ನ್ಯೂಸ್ ನಾಟೌಟ್: ಮಂಗಳೂರು ನಗರದ ಕೆಪಿಟಿ ಜಂಕ್ಷನ್‌ ಬಳಿ ಭಾನುವಾರ ರಾತ್ರಿ 7 ಗಂಟೆಯ ಸುಮಾರಿಗೆ ಸರಣಿ ಅಪಘಾತ ಸಂಭವಿಸಿ ಓರ್ವ ಗಂಭೀರ ಗಾಯಗೊಂಡಿದ್ದಾರೆ. ಅಪಘಾತದಿಂದಾಗಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕೆಲ ಕಾಲ ಸಂಚಾರ ವ್ಯತ್ಯಯ ಉಂಟಾಯಿತು.
ಕೆಪಿಟಿ ವೃತ್ತದಲ್ಲಿ ಕಾರೊಂದು ಯು ಟರ್ನ್ ತೆಗೆದುಕೊಳ್ಳುವ ವೇಳೆ ಹಿಂದಿನಿಂದ ಬಂದ ಮೀನು ಸಾಗಾಟದ ಪಿಕಪ್ ಡಿಕ್ಕಿ ಹೊಡೆದಾಗ ಕಾರು ಪಕ್ಕದಲ್ಲಿದ್ದ ವಿದ್ಯುತ್ ಕಂಬಕ್ಕೆ ಡಿಕ್ಕಿಯಾಯಿತು. ಅದೇ ಸಮಯ ಹಿಂದಿನಿಂದ ಬಂದ ಹಾಲಿನ ವಾಹನ ಮೀನು ಸಾಗಾಟದ ಪಿಕಪ್‌ಗೆ ಡಿಕ್ಕಿಹೊಡೆಯಿತು. ಹಾಲಿನ ವಾಹನ ಚಾಲಕ ಗಾಯಗೊಂಡು ಸಿಲುಕಿಕೊಂಡಿದ್ದು ಅವರನ್ನು ಹರಸಾಹಸ ಪಟ್ಟು ಹೊರತೆಗೆಯಲಾಯಿತು. ಡಿಕ್ಕಿಯ ರಭಸಕ್ಕೆ ಹಾಲಿನ ವಾಹನ ಮತ್ತು ಮೀನು ಸಾಗಾಟ ಪಿಕಪ್ ಒಂದಕ್ಕೊಂದು ಸಿಲುಕಿಕೊಂಡಿದ್ದು ಕ್ರೇನ್‌ ಬಳಸಿ ತೆರವುಗೊಳಿಸಲಾಯಿತು. ಅಪಘಾತದಿಂದ ಮೂರು ವಾಹನಗಳಿಗೂ ಹಾನಿಯಾಗಿದೆ. ಸಂಚಾರ ಪೂರ್ವ ಠಾಣೆಯ ಪೊಲೀಸರು ಸ್ಥಳದಲ್ಲಿದ್ದು, ಕಾರ್ಯಾಚರಣೆ ನಡೆಸಿದರು.
