜರುಗಿಸಬೇಕೋ ಅಥವಾ ಶಾಲೆಯಿಂದ ಹೊರಹಾಕಬೇಕೋ ಎಂಬುದು ಇನ್ನೂ ನಿರ್ಧಾರವಾಗಿಲ್ಲ ಎನ್ನಲಾಗಿದೆ. ಇದಲ್ಲದೆ, ಫ್ಲಿಂಟ್ ಕಮ್ಯುನಿಟಿ ಸ್ಕೂಲ್ ಅವರು ತಮ್ಮ ಫೇಸ್‌ಬುಕ್ ಪುಟದಲ್ಲಿ ಪೋಷಕರಿಗೆ ಈ ವಿಷಯಗಳನ್ನು ಹೇಗೆ ನಿರ್ವಹಿಸಬೇಕು ಎಂಬುದನ್ನು ತಿಳಿಸಿದ್ದಾರೆ.
