ನ್ಯೂಸ್ ನಾಟೌಟ್:ಲೆನ್ಸ್ ಗಳನ್ನು ಬಳಸುವಾಗ ಸಾಕಷ್ಟು ಜಾಗ್ರತೆ ವಹಿಸುವುದು ಮುಖ್ಯ. ಸ್ವಲ್ಪ ಯಾಮಾರಿದರೂ ಅಪಾಯ ಕಟ್ಟಿಟ್ಟ ಬುತ್ತಿ.ಕಾಂಟ್ಯಾಕ್ಟ್ ಲೆನ್ಸ್ ಗಳನ್ನು ಧರಿಸುವಾಗ ನಿಮ್ಮ ಕಣ್ಣುಗಳನ್ನು ಆರೋಗ್ಯಕರವಾಗಿ ಮತ್ತು ಸೋಂಕು ಮುಕ್ತವಾಗಿ ಕಾಪಾಡಿಕೊಳ್ಳಬೇಕಾಗುತ್ತದೆ.ಈ ನಿಯಮ ಪಾಲಿಸದಿದ್ದರೆ ಜೀವನ ಪರ್ಯಂತ ಕಣ್ಣನ್ನೇ ಕಳೆದು ಕೊಳ್ಳುವ ಸಾಧ್ಯತೆ ಇದೆ ಎನ್ನುವುದಕ್ಕೆ ಇದೊಂದು ಘಟನೆ ಪ್ರತ್ಯಕ್ಷ ಸಾಕ್ಷಿ.
ಇಲ್ಲೊಬ್ಬ ೨೧ ವರ್ಷದ ಹುಡುಗ ಹಗಲಿಡೀ ಕಾಂಟ್ಯಾಕ್ಟ್ ಲೆನ್ಸ್ ಹಾಕಿ , ರಾತ್ರಿ ಅದನ್ನು ತೆಗೆದಿಡಲು ಮರೆತಿದ್ದಾನೆ. ಪರಿಣಾಮ ಒಂದು ಕಣ್ಣಿನ ದೃಷ್ಟಿ ಕಳೆದು ಕೊಂಡಿರುವ ಘಟನೆ ಅಮೆರಿಕದ ಫ್ಲೋರಿಡಾದಲ್ಲಿ ಸಂಭವಿಸಿದೆ.ಮೈಕ್ ಕ್ರೂಮ್ ಹೋಲ್ಜ್ ಎಂಬ ಯುವಕ ಕಾಂಟ್ಯಾಕ್ಟ್ ಲೆನ್ಸ್ ಬಳಸುತ್ತಿದ್ದ. ಆದರೆ ಆ ದಿನ ರಾತ್ರಿ ಕಾಂಟ್ಯಾಕ್ಟ್ ಲೆನ್ಸ್ ತೆಗೆಯದೇ ಹಾಗೆಯೇ ಮಲಗಿದ್ದಾನೆ. ಇದರ ಪರಿಣಾಮ ಬೆಳಗ್ಗಿನ ಜಾವ ಕಣ್ಣಿನಲ್ಲಿ ತೀವ್ರ ಅಲರ್ಜಿಯ ಲಕ್ಷಣಗಳು ಕಂಡುಬಂದಿದೆ. ನಂತರ ವೈದ್ಯರನ್ನು ಸಂಪರ್ಕಿಸಿದ್ದಾನೆ. ಅಂತಿಮವಾಗಿ ಒಟ್ಟು ಐದು ವಿಭಿನ್ನ ನೇತ್ರಶಾಸ್ತ್ರಜ್ಞರು ಮತ್ತು ಇಬ್ಬರು ಕಾರ್ನಿಯಾ ತಜ್ಞರನ್ನು ಭೇಟಿ ಮಾಡಿದರೂ ಚಿಕಿತ್ಸೆ ಫಲಕಾರಿಯಾಗದೇ ಒಂದು ಕಣ್ಣಿನ ದೃಷ್ಟಿಯನ್ನು ಕಳೆದು ಕೊಂಡು ಈಗ ಮನನೊಂದಿದ್ದಾನೆ.
‘ನನಗೆ ಇದು ತುಂಬಾ ಅಘಾತವನ್ನುಂಟು ಮಾಡಿದೆ. ಈ ಕಷ್ಟದ ಸಮಯದಿಂದ ಹೊರಬರಲು ಪ್ರಯತ್ನಿಸುತ್ತಿದ್ದೇನೆ. ಆದರೆ ನನ್ನ ಹಾಗೇ ಕಾಂಟ್ಯಾಕ್ಟ್ ಲೆನ್ಸ್ ಧರಿಸುವವರಿಗೆ ಅರಿವು ಮೂಡಿಸುವ ಉದ್ದೇಶವನ್ನು ನಾನು ಹೊಂದ್ದಿದೇನೆ. ನನ್ನ ಸ್ಥಿತಿ ಯಾರಿಗೂ ಬರುವುದು ಬೇಡ’ ಎಂದು ಸ್ವತಃ ಮೈಕ್ ಕ್ರೂಮ್ ಹೋಲ್ಜ್ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾನೆ.
