ನ್ಯೂಸ್ ನಾಟೌಟ್ : ವಾಹನಗಳಲ್ಲಿ ಹಾವುಗಳು ಪ್ರತ್ಯಕ್ಷವಾಗಿರುವುದರ ಘಟನೆಗಳನ್ನು ನೀವು ಕೇಳಿರ್ತೀರಿ.ಕೆಲವೊಂದು ಸಲ ಶೂಗಳಲ್ಲಿಯೂ ಅವಿತು ಕೊಳ್ಳುವ ಹಾವುಗಳು, ಗೋಡೆ ಸಂಧಿಗಳನ್ನು ಆವಾಸ ಸ್ಥಾನವನ್ನಾಗಿ ಮಾಡಿಕೊಳ್ಳುವುದು ಇದೆ. ಇದೀಗ ಮಹಿಳೆಯೊಬ್ಬರು ಹೊಟೇಲ್ ನಿಂದ ಹೊರಡುತ್ತಿರೋ ವೇಳೆ ಸ್ಕೂಟರ್‌ನ ಡಿಕ್ಕಿ ಓಪನ್ ಮಾಡುವಾಗ ಹಾಯಾಗಿ ಮಲಗಿದ್ದ ಹಾವು (Snake Rescue) ಕಂಡು ಬೆಚ್ಚಿ ಬಿದ್ದಿದ್ದಾರೆ.ಮಾತ್ರವಲ್ಲ ಬೆದರಿ ಎದ್ದು ಬಿದ್ದು ಓಡಿದ ಘಟನೆ ಮಂಡ್ಯದಲ್ಲಿ ನಡೆದಿದೆ.
ಮಂಡ್ಯದ ಹೋಟೆಲ್ ಸಮೀಪದಲ್ಲಿ ಹಾವೊಂದು ಪ್ರತ್ಯಕ್ಷವಾಗಿ ಕ್ಷಣಕಾಲ ಆತಂಕ ಹೆಚ್ಚಿಸಿತ್ತು.ಸದ್ಯ ಎಲ್ಲೆಂದರಲ್ಲಿ ಕಾಣಿಸಿಕೊಳ್ಳುವ ಹಾವುಗಳು ಜನರನ್ನು ಬೆಚ್ಚಿಬೀಳಿಸುತ್ತಿದೆ. ಚಳಿ, ಶೀತಗಾಳಿ ಜಿಟಿ ಜಿಟಿ ಮಳೆ ಶುರುವಾದರೆ ಸಾಕು ಬೆಚ್ಚಗಿರುವ ಜಾಗ ಹುಡುಕಿಕೊಂಡು ಹೊರಬರುವ ಹಾವುಗಳು ನೇರ ಮನೆಯತ್ತಲೇ ಬರುತ್ತವೆ.
ಮಂಡ್ಯ ಜಿಲ್ಲೆಯ ಮಳವಳ್ಳಿ ಪಟ್ಟಣದ ವೈಭವ್ ಹೋಟೆಲ್ ಬಳಿ ಹಾವೊಂದು (Snake Rescue) ಪ್ರತ್ಯಕ್ಷವಾಗಿ ಕ್ಷಣಕಾಲ ಆತಂಕ ಹೆಚ್ಚಿಸಿತ್ತು. ಮಹಿಳೆಯೊಬ್ಬರು ಕೆಲಸ ಮುಗಿಸಿಕೊಂಡು ತಮ್ಮ ಹೊಂಡಾ ಆಕ್ಟೀವ್‌ ಗಾಡಿ ಬಳಿ ಬಂದಿದ್ದರು. ಹೆಲ್ಮೆಟ್‌ ತೆಗೆದುಕೊಳ್ಳಲು ಸ್ಕೂಟರ್ ಡಿಕ್ಕಿ ತೆರೆದಿದ್ದು ಅಷ್ಟೇ ಬೆಚ್ಚಗೆ ಮಲಗಿದ್ದ ಮಂಡಲದ ಹಾವು ಕಂಡು ಬೆಚ್ಚಿಬಿದ್ದರು.
ಮಂಡಲದ ಹಾವು ಕಂಡ ಕೂಡಲೇ ಮಹಿಳೆ ಜೋರಾಗಿ ಕಿರುಚಿದ್ದು, ಆ ಸ್ಥಳದಲ್ಲಿದ್ದ ಜನ ಗಾಬರಿಯಾಗಿದ್ದಾರೆ.ಮಹಿಳೆ ಎದ್ದೆನೋ ಬಿದ್ದೆನೋ ಎಂದು ಓಡಿ ಹೋಗಿದ್ದಾರೆ ಎಂದು ತಿಳಿದು ಬಂದಿದೆ. ಮಹಿಳೆಯ ಕಿರುಚಾಟಕ್ಕೆ ಹೋಟೆಲ್‌ವೊಳಗೆ ಇದ್ದವರು, ಸುತ್ತಮುತ್ತಲ ಜನರು ಆತಂಕಗೊಂಡಿದ್ದರು. ಬಳಿಕ ಮಂಡಲದ ಹಾವು ಇರುವುದನ್ನು ನೋಡಿ ಸ್ಥಳೀಯರೊಬ್ಬರು ಉರಗ ತಜ್ಞರಿಗೆ ಕರೆ ಮಾಡಿ ವಿಷಯ ಮುಟ್ಟಿಸಿದ್ದಾರೆ.
ಸ್ಥಳಕ್ಕೆ ಬಂದ ಉರಗ ರಕ್ಷಕರು ಮಂಡಲದ ಹಾವನ್ನು ಸೆರೆಹಿಡಿದು ಸುರಕ್ಷತವಾಗಿ ಕಾಡಿಗೆ ಬಿಟ್ಟಿದ್ದಾರೆ. ಇನ್ನು ಈ ಘಟನೆಯಿಂದ ಕೆಲಕಾಲ ಹೋಟೆಲ್ ಮುಂಭಾಗ ಆತಂಕದ ವಾತಾವರಣವೇ ಸೃಷ್ಟಿಯಾಗಿತ್ತು.
