ನ್ಯೂಸ್ ನಾಟೌಟ್ : ನಕಲಿ ಮದ್ಯ ತಯಾರಿಸುತ್ತಿದ್ದ ಸ್ಥಳಕ್ಕೆ ಮಿಂಚಿನ ವೇಗದಲ್ಲಿ ದಾಳಿ ನಡೆಸಿದ ಸುಳ್ಯ ಪೊಲೀಸರು ಓರ್ವ ಆರೋಪಿಯನ್ನು ಮದ್ಯದ ಮಾಲು ಸಹಿತ ವಶಕ್ಕೆ ಪಡೆದುಕೊಂಡಿದ್ದಾರೆ.
ಸುಳ್ಯ ತಾಲೂಕಿನ ಅರಂತೋಡು ಗ್ರಾಮ ಪಂಚಾಯತ್ ವ್ಯಾಪ್ತಿಯ ತೊಡಿಕಾನ ಗ್ರಾಮದ ಅಡ್ಯಡ್ಕ ಎಂಬಲ್ಲಿ ಮಾರ್ಚ್ 2ರಂದು ಖಚಿತ ಮಾಹಿತಿ ಆಧರಿಸಿ ಅಕ್ರಮ ಮದ್ಯ ಮಾರಾಟಗಾರನ ಹೆಡೆಮುರಿ ಕಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ. ಸುಳ್ಯ ಪೊಲೀಸ್ ಠಾಣಾ ಉಪ ನಿರೀಕ್ಷಕ ದಿಲೀಪ್ ಹಾಗೂ ಸಿಬ್ಬಂದಿ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.
ಸುಳ್ಯ ತಾಲೂಕು ತೊಡಿಕಾನ ಗ್ರಾಮದ ಅಡ್ಯಡ್ಕ ನಿವಾಸಿ ಅಣ್ಣದೊರೈ ಎಂಬವರ ಅಂಗಡಿಯ ಸಮೀಪ ಪೊಲೀಸರು ಬಂದಿದ್ದಾರೆ. ಈ ವೇಳೆ ಪೊಲೀಸರ ಕಂಡು ಕೆಲವು ಗಿರಾಕಿಗಳು ಮದ್ಯದ ಪ್ಯಾಕೇಟ್‌ ಸಹಿತ ಸ್ಥಳದಿಂದ ಕಾಲ್ಕಿತ್ತಿದ್ದಾರೆ. ಈ ಸಂದರ್ಭದಲ್ಲಿ ಪೊಲೀಸರು ಹೆಚ್ಚಿನ ಪರಿಶೀಲನೆ ನಡೆಸಿದಾಗ ಅಂಗಡಿಯ ಆಸುಪಾಸು ತಪಾಸಣೆ ನಡೆಸಿದ್ದಾಗ ಸ್ಥಳದಲ್ಲಿ Black Fort ಎಂದು ಬರೆದಿರುವ 500 ಎಂ ಎಲ್‌ನ ಬಿಯರ್‌ ಟಿನ್‌ ಬಾಟ್ಲಿಗಳು-20, (ಒಟ್ಟು ಮೌಲ್ಯ-2000/ರೂಪಾಯಿ) Royal Challengers ಎಂದು ಬರೆದಿರುವ 330 ಎಂ ಎಲ್‌ನ ಬಿಯರ್‌ ಬಾಟ್ಲಿಗಳು-21, (ಒಟ್ಟು ಮೌಲ್ಯ-1050/ರೂಪಾಯಿ) ಎರಡು ರಟ್ಟಿನ ಬಾಕ್ಸ್‌ಗಳಲ್ಲಿ Mysore Lancer ಎಂದು ಬರೆದಿರುವ 90 ಎಂ ಎಲ್‌ನ ವಿಸ್ಕಿ ಪ್ಯಾಕೇಟ್‌ಗಳು-144 (ಒಟ್ಟು ಮೌಲ್ಯ-5058/ರೂಪಾಯಿ) ಇರುವುದು ಪತ್ತೆಯಾಗಿದೆ. ಒಟ್ಟು ಮೌಲ್ಯ ರೂ 8498 ಮೌಲ್ಯದ ಅಕ್ರಮ ಮದ್ಯ ವಶಪಡಿಸಿಕೊಳ್ಳಲಾಗಿದೆ. ಆರೋಪಿಯನ್ನು ವಶಪಡಿಸಿಕೊಂಡು ಅ.ಕ್ರ 19/2023 ಕಲಂ 32, 34 ಕರ್ನಾಟಕ ಅಬಕಾರಿ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ.