ನೇತ್ರವಿಜ್ಞಾನಿಯಾಗಿರುವ ಡಾ. ನಿರತಿ ಶ್ರೀವಾಸ್ತವ ಕಾಂಟ್ಯಾಕ್ಟ್ ಲೆನ್ಸ್ ಗಳನ್ನು ಧರಿಸುವವರಿಗೆ ಯಾವ ರೀತಿ ಜಾಗರೂಕರಾಗಿ ಇರಬೇಕೆಂದು ಸಲಹೆ ನೀಡುತ್ತಾರೆ.ರಾತ್ರಿಯಿಡೀ ಕಾಂಟ್ಯಾಕ್ಟ್ ಲೆನ್ಸ್ ಗಳನ್ನು ಧರಿಸುವುದರಿಂದ ದೃಷ್ಟಿಗೆ ಹಾನಿಯಾಗುತ್ತದೆ. ನಿದ್ದೆ ಮಾಡುವಾಗ ಕಾಂಟ್ಯಾಕ್ಟ್ ಲೆನ್ಸ್ ಧರಿಸಿದರೆ ಇದು ಕಣ್ಣುಗಳನ್ನು ತಲುಪುವ ಆಮ್ಲಜನಕದ ಪ್ರಮಾಣವನ್ನು ಕಡಿಮೆ ಮಾಡುತ್ತದೆ ಮತ್ತು ಸೋಂಕಿನ ಅಪಾಯವನ್ನು ಹೆಚ್ಚಿಸುತ್ತದೆ.ನಿದ್ರಾವಸ್ಥೆಯಲ್ಲಿ ಬ್ಯಾಕ್ಟೀರಿಯಾ ಅಥವಾ ಸೂಕ್ಷ್ಮಜೀವಿಯ ಆಕ್ರಮಣವನ್ನು ತಡೆಯಲು ಅಗತ್ಯವಾದ ಆಮ್ಲಜನಕ ಮತ್ತು ತೇವಾಂಶವನ್ನು ಸ್ವೀಕರಿಸದಂತೆ ನಿಮ್ಮ ಕಣ್ಣುಗಳನ್ನು ತಡೆಯುತ್ತದೆ ಎಂದು ಡಾ.ಶ್ರೀವಾಸ್ತವ ಎಚ್ಚರಿಕೆ ನೀಡುತ್ತಾರೆ.
ಹೈದರಾಬಾದ್ನ ನೇತ್ರತಜ್ಞರಾದ ಡಾ ದೀಪ್ತಿ ಮೆಹ್ತಾ ಕಾಂಟ್ಯಾಕ್ಟ್ ಲೆನ್ಸ್ ಗಳನ್ನು ಧರಿಸಿದರೆ ನೀವು ಅನುಸರಿಸಬೇಕಾದ ಕೆಲವು ಸಲಹೆಗಳನ್ನು ಹಂಚಿಕೊಂಡಿದ್ದಾರೆ.ಬಳಕೆಯ ಮೊದಲು ಮತ್ತು ನಂತರ ನಿಮ್ಮ ಲೆನ್ಸ್ ಗಳನ್ನು ಪ್ರತಿದಿನ ಸೋಂಕು ರಹಿತಗೊಳಿಸುವುದು ಮುಖ್ಯ.ನಿಮ್ಮ ಲೆನ್ಸ್ ನಲ್ಲಿ ಬೇರೆ ಯಾವುದೇ ದ್ರಾವಣಗಳು ಉಳಿಯದಂತೆ ಪ್ರತಿ ಬಾರಿ ಸ್ವಚ್ಚಗೊಳಿಸಬೇಕಾಗುತ್ತದೆ. ಕಿರಿಕಿರಿ ಅಥವಾ ನೋವು , ಕಣ್ಣುಗಳಲ್ಲಿ ನೀರು ಬಂದ ತಕ್ಷಣ ಲೆನ್ಸ್ ಧರಿಸುವುದನ್ನು ನಿಲ್ಲಿಸಿ ಎಂದು ವೈದ್ಯರು ಹೇಳುತ್ತಾರೆ.ನೀವು ನಿಮ್ಮ ಲೆನ್ಸ್ ಗಳನ್ನು ಹಾಕಿಕೊಂಡು ಹೊರಗೆ ಹೋಗುವಾಗ ಯಾವಾಗಲೂ ಕಾಂಟ್ಯಾಕ್ಟ್ ಲೆನ್ಸ್ ಕೇಸ್ ಮತ್ತು ಕನ್ನಡಕವನ್ನು ತೆಗೆದುಕೊಂಡು ಹೋಗುವುದು ಅಗತ್ಯ. ಕಣ್ಣುಗಳಲ್ಲಿ ಸ್ವಲ್ಪ ನೋವು ಅಥವಾ ಅಸ್ವಸ್ಥತೆ ಕಂಡುಬಂದಲ್ಲಿ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.
