ನ್ಯೂಸ್ ನಾಟೌಟ್ : ತಿರುವನಂತಪುರದ ಮನೆಯೊಂದರ ಮುಂದೆ ‘ಕಿಡ್ನಿ, ಲಿವರ್ ಮಾರಾಟಕ್ಕಿದೆ ’ ಎಂಬ ಪೋಸ್ಟರ್ ಕಾಣಿಸಿಕೊಂಡಿದ್ದು, ಇದು ಯಾರೋ ಮಾಡಿದ ಚೇಷ್ಟೆ ಎಂದು ಕೆಲವರು ಭಾವಿಸಿದ್ದರು, ಆದರೆ, ಜಾಹೀರಾತಿನ ಜೊತೆಗೆ ಎರಡು ಫೋನ್ ನಂಬರ್‌ಗಳನ್ನು ಸಹ ಹಾಕಲಾಗಿತ್ತು. ಸಂಖ್ಯೆಗಳನ್ನು ಡಯಲ್ ಮಾಡಿದಾಗ, ಅವು ಅಸಲಿ ಎಂದು ಕಂಡುಬಂದಿದೆ.
ಮಣಕಾಡು ಪುಥೇನ್ ರಸ್ತೆಯ ಬದಿಯಲ್ಲಿ ೫೦ ವರ್ಷವಯಸ್ಸಿನ ಸಂತೋಷ್ ಕುಮಾರ್ ಎನ್ನುವವರು ಈ ಬೋರ್ಡ್ ಹಾಕಿದ್ದರು.
ಹಣ್ಣಿನ ಅಂಗಡಿಯಲ್ಲಿ ಕೆಲಸ ಮಾಡುತ್ತಿದ್ದ ಇವರಿಗೆ ಗೋಣಿಚೀಲ ಎತ್ತುವ ವೇಳೆ ದೈಹಿಕ ಅನಾರೋಗ್ಯ ಉಂಟಾಗಿತ್ತು, ಹಾಗಾಗಿ ಅವರು ಚಿಕಿತ್ಸೆಗೆ ಒಳಗಾಗಬೇಕಾಯಿತು. ಅವರು ಈಗ ಹಣವಿಲ್ಲದೆ ಪರದಾಡುತ್ತಿದ್ದು, ಮಣಕಾಡು ಊರಿನ ಜಂಕ್ಷನ್‌ನಲ್ಲಿರುವ ಕುಟುಂಬದ ಒಂದು ಭೂಮಿಯನ್ನು ಮಾರಾಟ ಮಾಡಲು ಅವರು ಬಯಸಿದ್ದರು. ಆದರೆ, ಜಮೀನಿನ ವಿಚಾರವಾಗಿ ಸಹೋದರನ ಜತೆ ಜಗಳವಾಗಿತ್ತು.
ಆಸ್ತಿ ಅವರ ತಾಯಿಯ ಹೆಸರಿನಲ್ಲಿದೆ ಮತ್ತು ಈಗ ಸಂತೋಷ್ ಸೇರಿದಂತೆ ಆರು ಸಹೋದರರ ಹೆಸರಿನಲ್ಲಿದೆ ಎಂದು ಅವರ ಸಹೋದರ ಮಾಧ್ಯಮ ಪ್ರತಿನಿಧಿಗಳಿಗೆ ತಿಳಿಸಿದರು. ಪತ್ನಿ, ಮಕ್ಕಳಿಗಾಗಿ ಕೆಲವು ಟ್ಯೂಷನ್ ತರಗತಿಗಳನ್ನು ತೆಗೆದುಕೊಂಡರು ಆದರೆ ಕೋವಿಡ್ ನಂತರ ಅದೂ ನಿಂತುಹೋಯಿತು ಎಂದು ಸಂತೋಷ್ ಹೇಳಿದ್ದಾರೆ. ಕಠಿಣ ಪರಿಸ್ಥಿತಿಯಲ್ಲಿ, ತಮ್ಮ ಪ್ರಮುಖ ಅಂಗಗಳನ್ನು ಮಾರಾಟ ಮಾಡುವುದನ್ನು ಬಿಟ್ಟು ಬೇರೆ ಯಾವುದೇ ಮಾರ್ಗವಿಲ್ಲ ಎಂದು ಪೋಸ್ಟರ್ ಹಾಕಲಾಯಿತು ಎಂದು ಕುಟುಂಬ ಹೇಳಿಕೊಂಡಿದೆ ಎಮದು ವರದಿ ತಿಳಿಸಿದೆ.
