ಅಹಮದಾಬಾದ್: ಐವಿಎಫ್ ತಂತ್ರಜ್ಞಾನದಡಿ ಗರ್ಭಧರಿಸಿದ್ದ ಬನ್ನಿ ತಳಿಯ ಎಮ್ಮೆ ಗಂಡು ಕರುವಿಗೆ ಜನ್ಮ ನೀಡಿದೆ. ಗಿರ್ ಸೋಮನಾಥ್ ಜಿಲ್ಲೆಯ ರೈತರೊಬ್ಬರ ಮನೆಯಲ್ಲಿ ಎಮ್ಮೆಗೆ ಇಂತಹ ಪ್ರಯೋಗ ಮಾಡಲಾಗಿದ್ದು ಆ ಪ್ರಯೋಗ ಯಶಸ್ವಿಯಾಗಿದೆ.
ಏನಿದು ವಿಶೇಷ ತಳಿ?
ಬನ್ನಿ ತಳಿ ಎಮ್ಮೆಗಳ ಪೈಕಿ ಅತ್ಯಂತ ವಿಶೇಷವಾಗಿದ್ದಾಗಿದೆ. ಅಪರೂಪದ ತಳಿ ಹೆಚ್ಚಾಗಿ ಗುಜರಾತ್‌ನ ಕಛ್ ಪ್ರಾಂತ್ಯದಲ್ಲಿ ಹೆಚ್ಚು ಕಂಡುಬರುತ್ತವೆ. ಹಾಲಿನ ಉತ್ಪಾದನೆ ವೃದ್ಧಿಗೆ, ಗುಣಮಟ್ಟದ ತಳಿಯ ಎಮ್ಮೆಗಳ ಸಂತತಿ ಹೆಚ್ಚಿಸಲು ಐವಿಎಫ್ ತಂತ್ರಜ್ಞಾನದ ಮೊರೆ ಹೋಗಲಾಗಿತ್ತು. ಬನ್ನಿ ಮತ್ತು ಮುರ್ರಾ ತಳಿಗಳು ಹೆಚ್ಚು ಹಾಲು ನೀಡುತ್ತವೆ. ಕಡಿಮೆ ಮೇವು ಸೇವಿಸಿಯೂ ನಿಯಮಿತವಾಗಿ 9–12 ಲೀಟರ್ ಹಾಲು ನೀಡುತ್ತಿವೆ. ಐವಿಎಫ್ ತಂತ್ರಜ್ಞಾನವು ವರದಾನವಾಗಿದ್ದು, ಇದು ನಿರ್ದಿಷ್ಟ ತಳಿಯ ಜಾನುವಾರುಗಳನ್ನು ತ್ವರಿತವಾಗಿ ಹೆಚ್ಚಿಸಲು ನೆರವಾಗಲಿದೆ.
ಮೊದಲ ಎಮ್ಮೆ ಕರು
ಬನ್ನಿ ತಳಿಯ ಎಮ್ಮೆಗಳು ಸ್ಥಿತಿಸ್ಥಾಪಕತ್ವ, ಹೆಚ್ಚಿನ ಹಾಲು ಉತ್ಪಾದನೆಗೆ ಹೆಸರಾಗಿವೆ. ಇದು ಐವಿಎಫ್ ಕ್ರಮದಲ್ಲಿ ಜನಿಸಿದ ಮೊದಲ ಕರು ಎಂದು ಕೇಂದ್ರ ಪಶುಸಂಗೋಪನೆ, ಮೀನುಗಾರಿಕೆ ಸಚಿವಾಲಯ ಟ್ವೀಟ್ ಮಾಡಿದೆ. ಬನ್ನಿ ತಳಿ ಎಮ್ಮೆ ಐವಿಎಫ್ ತಂತ್ರಜ್ಞಾನದಲ್ಲಿ ಗರ್ಭಧರಿಸಿ ಕರುವಿಗೆ ಜನ್ಮ ನೀಡಿದ ಮೊದಲ ಪ್ರಕರಣ ಇದಾಗಿದೆ. ಕೃಷಿಕ ವಿನಯ್ ಎಲ್ ವಾಲಾ ಅವರ ಕೊಟ್ಟಿಗೆಯಲ್ಲಿಯೇ ಕರು ಜನಿಸಿತು ಎಂದು ಟ್ವೀಟರ್ ನಲ್ಲಿ ತಿಳಿಸಲಾಗಿದೆ.
