ನ್ಯೂಸ್ ನಾಟೌಟ್‌: ಹಂಗೇರಿಯ ಬುಡಾಪೆಸ್ಟ್‌’ನ ಕ್ರೀಡಾಂಗಣದಲ್ಲಿ ಸಾಂಪ್ರದಾಯಿಕ ವೈರಿಗಳೆಂದು ಹೇಳುತ್ತಿದ್ದ ಭಾರತ- ಪಾಕ್ ಆಟಗಾರರು ಇಲ್ಲಿ ಭ್ರಾತೃತ್ವ ಮೆರೆದಿದ್ದು ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ.
ಭಾರತದ ನೀರಜ್ ಚೋಪ್ರಾ ಮತ್ತು ಪಾಕಿಸ್ತಾನ ಅರ್ಷದ್ ನದೀಮ್ ಇಬ್ಬರೂ ತಮ್ಮ ತಮ್ಮ ದೇಶಗಳಿಗಾಗಿ ಇತಿಹಾಸವನ್ನೇ ಸೃಷ್ಟಿಸಿದ್ದಾರೆ. ನೀರಜ್ ವಿಶ್ವ ಚಾಂಪಿಯನ್‌ಶಿಪ್‌’ನಲ್ಲಿ ಚಿನ್ನ ಗೆದ್ದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆಗೆ ಪಾತ್ರರಾದರೆ, ಈ ಪಂದ್ಯಾವಳಿಯಲ್ಲಿ ಪದಕ ಗೆದ್ದ ಮೊದಲ ಪಾಕಿಸ್ತಾನಿ ಎಂಬ ಹೆಗ್ಗಳಿಕೆಗೆ ನದೀಮ್ ಪಾತ್ರರಾಗಿದ್ದಾರೆ.
ಈ ಪಂದ್ಯದ ಇತಿಹಾಸದ ಹೊರತಾಗಿ ಈ ಇಬ್ಬರು ಆಟಗಾರರು ಸಹೋದರತ್ವ ಮೆರೆದಿದ್ದು, ವಿಶ್ವದ ಗಮನ ಸೆಳೆದಿದೆ. ಅದು ಕ್ರಿಕೆಟ್ ಮೈದಾನವಾಗಲಿ ಅಥವಾ ಹಾಕಿ-ಫುಟ್ಬಾಲ್ ಆಗಿರಲಿ, ಭಾರತ-ಪಾಕಿಸ್ತಾನ ಆಟ ಇದೆ ಎಂದರೆ ಅಲ್ಲಿ ಉತ್ಸಾಹ ಕೊಂಚ ಹೆಚ್ಚೇ ಇರುತ್ತದೆ.
ನೀರಜ್ ಮತ್ತು ನದೀಮ್ ಇಬ್ಬರೂ ಈ ಪಂದ್ಯದಲ್ಲಿ ಕ್ರಮವಾಗಿ ಮೊದಲ ಮತ್ತು ಎರಡನೇ ಸ್ಥಾನ ಗೆದ್ದಿದ್ದಾರೆ. ಆಟದ ಕೊನೆಯಲ್ಲಿ, ಕ್ರೀಡಾಪಟುಗಳು ತಮ್ಮ ದೇಶದ ರಾಷ್ಟ್ರಧ್ವಜದೊಂದಿಗೆ ಫೋಟೋಗೆ ಫೋಸ್ ಕೊಡುವುದು ವಾಡಿಕೆ. ಆದರೆ ಆ ಸಂದರ್ಭದಲ್ಲಿ ಪಾಕಿಸ್ತಾನದ ನದೀಮ್ ಕೈಯಲ್ಲಿ ಪಾಕ್ ಧ್ವಜ ಇರಲಿಲ್ಲ. ಆಗ ನೀರಜ್, ನದೀಮ್ ಅವರನ್ನು ಕರೆದು ಭಾರತದ ಧ್ವಜದ ಒಟ್ಟಿಗೆ ನಿಲ್ಲುವಂತೆ ಕೋರಿದ್ದಾರೆ. ಈ ಫೋಟೋ ಜೊತೆ ನೀರಜ್ ವ್ಯಕ್ತಿತ್ವವನ್ನು ಎಲ್ಲರೂ ಶ್ಲಾಘಿಸುತ್ತಿದ್ದಾರೆ.
