ನ್ಯೂಸ್ ನಾಟೌಟ್: ಹುಚ್ಚು ನಾಯಿ ದಾಳಿಗೆ ಗಬ್ಬದ ಹಸು ಸಾವನ್ನಪ್ಪಿರುವ ಘಟನೆ ನಾಪೋಕ್ಲು ಸಮೀಪದ ಬೇತುಗ್ರಾಮದಿಂದ ವರದಿಯಾಗಿದೆ.
ಹುಚ್ಚು ನಾಯಿಗಳ ಹಾವಳಿ ಮಿತಿಮೀರಿದೆ. ಗ್ರಾಮಸ್ಥರಲ್ಲಿ ಭಯದ ವಾತಾವರಣ ಸೃಷ್ಟಿಯಾಗಿದೆ. ಬೇತು ಗ್ರಾಮದ ನಿವಾಸಿ ಐರೀರ ಪೂಣಚ್ಚ ಎಂಬುವವರಿಗೆ ಸೇರಿದ ಸುಮಾರು 50 ಸಾವಿರ ಬೆಲೆ ಬಾಳುವ ಎಂಟು ತಿಂಗಳ ಗಬ್ಬದ ಹಸು ಹುಚ್ಚು ನಾಯಿ ಕಚ್ಚಿದ ಪರಿಣಾಮ ಸಾವನ್ನಪ್ಪಿದೆ. ಪ್ರತಿ ದಿನ ಮೇಯಲು ಬಿಡುತ್ತಿದ್ದ ಹಸು ಕಳೆದ ಎರಡು ದಿನಗಳಿಂದ ರಾತ್ರಿ ಹಗಲು ಏಕಾಏಕಿ ಚೀರಾಡುತ್ತಾ ಬಾಯಿಯಲ್ಲಿ ನೊರೆ ಹಾಗೂ ರಕ್ತ ಬರುತ್ತಿರುವುದನ್ನು ಗಮನಿಸಿದ ಪೂಣಚ್ಚ ಸ್ಥಳೀಯ ಪಶುವೈದ್ಯಾಧಿಕಾರಿಗಳಿಗೆ ಮಾಹಿತಿ ತಿಳಿಸಿದ್ದಾರೆ. ಸ್ಥಳಕ್ಕೆ ಭೇಟಿ ನೀಡಿದ ಪಶುವೈದ್ಯಾಧಿಕಾರಿ ಪರಿಶೀಲಿಸಿದಾಗ ಹಸುವಿನ ಮೇಲೆ ನಾಯಿ ಕಚ್ಚಿದ ಗಾಯದ ಗುರುತು ಗೋಚರಿಸಿದೆ. ಇದು ಹುಚ್ಚು ನಾಯಿ ಕಚ್ಚಿರುವುದಾಗಿ ವೈದ್ಯರು ತಿಳಿಸಿದ್ದಾರೆ.
