ನ್ಯೂಸ್ ನಾಟೌಟ್ : ಇಲ್ಲಿಯವರೆಗೆ ಸರಗಳ್ಳರು ಬೈಕ್‌ನಲ್ಲಿ ಬಂದು ಸರವನ್ನು ಎಳೆದುಕೊಂಡ ಹೋದ ಘಟನೆಗಳ ಬಗ್ಗೆ ಕೇಳಿರುತ್ತೀರಿ. ಆದರೆ ಇದೀಗ ಕಾರಿನಲ್ಲಿ ಬಂದು ಕಳ್ಳರು ಸರ ಕದಿಯಲು ಶುರು ಮಾಡಿದ್ದಾರೆ. ತಮಿಳುನಾಡಿನ ಕೊಯಮತ್ತೂರಿನಲ್ಲಿ ಈ ಘಟನೆ ನಡೆದಿದೆ.ಕಾರಿನಲ್ಲಿ ಬಂದು ಮಹಿಳೆಯನ್ನು ಯಾವ ರೀತಿ ಯಾಮಾರಿಸುತ್ತಾರೆ ನೋಡಿ..ಈ ಕುರಿತ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ್ದು, ವೈರಲ್ ಆಗಿದೆ.
ಮಹಿಳೆಯೊಬ್ಬರು ಭಾನುವಾರ ಬೆಳಗ್ಗೆ ಮನೆಯ ಹತ್ತಿರದಲ್ಲೇ ವಾಕಿಂಗ್‌ ಮಾಡುತ್ತಿದ್ದು, ಅಷ್ಟರಲ್ಲಿ ಅಲ್ಲಿಗೆ ಬಿಳಿ ಬಣ್ಣದ ಕಾರೊಂದು ಬರುತ್ತದೆ. ಕೌಸಲ್ಯ ಎಂಬ ಮಹಿಳೆ ಅವರ ಹತ್ತಿರವೇ ಕಾರು ಬಂದಿದ್ದು, ಕಾರಿನ ಹಿಂಬದಿ ಸೀಟಿನಲ್ಲಿ ಕುಳಿತ ವ್ಯಕ್ತಿ ಕಿಟಕಿಯ ಗ್ಲಾಸ್‌ ಇಳಿಸಿಕೊಂಡು ಕೌಸಲ್ಯ ಅವರ ಕೊರಳಿಗೆ ಕೈ ಹಾಕುತ್ತಾನೆ. ತನ್ನ ಸರವನ್ನು ರಕ್ಷಿಸಿಕೊಳ್ಳಲೆಂದು ಕೌಸಲ್ಯ ಸರವನ್ನು ಗಟ್ಟಿಯಾಗಿ ಹಿಡಿದುಕೊಳ್ಳುತ್ತಾರೆ.
ಕಾರು ಮುಂದೆ ಹೋಗುವ ರಭಸಕ್ಕೆ ಕೌಸಲ್ಯ ಅವರು ನೆಲದ ಮೇಲೆ ಬಿದ್ದಿದ್ದು, ಕಾರು ಅವರನ್ನು ಸ್ವಲ್ಪ ದೂರ ಎಳೆದುಕೊಂಡು ಹೋಗಿದೆ.ಅದೃಷ್ಟವಶಾತ್ ಮಹಿಳೆಯ ಪ್ರಾಣಕ್ಕೆ ಯಾವುದೇ ರೀತಿಯ ಅಪಾಯ ಸಂಭವಿಸಿಲ್ಲವೆಂದು ತಿಳಿದು ಬಂದಿದೆ. ಈ ಎಲ್ಲ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಈ ಘಟನೆ ಬಳಿಕ ಕೌಸಲ್ಯ ಅವರು ಸಿಂಗನಲ್ಲೂರು ಪೊಲೀಸ್‌ ಠಾಣೆಯಲ್ಲಿ ದೂರು ನೀಡಿದ್ದಾರೆ.
