ನ್ಯೂಸ್ ನಾಟೌಟ್ : ಮನುಷ್ಯರ ಹಾಗೆ ಈಗೀಗ ಸಾಕು ಪ್ರಾಣಿಗಳು ಕೂಡ ಆಧುನೀಕತೆಗೆ ಒಗ್ಗಿಕೊಳ್ಳುತ್ತಿವೆ.ಕೆಲವೊಂದು ರಿಯಾಲಿಟೀ ಶೋಗಳಲ್ಲಿ ಮನುಷ್ಯನಿಂದ ಪಳಗಿದ ಪ್ರಾಣಿಗಳು ಅದ್ಭುತ ಪ್ರದರ್ಶನವನ್ನು ನೀಡುತ್ತವೆ.ಹೀಗೆ ಸಾಕು ಪ್ರಾಣಿ ತುಂಟಾಟವನ್ನು ನೋಡೋದೇ ಕಣ್ಣಿಗೆ ಹಬ್ಬ.ಅವುಗಳ ಮುಗ್ಧ ನಡೆ ಮೂಕವಿಸ್ಮಿತರನ್ನಾಗಿಸುವಂತೆ ಮಾಡುತ್ತವೆ.ಇಂತಹ ವಿಡಿಯೋಗಳನ್ನು ನೀವೆಲ್ಲಾ ಜಾಲತಾಣಗಳಲ್ಲಿ ನೋಡಿರುತ್ತೀರಿ.ಇದೀಗ ಅಪಾರ್ಟ್ಮೆಂಟ್ ವೊಂದರಲ್ಲಿ ಸೇರಿದ ಬೆಕ್ಕು ಲಿಫ್ಟ್ ವೊಂದರಲ್ಲಿ ಹೇಗೆ ಓಡಾಡುತ್ತಿದೆ ನೋಡಿ..
ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿರುವ ವಿಶೇಷವಾದ ವಿಡಿಯೊವೊಂದು ಟ್ವಿಟರ್‌ನಲ್ಲಿ ಈಗ ಹರಿದಾಡುತ್ತಿದ್ದು,ಸಕತ್ ವೈರಲ್ (Viral Video) ಆಗುತ್ತಿದೆ. ಈ ವಿಡಿಯೋವನ್ನು ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದು ವಿಶೇಷ ಬೆಕ್ಕಿನ ಬಗ್ಗೆ ನೆಟ್ಟಿಗರು ಶ್ಲಾಘನೆ ವ್ಯಕ್ತ ಪಡಿಸಿದ್ದಾರೆ.
ನಿರ್ದೇಶಕರಾಗಿರುವ ಮನೀಶ್‌ ಹರಿಪ್ರಸಾದ್‌ ಅವರು ಇಂಥದ್ದೊಂದು ವಿಡಿಯೊವನ್ನು ಹಂಚಿಕೊಂಡಿದ್ದು,“ಜಿಂಜರ್‌ ಹೆಸರಿನ ಈ ವೃದ್ಧ ಬೆಕ್ಕು ನಮ್ಮ ಅಪಾರ್ಟ್‌ಮೆಂಟ್‌ಗೆ ಬಂದು ಸೇರಿಕೊಂಡಿದೆ. ಕಣ್ಣು ಸರಿಯಾಗಿ ಕಾಣದ ಈ ಬೆಕ್ಕು ಇದೀಗ ಇಡೀ ಅಪಾರ್ಟ್ಮೆಂಟ್ ಅನ್ನೇ ತನ್ನದಾಗಿ ಮಾಡಿಕೊಂಡಿದೆ. ಈ ಬೆಕ್ಕಿಗೆ ಮೆಟ್ಟಿಲುಗಳನ್ನು ಹತ್ತಿಳಿಯುವುದೆಂದರೆ ಆಗುವುದೇ ಇಲ್ಲ. ಅದು ಹೋಗಲಿಚ್ಛಿಸುವ ಫ್ಲೋರ್‌ಗೆ ಹೋಗಲು ಲಿಫ್ಟ್ ಬಳಿ ಕರೆದುಕೊಂಡು ಹೋಗುವವರೆಗೂ ನಮ್ಮ ಸುತ್ತಲೇ ಮಿಯಾವ್‌ ಎನ್ನುತ್ತಾ ಸುತ್ತುತ್ತಿರುತ್ತದೆ. ಲಿಫ್ಟ್ ಹತ್ತಿದ ಜಿಂಜರ್‌ ಒಮ್ಮೆ ಮಿಯಾವ್‌ ಎಂದು ಕೂಗಿದರೆ ಅದಕ್ಕೆ ಮೂರನೇ ಮಹಡಿಗೆ ಹೋಗಬೇಕು ಎಂದರ್ಥ. ಕೂಗದೇ ಇದ್ದರೆ ನಾವು ಯಾವ ಮಹಡಿಗೆ ಹೋಗುತ್ತೇವೋ ಆ ಮಹಡಿಗೆ ತಾನೂ ಹೋಗುತ್ತೇನೆ ಎಂದರ್ಥ” ಎಂದು ರೋಚಕವಾಗಿ ಬರೆದಿದ್ದಾರೆ.