ಇದೇ ತಂತ್ರಜ್ಞಾನದಡಿ ಇನ್ನೂ ಹೆಚ್ಚು ಕರುಗಳ ಜನನ
ಎಮ್ಮೆಗೆ ಐವಿಎಫ್ ತಂತ್ರಜ್ಞಾನದ ಮೂಲಕ ಗರ್ಭಧಾರಣೆಗೆ ನೆರವಾಗುವ ಕ್ರಮವನ್ನು ಸ್ಥಳೀಯ ಎನ್‌ಜಿಒ ಜೆಕೆ ಟ್ರಸ್ಟ್ ಕೈಗೊಂಡಿತ್ತು. ಇನ್ನೂ ಕೆಲ ಎಮ್ಮೆಗಳಿಗೆ ಇದೇ ಕ್ರಮ ಅನುಸರಿಸಿದ್ದು, ಮುಂದಿನ ದಿನಗಳಲ್ಲಿ ಅವುಗಳು ಕೂಡ ಕರುವಿಗೆ ಜನ್ಮ ನೀಡುವ ನಿರೀಕ್ಷೆಯಿದೆ ಎಂದು ಕೃಷಿಕ ವಿನಯ್ ವಾಲಾ ತಿಳಿಸಿದ್ದಾರೆ. ಎನ್‌ಜಿಒ ಜೆ.ಕೆ.ಟ್ರಸ್ಟ್ ಗುಜರಾತ್‌ನಲ್ಲಿ ಐವಿಎಫ್ ತಂತ್ರಜ್ಞಾನ ಬಳಸಿ ಒಟ್ಟು 125 ಗರ್ಭಧಾರಣೆಯನ್ನು ಮುಂದಿನ ಎರಡು ತಿಂಗಳಲ್ಲಿ ರಾಸುಗಳಿಗೆ ನಡೆಸಲು ಉದ್ದೇಶಿಸಿದೆ.
ಹೇಗೆ ನಡೆಯುತ್ತೆ ಪ್ರಯೋಗ?
ಪ್ರಣಾಳ ಶಿಶು ತಂತ್ರಜ್ಞಾನ ಮಾದರಿಯಲ್ಲಿ ಈ ಸಂಶೋಧನೆ ನಡೆಸಲಾಗುತ್ತದೆ. ಮಹಾರಾಷ್ಟç ಮತ್ತು ಚಂಡೀಗಢದಲ್ಲಿ ಐವಿಎಫ್ ಕರುಗಳ ಸೃಚ್ಟಿಸುವ ಎರಡು ಅತ್ಯುನ್ನತ ಪ್ರಯೋಗಾಲಯಗಳನ್ನು ಹೊಂದಿದೆ. ಈ ಪ್ರಯೋಗಾಲಯದ ಪರಿಣಿತರು ದಾನಿ ಹಸು ಅಥವಾ ಎಮ್ಮೆಯ ಇನ್ನೂ ಫಲಿತಗೊಳ್ಳದ ಅಂಡಗಳನ್ನು ಸಂಗ್ರಹಿಸಲಾಗುತ್ತದೆ. ಅದನ್ನು ಉತ್ಕೃಷ್ಟ ಗುಣಮಟ್ಟದ ಗಂಡು ಎಮ್ಮೆ ಅಥವಾ ಎತ್ತಿನ ವೀರ್ಯಾಣುವಿನೊಂದಿಗೆ ಸಂಯೋಗಗೊಳಿಸಲಾಗುತ್ತದೆ. ಇದರ ಪರಿಣಾಮದಿಂದ ಉತ್ತಮ ಗುಣಮಟ್ಟದ ಭ್ರೂಣ ಬೆಳೆಯುತ್ತದೆ.
ಎಷ್ಟು ಕರುವಿಗೆ ಜನ್ಮ ನೀಡಬಹುದು?
ಈ ಮಾದರಿಯಲ್ಲಿ ಹಸು ಅಥವಾ ಎಮ್ಮೆ ಸರಾಸರಿ 15 ವರ್ಷದ ಜೀವಿತಾವಧಿಯಲ್ಲಿ ಗರಿಷ್ಠ 10 ಕರುಗಳಿಗೆ ಜನ್ಮ ನೀಡಬಲ್ಲದು. ಹೀಗಾಗಿ ಅಧಿಕ ಹಾಲು ನೀಡಬಲ್ಲ ಹೆಚ್ಚಿನ ಹಸು ಅಥವಾ ಎಮ್ಮೆಗಳನ್ನು ಪಡೆಯಬಹುದು. ಈ ನಿಟ್ಟಿನಲ್ಲಿ ಇನ್ನೂ ಹೆಚ್ಚಿನ ಪ್ರಯೋಗಗಳು ನಡೆಯುತ್ತಿವೆ.