ಹಂಚಿಕೊಂಡ ವಿಡಿಯೋದಲ್ಲಿ ಬೆಕ್ಕು ಮೊದಲಿಗೆ ಲಿಫ್ಟ್ ಬಾಗಿಲ ಬಳಿ ಕುಳಿತಿರುತ್ತದೆ. ಲಿಫ್ಟ್ ಬಾಗಿಲು ತೆರೆದ ತಕ್ಷಣ ಅದರೊಳಗೆ ಜಿಂಜರ್‌ ಹೋಗುತ್ತದೆ.ವಿಡಿಯೊ ಮಾಡುತ್ತಿದ್ದವರೂ ಲಿಫ್ಟ್‌ನೊಳಗೆ ಹೋಗಿ ಲಿಫ್ಟ್ ಬಾಗಿಲು ಮುಚ್ಚಿದ ನಂತರ ಜಿಂಜರ್‌ ಬಾಗಿಲ ಬಳಿ ಬಂದು ಕೂರುತ್ತದೆ. ನಂತರ ಒಂದು ಬಾರಿ ಮಿಯಾವ್‌ ಎಂದು ಕೂಗುತ್ತದೆ. ಅದರ ಅರ್ಥ ತಾನು ಮೂರನೇ ಮಹಡಿಗೆ ಹೋಗಬೇಕೆನ್ನುವುದು. ಅದಕ್ಕೆ ವಿಡಿಯೊ ಮಾಡುತ್ತಿದ್ದವರು, “ಆಯ್ತು, ಮೂರನೇ ಮಹಡಿಗೇ ಹೋಗುವಂತೆ” ಎಂದು ಹೇಳುತ್ತಾರೆ. ಮೂರನೇ ಮಹಡಿಯಲ್ಲಿ ಲಿಫ್ಟ್‌ನ ಬಾಗಿಲು ತೆರೆದ ತಕ್ಷಣ ಬೆಕ್ಕು ಹೊರಗೆ ನಡೆಯುತ್ತದೆ.ಈ ವಿಡಿಯೋ ಕಂಡಾಗ ಯಾಂತ್ರಿಕತೆಗೆ ಬೆಕ್ಕು ಕೂಡ ಹೇಗೆ ಒಗ್ಗಿಕೊಂಡಿದೆ ಎಂದು ಅರ್ಥವಾಗುತ್ತೆ.
ಈ ವಿಡಿಯೊವನ್ನು ಜುಲೈ 21ರಂದು ಟ್ವಿಟರ್‌ನಲ್ಲಿ ಹಂಚಿಕೊಳ್ಳಲಾಗಿದ್ದು, ಸಾವಿರಾರು ಜನರಿಂದ ವೀಕ್ಷಣೆ ಪಡೆದುಕೊಂಡಿದೆ. ಅನೇಕರು ಈ ಬೆಕ್ಕಿನ ಜಾಣತನದ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿದ್ದು,ಹಾಗೆಯೇ ಅಪಾರ್ಟ್‌ಮೆಂಟ್‌ನ ನಿವಾಸಿಗಳು ಬೆಕ್ಕನ್ನು ಅಕ್ಕರೆಯಿಂದ ನೋಡಿಕೊಳ್ಳುತ್ತಿರುವುದಕ್ಕೂ ಶ್ಲಾಘನೆ ವ್ಯಕ್ತವಾಗಿದೆ.
